1 Nǫǫdea naxıts'eɂį̀-le t'à gogha dìì agòjà t'à kǫ̀godeè Athens ekǫ ts'eèhkw'e kò ts'ı̨ı̨wǫ ı̨lè. 2 Gòet'ı̨ Tımothy, Nǫ̀htsı̨ gha eghàlaedaa eyıts'ǫ goxè Zezì-Krı wegodıì nezı̨ı̨ k'eɂaa sìı naxınì nàtsoò ayele ha, eyıts'ǫ denahk'e naxıgha ehkw'ı-ahodı gha naxıts'ǫ̀ wets'ı̨ı̨hɂà hǫt'e. 3 Hanì-ı̨dè hoìla naxıxè k'ehokw'o kò, weghǫ nànıahdè-le eyıts'ǫ naxıgha gots'eèdı welè-le. Dats'ı̨ı̨ɂa ha Nǫ̀htsı̨ goghàhòı̨ɂǫǫ sìı wek'èahsǫ hǫt'e. 4 Naxıxè ts'eèhkw'e ekò dànì dǫ dagogį̀ı̨hɂa ha eyı ghǫ t'aats'ǫǫ̀ naxıts'ǫ̀ gots'ı̨ı̨de ı̨lè. Hotıì hanì goxè hòɂǫǫ̀ agòjà wek'èahsǫ hǫt'e. 5 Eyı ts'ıhɂǫ̀ sıì naxıghǫ nànıhwho t'à, Tımothy naxıts'ǫ̀ wııhɂà hǫt'e. Ayìı naxıgha ehkw'ı-ahodıı sìı asį̀į̀ ı̨łaà wet'à nàahtso, wek'èehsǫ ha dehwhǫ t'à awèhłà. Edahxǫ t'asìı t'à wehłı̨ı̨ naxeèhdzà ha sǫnı dehwhǫ t'à, eyıts'ǫ dànì naxıgha hòtł'ò eghàlats'ı̨ı̨dàa sìı ekìı k'ètł'ǫ̀ ade ha sǫnı dehwhǫ t'à sıì naxıghǫ nànıhwho ı̨lè.

6 Hanìkò dıìhk'ǫ̀ą Tımothy naxıta gots'ǫ nǫ̀ǫtła, dànì ełeghǫnıahtǫ xè ı̨łaà naxıgha ehkw'ı-ahodıı sìı ghǫ godı nezı̨ı̨ gots'ǫ̀ naı̨ɂǫ. T'aats'ǫǫ̀ hoı̨zı̨ k'ę̀ę̀ gonaahdì, eyıts'ǫ dànì naxıts'eɂį̀ ha ts'ı̨ı̨wǫ k'ę̀ę̀ goahɂį̀ ha dahwhǫ, gòhdı. 7 Eyıt'à sèot'ı̨ı̨, jǫ goxè hoìla k'ehokw'o eyıts'ǫ dǫ dagogį̀ı̨hɂa kò, ı̨łaà naxıgha ehkw'ı-ahodı ghǫ ts'ıìkw'o t'à godzeè nàtsoò aahłà hǫt'e. 8 Gots'ǫ̀ K'àowo weghǫ naxınì nàtso t'à sıì goxè sìghà hòɂǫǫ̀ agòjà. 9 Naxıts'ıhɂǫ̀ Nǫ̀htsı̨ wenadąą̀ sıì goınà t'à Nǫ̀htsı̨ sıì masì wets'ı̨ı̨hwhǫ hǫt'e. 10 K'achı̨ naxıts'eɂį̀ ha ts'ı̨ı̨wǫ t'à godzeè t'à dzęę̀, toò, ehk'ę̀ę̀ hòtł'ò naxıgha yats'ehtı hǫt'e. Deghàà naxıgha ehkw'ı-ahodıì ade gha naxıts'àts'edı ha ts'ı̨ı̨wǫ.

11 Naxıts'àts'edè gha Nǫ̀htsı̨-Gotà eyıts'ǫ gots'ǫ̀ K'àowo Zezì-Krı gogha ts'atà naxıts'ǫ̀ goòɂà agııle. 12 Goxı̨ dànì sıì naxıghǫnets'eètǫ k'ę̀ę̀ gots'ǫ̀ K'àowo deɂǫ̀ǫ̀ ełeghǫnıahtǫ eyıts'ǫ dǫ hazǫǫ̀ deɂǫ̀ǫ̀ gıghǫnıahtǫ anaxııle. 13 Nǫ̀htsı̨ naxıdzeè nàtsoò ayııle, hanì-ı̨dè naxık'e nìdahoet'à ha-le, eyıts'ǫ gots'ǫ̀ K'àowo Zezì-Krı edets'ǫ dǫ degaı hazǫǫ̀ xè jǫ ts'ǫ̀ anajà nı̨dè, Nǫ̀htsı̨-Gotà wenadąą̀ nàahza xè degaı laaht'e ha.