6
Kuyie mbɛnkɛmɛ̀ Sɑkɑrii sinɑɑsɛ̃ĩ́ sìnɑ̀ɑ̀
1 Kɛ̀ Kuyie nní mbɛnkɛ kɛ̀ n yɑ̀ sinɑɑsɛ̃ĩ́ sìnɑ̀ɑ̀ kɛ̀ sì yɛ̀tìní yɛtɑ̃rɛ̀ yɛ̀dɛ́ɛ̀ cuokɛ̀, kɛ̀ dɛ kó yɛtɑ̃rɛ̀ tu disɔɔwũɔ̃̀. 2 Kɛ̀ sisɛ̃ĩ́ siwũɔ̃sì dɛ̀ri tɛketitɛ̀ kɛ̀ sisɔ̀ùsì dɛ̀ri tɛdɛ́tɛ̀. 3 Kɛ̀ sipɛ́ísì dɛ̀ri tɛtɑ̃ɑ̃́ntɛ̀, kɛ̀ yɛyɔ̃̀rɛ̀ kpɛsi dɛri tɛdɛ́tɛ̀. 4 Kɛ̀ m bekɛ Kuyie ntɔ̃nnì dìì n nɑ̀ɑ́nnɛ̀ kɛ dɔ̀: N Yiɛ̀ diɛ mbɛnkú bɑ? 5 Kɛ̀ Kuyie ntɔ̃nnì n nɑ́kɛ́ kɛ dɔ̀: Bɛ̀ yɛ̀nní itemmɑ̀nkɛ ìnɑ̀ɑ̀ ndi, bɛ̀ bonní kɛtenkɛ̀ kɛmɔu yiɛ̀ mborɛ̀ ndɛ, kɛ bo kɛ itiní bɑ̀mbɑ̀.
6 Tɛnɑɑsɑ̃ntɛ̀ sisɛ̃ĩ́ sɔ̀ùsì dɛ̀ri tɛ̀ kɔ̀ri kubɑkù yoú bíɛ́kɛ̀ nkɛ, kɛ̀ sipíɛ́ tɛ̀ tũ̀ nkɛ̀ yɛyɔ̃̀rɛ̀ kpɛsii kétɛ́ kubɑkù cɑ̃̀nku bíɛ́kɛ̀. 7 Kɛ̀ siwũɔ̃sìi kétɛ́ kɛ́ncɑtiri kɛ dɔ́ mɛcɑ̃ɑ̃, nkɛ bo ce nkutenkù, kɛ̀ Kuyie ndɔ̀: Kɔtɛnɛ̀ kɛ́ce nkutenkù.
Kɛ̀ sìi cokɛ́ kɛ́kɔtɛ kɛ́ kù ce. 8 Kɛ̀ kù m bekɛ kɛ dɔ̀: A wúó nsìì mɛ nkérí kubɑkù yoú bíɛ́kɑ̀ɑ̀? Sì yóó cṹũnko n Yɑɑ́ mmu dɛ kó kutempɛ̃ mmiɛkɛ.
Kuyie nnɑ̀kɛ́mɛ̀ kù yóó dɛ́úkùnnɛmɛ̀ ikuɔ́ nìùtì Sosuwee
9 Kɛ̀ Kuyie nní mbɛ́innɛ̀ kɛ dɔ̀: 10 Yíe nhɑ́ kɔtɛ Sefɑnniyɑ birɛ Sosiɑsi cĩ́ɛ̃̀tɛ̀ bɛ̀ɛ̀ ìtɛ́ Bɑbidɔnni kɛ konní bɛ̀ dɛ mbo, kɑ̀ɑ cɔutɛ́ Edidɑii nɛ̀ Tobiyɑ nɛ̀ Yedɑyɑ bɛ borɛ̀, bɛ̀ m pɑ̃ní yɛ̀ɛ̀ pɑ̃rɛ̀. 11 Kɑ̀ɑ yɛ̀ cɔutɛ́ ɑ túótɛ́ timɑ́tì pɛ́ítì nɛ̀ mɛsɔɔ nkɛ́dɔɔ̀ dikpɑ̀ɑ̀tìpìì, kɛ́ dì òó nYotisɑdɑki birɛ Sosuwee ikuɔ́ nìùtì diɛwè. 12 Kɑ̀ɑ dèè ɑ ò nɑ̀kɛ́ kɛ dɔ̀: Mí ndi Yiɛ̀ nKuyie Mpɑkɛdɑɑ míì tu:
Wèè yètìrì tu kuye * kuye: Kuye bɛ̀ nɑ̀ɑ́ nkùù kpɛ́í ndiɛ mbɛ̀ yɛ̃ nYesu nwe, odɛɛtíwè. Wéntɛ́ Esɑii 4:2. weè yɛ̀tìní,
weè yóó mɑɑ́ mí ndi Yiɛ̀ nKuyie n cĩ́ɛ̃̀tɛ̀.
13 Weè yóó tɛ̀ mɑɑ́ kɛ́ntú okpɑ̀ɑ̀tì diɛwè
kɛ́nkɑri okpɑ̀ɑ̀tìkɑ̀rì ĩ́nkɛ̀
kɛ bɑkɛ́ o nìtìbɛ̀ kɛ̀ ikuɔ́ nìùtì nkɑri o bɑkù yoú,
kɛ̀ kunɑɑtí diɛkù mbo bɛdɛ́ bɛ cuokɛ̀.
14 Kɛ̀ dikpɑ̀ɑ̀tìpìì dii, dì yó mbo n cĩ́ɛ̃̀tɛ̀ miɛkɛ nkɛ, kɛ̀ di denniní Edidɑii nɛ̀ Tobiyɑ nɛ̀ Yedɑyɑ nɛ̀ Sefɑnniyɑ birɛ bɛ̀ n dɔ̀ɔ̀ dìì wɛ̀ì.
15 Dɛ mɔ̀nnì bɛ̀ɛ̀ bo mɛdɛ́timɛ̀ bɛ̀ bo kɔtɛní kɛ́mɑɑ́ Kuyie ncĩ́ɛ̃̀tɛ̀ kɛ̀ di bɑntɛ́ Kuyie Mpɑkɛdɑɑ weè n tɔ̃nnímɛ̀ di borɛ̀.
Kɛ̀ di yie ndi Yiɛ̀ nKuyie nkó mɛtɑmmɛ̀ dɛ̀ yóó dɔɔ̀mu nweti weti.