1 Yaazea ezhı̨ne k'ę̀ę̀ naxıts'ǫ̀ eehtł'è sǫnı kò hotıì seàhkw'ǫ ha naxeehwhǫ. Hòt'a seàhkw'ǫ wek'èehsǫ. 2 Nǫ̀htsı̨ wınì k'ę̀ę̀ hotıì naxıxoehdı hǫt'e. T'eeko wetà dǫzhìı ghàyı̨ı̨htı̨ lanì Zezì-Krı ghànaxèehtè ha dehwhǫ. T'eekogòò lanì weghànaxèehtè ha dehwhǫ. 3 Hanìkò Eve gòocho yeghǫyaàɂǫ xèht'eè naxı̨ sı naxıghǫyaeɂà aweahłe ha sǫnı dehwhǫ t'à naxıghǫ dehjı̨. Naxıdzeè t'à Zezì-Krı ghàdeahtı̨ ı̨lèe sìı eyı ch'à naxınì ekǫ-le ayele ha sǫnı. 4 Dǫ ładı̨ı̨ naxıts'ǫ̀ nììtła gà Zezì eyıì-le ghǫ hoghànaxeehtǫ nı̨dè naxıgha t'asanìle. Yedàyeh Nezı̨ı̨ naxıghǫ̀t'ǫǫ sìı wedę ı̨nì eładı̨ı̨ naxıgha ehkw'ı-ahodı nı̨dè, hanì-le-ı̨dè godı nezı̨ı̨ naxıghǫ̀t'ǫǫ sìı wedę godı eładı̨ı̨ naxıgha ehkw'ı-ahodı nı̨dè, nàhotì-le gıyatıì ààhchı hǫt'e. 5 Eyı “Nǫ̀htsı̨ deɂǫ̀ǫ̀ wecheekeèdeè” ats'ı̨ı̨t'e edegeewǫǫ sìı gık'aɂį̀ aht'e edeehwhǫ nıìle. 6 Dǫ ts'ǫ̀ gohde gha nezı̨į̀ gohde aht'e-le kò, Nǫ̀htsı̨ ts'ǫǫ̀hk'e t'asìı k'èehsǫ hǫt'e. T'asìı łǫ hats'ı̨ı̨làa sìı eyı ghàà nezı̨į̀ wek'èahsǫǫ̀ anaxets'į̀į̀là hǫt'e.

7 Naxıgha sìghà ha t'à k'èeweèt'ı̨ k'ę̀ę̀ adèhłà, eyıts'ǫ t'asìı k'èxa-le Nǫ̀htsı̨ wegodıì nezı̨ı̨ t'à naxıts'ǫ̀ gohde t'à hołı̨ı̨ hòwhıhtsı̨ nì? 8 Nǫ̀htsı̨ wecheekeè kǫ̀ta eyıì-le nàgedèe sìı sǫǫ̀mba seghàgele t'à naxıgha eghàlaehda hǫt'e. Eyıt'à gısǫǫ̀mbaà gıghǫ dehɂį̀ lanì. 9 Naxıta aeht'è ekò, t'asìı segha whìle kò t'asìı naxeehkè t'à naxıgha hoezhì ahłà whìle. Nǫ̀htsı̨ wets'ǫ dǫ Macedonıa nèk'e gots'ǫ nègı̨ı̨dee sìı ayìı segha whìle sìı seghàgı̨ı̨la hǫt'e. Sets'àahdı t'à naxıgha t'asìı whìle ha dehwhǫ-le, ı̨łaà naxıts'ǫ̀ hanì ehda ha dehwhǫ hǫt'e. 10 Zezì-Krı wenàowoò ehkw'ıı sedzeè yìı wheɂǫ dahxà dıı hanaxèehsı̨: Dǫ wı̨ı̨zìı Achaıa nèk'e gots'ǫ hanì edeghǫ xàdahohdì ch'à asele ha nıìle. 11 Dànìghǫ sets'àahdı ha naxeehwhǫ-le dahwhǫ sǫnaà? Naxıghǫneehtǫ-le t'à aht'e nıìle. Dànì naxıghǫneehtǫǫ sìı Nǫ̀htsı̨ yek'èezǫ hǫt'e! 12 Hanì eghàlaehdaa sìı ı̨łaà hanì eghàlaehda ha hǫt'e. Hanì-ı̨dè dǫ edeghǫ xàdahogedì eyıts'ǫ goxèht'eè eghàlageeda gedıì k'ehogeɂaa sìı haget'ı̨ gha hòɂǫ-le agehłe ha.

13 Hanıı dǫ sìı ehkw'ı dǫ hoghàgogeehtǫ nıìle, eghǫyageeɂàa-dǫǫ̀ agı̨ı̨t'e, Zezì-Krı wecheekeèdeè edegeetsı̨ hǫt'e. 14-15 Eyı haget'ı̨ı̨ sìı gogha enıìyah nıìle, wehłı̨ı̨ ededı̨ kò yak'eet'ı̨į̀ degaı edeetsı̨ hǫt'e. Eyıt'à dǫ wehłı̨ı̨ gha eghàlageedaa sìı ededı̨ sı ehkw'ı eghàlageeda laget'ı̨. Nǫǫde nı̨dè dànì eghàlagı̨ı̨dà k'ę̀ę̀ gıghàhòt'à ha.

