1 Zezì-Krı t'asìı wı̨ı̨zìı t'à dagoetł'ı̨ ha-le nıwǫ t'à edaxàgoı̨la hǫt'e. Eyıt'à naxınì nàtsoò aahłe, k'achı̨ dıı nek'e ts'ǫ t'asìı wı̨ı̨zìı naxıts'ǫ̀ k'àowo welè-le, eyı wet'à edegha hoìla hoahtsı̨-le.

2 Hotıì seàhkw'ǫ, sı̨ Paul naxıts'ǫ̀ dıı haehsı̨: Moses wenàowoò k'ę̀ę̀ naxıkwǫ̀ nàt'à adèahłà nı̨dè Zezì-Krı naxıgha wet'àaɂà-le dahdı hǫt'e. 3 Eyı nàowo k'ę̀ę̀ dǫzhìı hazǫǫ̀ gıkwǫ̀ nàt'à adegį̀į̀làa sìı k'achı̨ gıts'ǫ̀ dıı haehsı̨ ha: Haaht'ı̨ nı̨dè Moses wenàowoò hazǫǫ̀ deghàà wek'èaht'e ha hǫt'e. 4 Eyı nàowo t'à ehkw'ıì aahde ha dahwhǫ nı̨dè Zezì-Krı wexè aaht'e-le aahjà, eyıts'ǫ wesǫnıwǫ ts'ǫǫ̀ nıwà aahjà. 5 Hanìkò Zezì-Krı gogha ehkw'ı-ahodı nı̨dè wets'ǫ Įnì Degaı goxè wehòhɂǫ hǫt'e eyıts'ǫ deghàà ehkw'ıì ats'ede ha wek'èts'eezǫ. Hotıì eyı dzęę̀ danats'eèhɂı̨ hǫt'e. 6 Zezì-Krı gogha ehkw'ı-ahodı nı̨dè nàgoet'àa, nàgoet'à-le, ehk'ę̀ę̀ gogha wet'àaɂà-le. Edaxàts'eedè ha, gogha ehkw'ı-ahodıı eyı zǫ gogha wet'àaɂà hǫt'e, eyıts'ǫ ełeghǫnets'eètǫ sìı dǫ yek'èezǫ ats'ehɂı̨ hǫt'e.

7 Zezì-Krı naxıgha ehkw'ı-ahodı t'à nezı̨į̀ aaht'ı̨ ı̨lè. Amìı naxıts'ǫk'eetła xè nàowo ehkw'ıı k'èaht'e ch'à anaxį̀į̀là? 8 Amìı naxıkayaı̨htıı sìı nàowo ehkw'ıı ts'ǫǫ̀ aahdeè anaxele ha nıìle. 9 Ekǫ-le hoghàgoètǫ nı̨dè wet'à dàgot'ı̨ı̨ sìı wek'èahsǫ hǫt'e: “Łèt'èa łǫ-lea zǫ kò łètsı̨èhdıı ta ats'ehɂı̨ nı̨dè hazǫǫ̀ weta-ts'ǫ̀ at'į̀ hǫt'e,” ts'edı. 10 Gots'ǫ̀ K'àowo wets'ıhɂǫ̀ sexèht'eè nànıahdè ha hotıì wek'èehsǫ. Amìı naxıxè hok'èedzǫ-le nèhòı̨ɂǫǫ sìı eyı k'èxa Nǫ̀htsı̨ nàyeehkwa ha hǫt'e. 11 Sèot'ı̨ı̨, Moses wenàowoò k'ę̀ę̀ nàgoet'àa ghǫ dǫ hoghàehtǫ nı̨dè dànìghǫ ı̨łaà dasegį̀ı̨hɂa? Sı̨ hanì dǫ hoghàehtǫ nı̨dè, Zezì-Krı dechı̨et'aa k'e ełaı̨wo ghǫ gohde t'à gık'èch'a aehsı̨ ha-le ı̨lè. 12 Eyı dǫ hoìla hogehtsı̨ı̨ sìı Moses wenàowoò k'ę̀ę̀ gıkwǫ̀ nàat'à ghǫ hòtł'ò agı̨ı̨wǫ nı̨dè gıkwǫ̀ hǫt'ıì xàat'à adegį̀į̀là nı̨dè nezı̨ ha, hanì-ı̨dè dǫzhìı gı̨ı̨lı̨-le agede ha.

