116
Kuyie ndɛɛtɛ́nɛ̀ wè mukṹṹ nkòò kù sɑ̃ntí
1 N dɔ́mu n Yiɛ̀ nKuyie,
kɛ yɛ̃́ kù yomɛ̀ nkó yɛdɑbùò nnɛ̀ m bɑ́ɑmmìi.
2 Kù n kèḿmúmu, kɛ̀ ku to bo m bíɛ́kɛ̀,
n yó nkù yumu sɑ̃́ɑ̃̀ nɛ̀ m bo mbomɛ̀.
3 Mukṹṹ mmuù do m pìtínnɛ́ mu kó iwɛ̃ĩ,
kɛ̀ kudɔnkù kó ticùɔ̀tì m pĩ́,
kɛ̀ mɛyɛǹcɑɑ̀rìmɛ̀ n nɑ,
kɛ̀ n tɑ kukɔ̃m̀bɔ̀doróo miɛkɛ.
4 Kɛ kuɔ́nkoo kɛ́yú n Yiɛ̀ nKuyie nkɛ yĩ́:
N Yiɛ̀ nKuyie nyɑ̀ɑ n dɛɛtɛ́.
5 Ti Yiɛ̀ nKuyie nwetímu, kɛ mɔkɛ mɛsémmɛ̀,
Kuyie nti tũ nkù kuɔ̀mmu onìtì mɛsémmɛ̀.
6 N Yiɛ̀ nKuyie nkuù kɑ̃nkù bɛsĩ́ntíbɛ̀,
n do cĩ̀tɛmu kɛ̀ kù n dɛɛtɛ́.
7 N wɛ̃̀tɛ kɛ pɛ̀tɛ́mu mɛom̀pùmɛ̀,
N Yiɛ̀ nKuyie nkuù n dɔ̀ɔ̀ mɛsɑ̀ɑ̀.
8 Kuù n dɛɛtɛ́nɛ̀ mukṹṹ, kɛ ũtɛ́ n nɔnniɛti,
kɛ pĩ n nɑɑ̀cɛ̀i, bɑ́ n yí do.
9 N Yiɛ̀ nKuyie nkuù yó nni nwúó nkɛ̀ n kérí,
kɛtenkɛ̀ ĩ́nkɛ̀ bɛfòùbɛ̀ borɛ̀.
10 N yɛ̀mmɛ̀ do í nɔ̀ɔ́tɛ́ n Yiɛ̀ nKuyie nyĩ́nkɛ̀.
Bɑ́ nɛ̀ m mɛ̀ n tɑmɛ̀ mɛsémmɛ̀ miɛkɛ.
11 N do tɑ mɛyɛǹcɑɑ̀rìmɛ̀ miɛkɛ nkɛ,
kɛ nɑ́ɑ́ nkɛ tú bɛnìtìbɛ̀ bɛmɔu tú siyɑ́ɑ̀bìsí yɛmbɛ̀ mbɛ.
12 M bo nɑ kɛ́yietí bɑ Kuyie kù n dɔ̀ɔ̀ mɛ̀ɛ̀ sɑ̀ɑ̀ mmɛmɔu?
13 N Yiɛ̀ nKuyie nni ndɛɛtɛ́mu,
kɛ̀ n yó nyuo mɛdɛɛtímɛ̀ kó fɛbòòfɛ̀* fɛbòòfɛ̀: Dɛ kó fɛbòòfɛ̀ bɛnkú mɛnɑɑ̀ bɛ̀ do ɔ̃ɔ̃ pɑ̃ dìì pɑ̃nnì Kuyie, nkɛ́yɔɔrɛ mɛ̀ɛ̀ nɑɑ̀ mmɛ di ĩ́nkɛ̀, dɛ kó dipɑ̃nnì do ɔ̃ ntú disɑ̃nni kó dipɑ̃nni ndi. Kɛ bɛnkú diyentɛ́bɑnni kó mudiì bɛ do ɔ̃ nyo mmù kɛ denniní Kuyie mbɛ̀ dɛɛtɛ́mɛ̀ Esibiti. Pɔɔri dɛ ntú ti ɔ̃ɔ̃ sɑ̃ntɛ Kuyie nkɛ́yɑ̃̀ fɛ̀ɛ̀ bòòfɛ̀. (Wéntɛ́ 1 Kɔdɛnti 10:16). kɛ kù sɑ̃ntí.
14 N yó ndɔɔrimu n dɔúnnɛ̀ yɛ̀ɛ̀ nɔ̀ Kuyie
n kɔbɛ bɛmɔu ììkɛ̀.
15 Ti Yiɛ̀ nKuyie nkɔbɛ kó mukṹṹ nku dò ndɛ̀mɑrɛ̀ diɛrɛ̀ ndɛ.
16 N Yiɛ̀ nKuyie n tú ɑ kóo tɔ̃ntì nwe,
kɛ̀ n yɔ̃ tú ɑ kóo tɔ̃ntì,
kɑ̀ɑ m pìtɛ́ iwɛ̃ĩ.
17 N yóó dɑ fíému iwũɔ̃ disɑ̃nni kpɛyi,
kɛ̀ n yu fɔ̃́ n Yiɛ̀ nKuyie ɑ yètìrì.
18 N yó ndɔɔrimu n dɔúnnɛ̀ yɛ̀ɛ̀ nɔ̀ n Yiɛ̀ nKuyie,
ku kɔbɛ bɛmɔu ììkɛ̀.
19 Ti Yiɛ̀ nKuyie ncĩ́ɛ̃̀tɛ̀ dɑ̀nkù miɛkɛ,
nɛ̀ Sedisɑdɛmmu ɛì miɛkɛ.
Nsɑ̃ntínɛ̀ ti Yiɛ̀ Kuyie!
*116:13 fɛbòòfɛ̀: Dɛ kó fɛbòòfɛ̀ bɛnkú mɛnɑɑ̀ bɛ̀ do ɔ̃ɔ̃ pɑ̃ dìì pɑ̃nnì Kuyie, nkɛ́yɔɔrɛ mɛ̀ɛ̀ nɑɑ̀ mmɛ di ĩ́nkɛ̀, dɛ kó dipɑ̃nnì do ɔ̃ ntú disɑ̃nni kó dipɑ̃nni ndi. Kɛ bɛnkú diyentɛ́bɑnni kó mudiì bɛ do ɔ̃ nyo mmù kɛ denniní Kuyie mbɛ̀ dɛɛtɛ́mɛ̀ Esibiti. Pɔɔri dɛ ntú ti ɔ̃ɔ̃ sɑ̃ntɛ Kuyie nkɛ́yɑ̃̀ fɛ̀ɛ̀ bòòfɛ̀. (Wéntɛ́ 1 Kɔdɛnti 10:16).