1 Dǫ łǫ gıgha ehkw'ı-ahodıı k'ę̀ę̀ gı̨ı̨dàa sìı gomǫǫ̀ goòɂà ts'ǫ̀ geèhkw'e lanì, eyıt'à t'asìı hazǫǫ̀ wet'à goınì nàtso-le sìı wedę ats'ııle. Goınì nàtso-le t'à nàhotì-le gohołı̨į̀ godaèht'è, eyıt'à Nǫ̀htsı̨ wenàowoò k'ę̀ę̀ ts'eeda gha goınì nàtso ats'ı̨ı̨hwhǫ ha hǫt'e. 2 Zezì zǫ wedaànıts'ııdè, ededı̨ sìı Nǫ̀htsı̨ gogha ehkw'ı-ahodıı yexèhoį̀hwho hǫt'e, eyıts'ǫ ededı̨ nǫǫde ts'ǫ̀ deghàà gogha ehkw'ı-ahodıì agole ha hǫt'e. Ededı̨ ı̨daà nı̨dè wınà agode ha yek'èezǫ t'à dechı̨et'aa k'e dàı̨ɂàa sìı yeghǫ į̀į̀zhawhelı̨-le. Eyı tł'axǫǫ̀ Nǫ̀htsı̨ t'asìı hazǫǫ̀ gha K'àowocho elı̨ı̨ sìı yegà nàgòts'ehnèe wheda. 3 Hołı̨ı̨-hogehtsı̨ı̨-dǫǫ̀ gıtł'aà dàhòtł'ò daı̨ɂàa xè sıì gık'èch'a eghàlagı̨ı̨dàa sìı wedaànıahdè, hanì-ı̨dè weghǫ nìahtsį̀ ha-le eyıts'ǫ naxınì nàtso-le ade ha-le.

4 Hołı̨ı̨ nàowoò ch'à nàhǫhoahdè kò ı̨łaà naxıdoò xàı̨tł'ı ts'ǫ̀ aahjà nıìle. 5 Nǫ̀htsı̨ edeza k'ę̀ę̀ naxıızì t'à naxıdzeè nàtsoò ayį̀į̀làa sìı wenaahdì-le nì? Dıı hanaxèhdı ı̨lè:

7 Naxıgha hoìla nı̨dè wexè ts'èwhı̨į̀ daahɂa, weghàà hoghànaxeetǫ hǫt'e, Nǫ̀htsı̨ sìı edeza k'ę̀ę̀ naxıts'ǫ̀ eghàlaeda hǫt'e. Dǫ weza gǫ̀hłı̨ nı̨dè ehkw'ı geeda gha hoghàgoehtǫ hǫt'e. 8 (Nǫ̀htsı̨ edeza hazǫǫ̀ hołı̨ı̨ hogehtsı̨ ch'à hoghàgoehtǫ hǫt'e.) Nǫ̀htsı̨ hanì hoghànaxeehtǫ-le nı̨dè, xàè weza k'ę̀ę̀ naxııtà nıìle, tsı̨hkǫ gǫǫza laaht'e. 9 Goxı̨ hazǫǫ̀ gotà ehkw'ı ts'eeda gha hoghàgogeèhtǫ ı̨lè t'à dǫ gıts'ı̨ı̨hwhǫ ı̨lè. Eyıt'à Nǫ̀htsı̨ gots'ǫ ı̨nì gha Gotà elı̨ı̨ sìı hoghàgoetǫ nı̨dè denahk'e wek'èats'ı̨ı̨t'e ha hǫt'e. Hanì-ı̨dè welǫ whìle ts'ǫ̀ ts'eeda ha. 10 Gotà gı̨ı̨lı̨ı̨ sìı dànì gıgha ehkw'ıı sìı k'ę̀ę̀ whaà-lea gots'ǫ̀ zǫ hoghàgogeehtǫ hǫt'e. Hanìkò Nǫ̀htsı̨ sìı goxè hoı̨zı̨į̀ hòɂǫ gha hoghàgoetǫ hǫt'e, hanì-ı̨dè dànì degaı elı̨ı̨ sìı wexèht'eè ats'ede ha. 11 Nǫ̀htsı̨ hołı̨ı̨ hots'ehtsı̨ ch'à hoghàgoehtǫ nı̨dè gogha nezı̨-le xè gogha dìì hǫt'e. Hanìkò nǫǫde-ı̨dè wet'à ehkw'ı ts'eedaà ats'et'į̀, eyıts'ǫ weghàdets'eetǫ nı̨dè goxè sìghà hòɂǫ agot'į̀ hǫt'e.

