N Yiɛ̀ nKuyie nkéntɛ́ m bɑ́ɑmmìi,

ɑ tú timɔ́mmɔnti yiɛ̀ nwe,

kɛ dɔɔri ɑ bɛ́i ntì,

kéntɛ́ kɛ́keè n sɑ́útìi,

cɔutɛ́ m bɑ́ɑmmìi.

2 Bɑ́ɑ́ bekɛ́nɛ̀ mí nhɑ́ kóo tɔ̃ntì,

kɛ yɛ̃́ òmɔù í bomɛ̀ wèè bo yĩ́ ò í mɔkɛ mɛyetímɛ̀.

3 N dootitɔù weè m bɛ̀ti,

ò m bɔmmu kɛ nɑù,

ò n tɑnnɛ́ dibiìnnì miɛkɛ nkɛ,

kɛ̀ n sɑ̃̀ɑ̃́tɛ́nɛ̀ bɛ̀ɛ̀ duɔ́ kudɔnkù nɛ̀ dimɔ̀nnì.

4 Dɛ̀ m bimu n tɛ̃́nkɛ í nɔ nkɛ nɑmpú.

5 N kpɑɑ́ kɛ yɛ̃́mu yɛwe yɛ̀ɛ̀ pɛ̃ɛ̃tɛ́ yɛ kpɛ́í,

n kpɑɑ́ siɛmmumu mutɔ̃mmú ɑ do dɔɔri mù ĩ́nkɛ̀,

kɛ totí n yɛ̀mmɛ̀ ɑ dɔ̀ɔ̀ dɛ̀ ĩ́nkɛ̀.

6 N yuo n nɔu nsi kɛ dɑ bɑ́ɑ́,

n dònnɛ̀ kɛtenkɛ̀ kɛ̀ɛ dóntɛ́ kɛ̀nkɛ mɛniɛ.

7 N Yiɛ̀ nKuyie ncɑ̃rikɛ kɛ́cɔutɛ́ m bɑ́ɑmmìi,

dɛ̀ m bimu ɑ bɑ́ɑ́ m bútínnɛ́,

kɛ̀ mɛɛ̀ dɔkɛ m bo nɑɑ́nnɛ̀ bɛ̀ɛ̀ duɔ́ kudɔnkù.

8 Bɑ́ dìì kṹnweńnì ɑ n nɑ́kɛ́ ɑ kó mɛsɑ̀ɑ̀,

kɛ yɛ̃́ n yĩkúmɛ̀ fɔ̃́ɔ̃̀ ĩ́nkɛ̀,

m bɛnkɛ kucɛ n do nkɛ́tũnnɛ kù,

n duɔ́ nfɔ̃́ nwe mmɑ́ɑ̀.

9 N Yiɛ̀ nKuyie nhɑ́ n dɛɛtɛ́nɛ̀ n dootitɔbɛ̀,

n sɔri fɔ̃́ɔ̃̀ borɛ̀.

10 M bɛnkɛ kɛ̀ n nɑ kɛ́ndɔɔri ɑ dɔ́ dɛ̀,

kɛ́yɛ̃́ fɔ̃́ nKuyie nfɔ̃́ɔ̃̀ n temɛ̀,

ɑ kó Muyɑɑ́nsɑ̀ɑ̀mù n niitɛ́ kucɛ kùù ɛ̀ri.

11 N Yiɛ̀ nKuyie, dɛ́úkùnnɛ ɑ yètìrì, n fòùkùnnɛ,

ɑ tú timɔ́mmɔnti yiɛ̀ nwe,

n dennɛ mɛyɛǹcɑɑ̀rìmɛ̀ miɛkɛ.

12 A n dɔ́ mɛ̀ɛ̀ kpɛ́í, ɑ́ kuɔ n dootitɔbɛ̀,

ɑ bɑ́ɑ́ súɔ́ n dùɔ̀ntɔbɛ̀ kóò mɔù,

kɛ yɛ̃́ n túmɛ̀ ɑ kóo tɔ̃ntì nwe.