13 Sèot'ı̨ı̨, nàowo hanıı naxıts'ǫ̀ k'àowo ha-le gha Nǫ̀htsı̨ naxıkayaı̨htı hǫt'e. Hòt'a eyı nàowo tł'a dahkw'e-le aahjà t'à naxınìłı̨ı̨ k'ę̀ę̀ aahdaà adeahłe-le. Į̀le, ełeghǫnıahtǫ xè ełets'àahdı k'ę̀ę̀ aahda. 14 Eyı nàowo hǫt'ıì sìı nàowo ı̨łè ghǫ godeè-adı hǫt'e, eyı sìı dıı hǫt'e, “Edeghǫnıahtǫ k'ę̀ę̀ naxèot'ı̨ gıghǫnıahtǫ,” dek'eèhtł'è. 15 K'èdaà ełek'èch'a goahde xè ełets'ǫ̀ yıdaaht'e nı̨dè ełedıhoahtsı̨ ha hǫt'e.

16 Eyıt'à, Yedàyeh Nezı̨ı̨ dahxà aahda ha naxèehsı̨. Haaht'e nı̨dè naxınìłı̨ı̨ t'anıwǫ k'ę̀ę̀ aahda ha nıìle. 17 Gonìłı̨ı̨ sìı Yedàyeh Nezı̨ı̨ k'èch'a anıwǫ hǫt'e eyıts'ǫ Yedàyeh Nezı̨ı̨ sìı gonìłı̨ı̨ k'èch'a anıwǫ hǫt'e. Ełek'èch'a agı̨ı̨wǫ t'à ayìı dàahłe ha dahwhǫǫ sìı haahłe ha dìì hǫt'e. 18 Hanìkò Yedàyeh Nezı̨ı̨ k'enaxehɂı̨ nı̨dè, Moses wenàowoò tł'a dahkw'e nıìle.

19 Gonìłı̨ı̨ k'ę̀ę̀ dànì k'ehots'eɂaa sìı hazǫǫ̀ wek'èts'eezǫ: gozhį̀į̀ t'à hołı̨ı̨ hazǫǫ̀ xàɂaa k'alats'edèe; 20 nǫ̀htsı̨ hòèlı̨ı̨ ts'ǫ̀ yats'ehtıı, ı̨k'ǫǫ̀ k'alats'edèe; ełedzats'ı̨ı̨hwhǫǫ, ełek'èch'a ts'eedaa, ełeghǫ ts'ohots'eedıı, goınì nàìtłoo, dǫ nahk'e ts'ı̨ı̨lı̨ ts'ı̨ı̨wǫǫ, ełek'èch'a eghàlats'eedaa, 21 dǫ ayìı gıts'ǫ sìı wets'ı̨ı̨wǫǫ; jìetì ts'eedèe, deɂǫ̀ǫ̀ gogha sìgoèt'ı̨ t'à ts'ıɂǫ̀-hots'eeɂà. Eyı hazǫǫ̀ gonìłı̨ı̨ k'ę̀ę̀ ats'et'ı̨ hǫt'e. Hanì aahda-le naxèehsı̨ ı̨lè k'achı̨ hanaxèehsı̨ ha: Dǫ hanì geedaa sìı Nǫ̀htsı̨ wenàowoò k'ę̀ę̀ hòɂǫǫ sìı goyageedè ha nıìle.

22 Ekò Yedàyeh Nezı̨ı̨ t'à ts'eeda nı̨dè, dıı hanì nezı̨į̀ k'ehots'eɂa ha: ełeghǫnets'eètǫǫ, goınàa, ts'èwhı̨ ts'ı̨ı̨wǫǫ, ełexè ts'èwhı̨į̀ hots'ehɂǫǫ, etełets'eèɂı̨ı̨, ełets'ǫ̀ dǫ nezı̨ı̨ ts'ı̨ı̨lı̨ı̨, ełets'ǫ̀ ehkw'ı ts'eedaa, 23 ełets'ǫ̀ godzeè nezı̨ı̨, eyıts'ǫ hołı̨ı̨ nàowoò ch'à edek'èts'edì. Eyı hanıı wets'àet'ǫ gha nàowo gǫ̀hłı̨ nıìle. 24 Amìı Zezì-Krı wets'ǫ agı̨ı̨t'ee sìı edenàowoò eyıts'ǫ edekwǫ̀ t'à hołı̨ı̨ k'ę̀ę̀ eghàlageeda ha gı̨ı̨wǫǫ sìı eyı hazǫǫ̀ dechı̨et'aa k'e wedıìtsò agį̀į̀là hǫt'e. 25 Yedàyeh Nezı̨ı̨ k'ę̀ę̀ ts'eeda nı̨dè Yedàyeh Nezı̨ı̨ dànıwǫǫ sìı wek'èats'ııt'è. 26 Eyıt'à xàhots'ııdì-le, ełets'ǫ̀ yıdats'ııt'è-le, eyıts'ǫ ełeghǫ ts'ohots'ııdì-le.