1 Sèot'ı̨ı̨, dǫ-hoghàehtǫǫ-dǫǫ̀ aahłı̨ ha k'ehoahɂa-le. Dǫ-hoghàehtǫǫ ts'ı̨ı̨lı̨ nı̨dè dǫ eyıì-le gınahk'e hòtł'ò gosınìyaetı ha, wek'èahsǫ hǫt'e. 2 Goxı̨ dǫ ts'ı̨ı̨lı̨ı̨ sìı ekǫ-le eghàlats'eeda hǫt'e. Dǫ edewà t'à ekǫ-le xàyahtı-le sìı deghàà dǫ nezı̨ı̨ elı̨ hǫt'e, eyıts'ǫ ekǫ-le eghàlaeda ch'à edezhį̀į̀ hazǫǫ̀ k'èdì ha dìì-le.

3 Tłı̨cho wewà yìı satsǫ̀ whetǫǫ̀ ats'ehɂı̨ nı̨dè, wet'à tłı̨cho gok'èı̨t'eè ats'ehɂı̨. Eyı satsǫ̀ t'à tłı̨cho edı̨į̀ ts'ǫ̀ ade ha wets'ı̨ı̨hwhǫǫ sìı ts'ǫ̀ at'ı̨ hǫt'e. 4 Eyıts'ǫ elàcho sı wedaànıahdè. Sıì nechà eyıts'ǫ nı̨hts'ı nàtsoo t'à nàeda, hanìkò amìı elà k'èdìı sìı elàht'oò nechà-lea t'à elà k'èdì hǫt'e. 5 Eyı lanì gowalıì t'asìı nechà-lea gok'e wheɂǫ hǫt'e, hanìkò wet'à t'asìı deè ghǫ xàdahots'edì. Kǫ̀kwıì nechà-lea kò wet'à dèè gok'eek'ǫ̀ ha dìì-le. 6 Gozhį̀į̀ k'e t'asìı whelaa gots'ǫ sìı gowalıì denahk'e hołı̨ı̨-deè hǫt'e. Wet'à edegha hoìla hots'ehtsı̨ eyıts'ǫ wet'à godıhołè. Gowalıì sìı kǫ̀ dèk'ǫ̀ǫ lanì wet'à t'asìı hazǫǫ̀ k'eek'ǫ̀, eyıts'ǫ wehłı̨kǫ̀ gots'ǫ kǫ̀ t'à gowalıì dìtła lanì.

7 Tıts'aàdìı hazǫǫ̀ xàɂaa, t'asìı yat'a k'edèe, gòo eyıts'ǫ tı yìı t'asìı nàdèe, eyı hazǫǫ̀ dǫ hoghàgogeèhtǫ t'à gok'èagı̨ı̨t'e. 8 Hanìkò dǫ wı̨ı̨zìı gowalıì gok'èı̨t'eè ayele ha dìì. T'aats'ǫǫ̀ wet'à hołı̨ı̨ hots'ehtsı̨, nàèdıłı̨ı̨ weyìı dagoòɂǫ lanì hǫt'e.

9 Gowalıì t'à Nǫ̀htsı̨-Gotà weghàsǫts'eedı, hanìkò eyı gowalıì et'ıì t'à dǫ Nǫ̀htsı̨ k'ę̀ę̀ gıhòèlı̨ı̨ sìı gıts'ǫ̀ nàdahots'eeɂà. 10 Gowà et'ıì t'à Nǫ̀htsı̨ weghàsǫts'eedı eyıts'ǫ wet'à dǫ ts'ǫ̀ nàdahots'eeɂà. Sèot'ı̨ı̨, hanì ha dìì. 11 Tık'è ı̨łè zǫ gots'ǫ sìı tı nezı̨ı̨ eyıts'ǫ dewatì xàetł'ì nıìle. 12 Sèot'ı̨ı̨, jìek'oò ı̨chį̀ghoò ta dehshe nıìle, eyıts'ǫ edaghoò jìek'ots'ıì k'e dehshe nıìle. Eyı xèht'eè, tı nezı̨ı̨ eyıts'ǫ dewatì sı tık'è ı̨łè gots'ǫ xàetł'ò nıìle.

13 Naxıta dǫ gǫǫzǫ xè t'asìı nıedì edeewǫ nı̨dè ehkw'ı eda t'à wègaat'ı̨į̀ ayııle, eyıts'ǫ gǫǫzǫ t'à k'èeweèt'ı̨ k'ę̀ę̀ dǫ ts'ǫ̀ nezı̨į̀ eghàlaıdà. 14 Hanìkò ełeghǫ ts'oxoahdı xè dǫ wet'àaɂàa edaahtsı̨ nı̨dè goahsǫ nıìle. Edeghǫ xàdahoahdì-le, eyıts'ǫ nàowo ehkw'ıı sìı wedę aahłe-le. 15 Hanì gots'ı̨ı̨zǫǫ̀ k'ehots'eɂaa sìı yak'e gots'ǫ nıìle, dıı nèk'e gots'ǫ hǫt'e. Nǫ̀htsı̨ wets'ǫ nıìle, wehłı̨ı̨ wets'ǫ hǫt'e. 16 Dǫ ełeghǫ sıì ts'ohogeedı xè gıt'àhoòɂà edegeetsı̨ nı̨dè dǫ xè nàdahoowo hǫt'e, eyıts'ǫ hołı̨ı̨ hazǫǫ̀ xàɂaa hogehtsı̨ hǫt'e.

17 Hanìkò wet'à gots'ı̨ı̨zǫǫ sìı yak'e gots'ǫ hǫt'e nı̨dè, wet'à degaı ats'et'į̀, wet'à ts'èwhı̨ welè hats'ı̨ı̨wǫ, ełets'ǫ̀ godzeè nezı̨ı̨ ha ts'ı̨ı̨wǫ, ełek'èats'ı̨ı̨t'e ha ts'ı̨ı̨wǫ, ełets'ǫ̀ godzeè eteèɂı̨, ełets'ǫ̀ nezı̨į̀ eghàlats'eeda, dǫ wet'àaɂàa zǫ ts'ǫ̀ nezı̨į̀ nats'eɂa-le, eyıts'ǫ ehkw'ı ełets'ǫ̀ nats'eɂa. 18 Dǫ ełexè ts'èwhı̨į̀ hogehtsı̨ı̨ sìı dǫ ehkw'ı geedaà agogele hǫt'e.