12 Eyıt'à naxınì nàtso-le sìı k'achı̨ nàtsoò aahłe. 13 “Naxıkè gha tı̨lı ehkw'ı nııɂà aahłe,” hanì-ı̨dè amìı wekw'ǫǫ̀ nàtso-le sìı denahk'e nàtso-le ade ha-le, hanìkò k'aàt'ıì ade ha.

14 Dǫ hazǫǫ̀ xè ts'èwhı̨į̀ aahda, eyıts'ǫ nàowo degaı k'ę̀ę̀ aahda gha hòtł'ò eghàlaahda. Dǫ wı̨ı̨zìı nàowo degaı k'ę̀ę̀ eda lenǫsıı gots'ǫ̀ K'àowo eɂį̀ ha nıìle. 15 Dǫ wı̨ı̨zìı Nǫ̀htsı̨ wesǫnıwǫ wedę ayııle sǫ̀ǫ̀ eyıts'ǫ ełedzaahwhǫ ch'à naxınì nàtsoò aahłe. Hanì-le-ı̨dè naxıxè hoìla agode ha eyıts'ǫ dǫ łǫ ehkw'ı geeda-le agede ha. 16 Naxıta dǫ wı̨ı̨zìı hołı̨ı̨ k'ę̀ę̀ ełek'alagııdè sǫ̀ǫ̀, hanì-le-ı̨dè Esau lanì Nǫ̀htsı̨ nàowoò gıgha wet'àaɂà-le lagııt'è sǫ̀ǫ̀. Esau wetà weza ǫhdaà ı̨lèe t'à wetà wets'ǫ t'asìı denahk'e wet'àaɂàa sìı wets'ǫ̀ ade ha ı̨lè, hanìkò ı̨łàà yeghǫ shètı̨ k'èxa wechı ts'ǫ̀ weghǫ nàedì ı̨lè. 17 Sìghaı̨waà tł'axǫǫ̀ goza ǫhdaà elı̨ı̨ k'ę̀ę̀ wetà yek'eèyahtı ha nıwǫ ı̨lè, hanìkò wetà hayele ha dìì, wek'èahsǫ hǫt'e. Esau sıì hòtł'ò yeghǫ ı̨tsè kò, wetà wınì eładı̨į̀ ayele ha whį̀ayį̀į̀là.

18 Israel got'ı̨į̀ ayìı ts'ǫ̀ nègı̨ı̨dee sìı eyı nahk'e t'asìı nechàa ghǫ nìahde hǫt'e. Shìh nechàa dageechı ha dìì-le sìı ts'ǫ̀ nègı̨ı̨de. Eyı shìh kǫ̀ nàtsoo t'à dèk'ǫ̀, eyıts'ǫ wek'e togoòtł'ò, k'oh łǫ eyıts'ǫ nı̨hts'ı nàtsoo t'à gıgha hoejı̨ ı̨lè. 19 Israel got'ı̨į̀ sìı dechı̨shì hòtł'ò dedı gıìkw'o, eyıts'ǫ Nǫ̀htsı̨ gots'ǫ̀ hòtł'ò gode t'à, geejı̨į̀ agejà, hagedı, “K'achı̨ gots'ǫ̀ xàyawehtı-le,” gedıì nàdageetì ı̨lè. 20 Nǫ̀htsı̨ nàowo goghàı̨ɂǫǫ sìı geèhkw'ǫ ha gıgha dìì t'à agedı ı̨lè. Dıı nàowo sìı gıghǫ̀t'ǫ: “Tıts'aàdìı kò eyı shìh gà nıwà-le ajà xè yexèhdı nı̨dè kwe t'à ełaàgıìhwhı ha hǫt'e.” 21 Gıxè hanàhòwo ts'ıhɂǫ̀ sıì geèhyeh t'à Moses ededı̨ kò dıı hadı, “Sıì dehjı̨ t'à sets'ehłı̨ lanì,” hadı ı̨lè.