16 K'achı̨ haehsı̨ ha: Dǫ wı̨ı̨zìı gǫǫzǫ-le aht'e sı̨ı̨hwhǫ welè sǫ̀ǫ̀. Hanì nànıahdè nı̨dè dǫ gǫǫzǫ-le gode lanì seàhkw'ǫ, hanì-ı̨dè yaazea xàdahohdì ha dìì-le. 17 Hanì edeghǫ xàdahohdì gohdee sìı dǫ gǫǫzǫ-le laehsı̨ hǫt'e. Gots'ǫ̀ K'àowo dànì gode ha sìı k'ę̀ę̀ gohde nıìle. 18 Hanìkò dǫ łǫ dıı nèk'e dǫ k'ę̀ę̀ edeghǫ xàdahogedì gogede t'à, sı̨ sı edeghǫ xàdahohdì ha dìì-le. 19 Sıì goahsǫ t'à dǫ gogı̨ı̨zǫ-le sìı gıahkw'ǫ ha naxınà. 20 Dǫ t'ahoòyį̀ı̨ naxıts'ǫ̀ k'ahogedè, hanì-le-ı̨dè naxıghǫ egeeɂį̀ı̨, naxıt'à edegha sìghà hogehtsı̨, eyıts'ǫ naxınahk'e dǫ nechàa edegeetsı̨, tsį̀naxegeekà kò, hanì naxıts'ǫ̀ eghàlageeda kò naxıgha t'asanìle. 21 Goxı̨ hanì k'ehots'eɂa gha nàts'etso-le dehsı̨ı̨ sìı weghǫ į̀į̀zhats'ı̨ı̨lı̨ ha nì?

Dǫ gǫǫzǫ-le laehsı̨ kò, dǫ ayìı ghǫ xàdahogedìı sìı sı̨ sı eyı xèht'eè haehsı̨ ha dìì-le hǫt'e. 22 Hebrew got'ı̨į̀ agı̨ı̨t'e ghǫ xàdahogedì nı̨dè sı̨ sı Hebrew got'ı̨į̀ aht'e. Israel got'ı̨į̀ agı̨ı̨t'e nì? Sı̨ sı Israel got'ı̨į̀ aht'e. Abraham wets'ıhɂǫ̀ǫ-dǫǫ̀ agı̨ı̨t'e nì? Sı̨ sı Abraham wets'ıhɂǫ̀ǫ-dǫǫ̀ aht'e hǫt'e. 23 Zezì-Krı wecheekeè agı̨ı̨t'e nì? Sı̨ gınahk'e wecheekeèdeè aht'e. (Sıì ezhı̨ne k'ę̀ę̀ gohde laehsı̨.) Gınahk'e hòtł'ò eghàlaıhdà, gınahk'e dǫ-danìı̨laa-kǫ̀ ıhdà, gınahk'e nàsegı̨ı̨hkwa, eyıts'ǫ gınahk'e gǫı̨tłǫǫ̀ ełaıhwho-t'e. 24 Israel got'ı̨į̀ sı̨làı-eht'aà taènǫ-daats'ǫ̀-łǫǫ̀tǫ nàsegı̨ı̨hkwa hǫt'e. 25 Taà-eht'aà dechı̨ t'à sekwǫ̀ǫyaà-segį̀į̀là, ı̨łàà kwe t'à segııhdè ı̨lè, taà-eht'aà nı̨hts'ı nàtso t'à sexè elàcho wetaı̨tǫ̀, ı̨łè toò eyıts'ǫ ı̨łè dzęę̀ gots'ǫ̀ tıdeè k'e daehłe ı̨lè. 26 T'aats'ǫǫ̀ t'asį̀ı̨ sek'eèhoowo. Deh nàtso t'à sexè hoejı̨ k'ehokw'o, dǫjıı ch'à sexè hoejı̨ k'ehokw'o, xàè sèot'ı̨ sı ch'à sexè hoejı̨ k'ehokw'o, dǫ ładı̨ı̨ ch'à sexè hoejı̨ k'ehokw'o, kǫ̀godeè nı sexè hoejı̨ k'ehokw'o, whatsǫǫ̀ gòɂǫǫ nı sexè hoejı̨ k'ehokw'o, tıdeè k'e sexè hoejı̨ k'ehokw'o, eyıts'ǫ dǫ gòet'ı̨ edegeetsı̨ t'à sexè hoejı̨ k'ehokw'o. 27 T'aats'ǫǫ̀ hòtł'ò eghàlaehda xè gǫı̨tłǫǫ̀ ıhtè-le. Bò dę xè tı dę aeht'è, eyıts'ǫ goht'ǫ dę aeht'è xè segha edza ı̨lè. 28 Eyı hazǫǫ̀ wedę, dzę taàt'eè Nǫ̀htsı̨ wecheekeè kǫ̀ta yàgòlaa nı nàgedèe sìı gıghǫ hòtł'ò nànıhwho hǫt'e. 29 Dǫ nàtso-le nı̨dè sı̨ sı wexè nàhtso-le hǫt'e. Dǫ hołı̨ı̨ hòèhtsı̨į̀ adlà nı̨dè sıì segha hoìla hǫt'e.

30 Edeghǫ xàdahohdì gohde ha nı̨dè ayìı wet'à nàhtso-le sìı eyı ghǫ xàdahohdì ha hǫt'e. 31 Nǫ̀htsı̨, gots'ǫ̀ K'àowo Zezì Wetà, welǫ whìle ts'ǫ̀ weghàsǫts'eedıı sìı hohts'ì gohde nıìle yek'èezǫ hǫt'e. 32 Kǫ̀godeè Damaskus whıhda ekò, k'àowo ı̨łè, k'àowocho Aretas gha k'àowo elı̨ı̨ sìı, dasegeechı ha nıwǫ t'à kǫ̀godeè hazǫǫ̀ hogııhdì agǫ̀ǫ̀là ı̨lè. 33 Hanìkò dǫ mǫ̀hdaa sets'àgı̨ı̨dìı t'à tł'ohtǫ nechàa yìı segıachì gà kǫ̀ta edzak'è gots'ǫ hodàsegeèlì. Hanì wech'à kwı̨èhsa t'à dasegıachì-le.