22 Ekò naxı̨ sìı shìh Zıon wìyeh ghǫ nìahde hǫt'e. Nǫ̀htsı̨ edaa sìı wets'ǫ kǫ̀godeè Jerusalem yak'e gòɂǫǫ sìı ghǫ nìahde hǫt'e. Ekǫ yak'eet'ı̨į̀ łǫ-t'à-łǫ gınà xè łą̀ą ełègehdè. 23 Dǫ hazǫǫ̀ Nǫ̀htsı̨ ghàgììzhaa sìı gıta dahkw'eè aahjà, eyıts'ǫ gıxè naxıızì yak'e dek'eèhtł'è hǫt'e. Nǫ̀htsı̨ dǫ hazǫǫ̀ gosınìyaehtıı sìı ghǫ nìahde hǫt'e, dǫ deghàà degaı agììdlàa sìı gıts'ǫ ı̨nì ts'ǫ̀ nìahde hǫt'e. 24 Zezì wets'ǫ̀ nìahde hǫt'e, ededı̨ gogha tanı wheda elı̨ t'à nakenahòdlı̨ı̨ wegòò k'ę̀ę̀ Nǫ̀htsı̨ ts'ǫ̀ nègǫǫla hǫt'e. Eyıts'ǫ Zezì wedoò Nǫ̀htsı̨ ladà k'e adlàa sìı ts'ǫ̀ nìahde hǫt'e, eyı sìı Abè wedoò nahk'e gots'ǫ̀ sìghà xàyaetı hǫt'e.

25 Nǫ̀htsı̨ naxıts'ǫ̀ gode nı̨dè wets'ǫ̀ naxıdzıì goìle welè sǫ̀ǫ̀. Nǫ̀htsı̨ dıı nèk'e Israel got'ı̨į̀ gots'ǫ̀ goı̨de ekò egeèhkw'ǫ-le t'à nàgoı̨hkwa ı̨lè. Ekò goxı̨ sìı yak'e gots'ǫ Nǫ̀htsı̨ gots'ǫ̀ gode kò wets'eèhkw'ǫ-le nı̨dè denahk'e hòtł'ò nàgoehkwa ha hǫt'e. 26 Ekìıyeè k'e Nǫ̀htsı̨ dǫ ts'ǫ̀ goı̨de t'à dèè nàgoèhdǫ ı̨lè. Ekò dıì gogha dıı hanì edeyatıì goghàı̨ɂǫ, “K'achı̨ ı̨łàà dèè zǫ nàgoìdà ahłe ha nıìle, yak'e sı nàgoìdà ahłe ha hǫt'e,” hadı. 27 “K'achı̨ ı̨łàà,” hadıı sìı t'asìı hazǫǫ̀ wexè nàgoìdà ha sìı wedę adle ha dıì-adı. T'asìı hòèlı̨ı̨ sìı whìle adle ha, eyıts'ǫ t'asìı nàeda ha dìì sìı welǫ whìle ts'ǫ̀ whela ha.

28 Eyıt'à welǫ whìle ts'ǫ̀ Nǫ̀htsı̨ wenàowoò k'ę̀ę̀ hòɂǫǫ goxè hòɂǫǫ̀ adlàa sìı weghǫ masì ts'ı̨ı̨wǫ welì. Nǫ̀htsı̨ wınì k'ę̀ę̀ wegha ts'eeda welì, godzeè t'à wets'ǫ̀ nezı̨į̀ nats'ııɂà, wets'àts'eejı̨ xè weghǫ enehots'ıìhsah welì. 29 “Gonǫ̀htsı̨ sìı kǫ̀ nàtso lanì t'asìı hazǫǫ̀ dıhohtsı̨ ha dìì-le,” dek'eèhtł'è.