1 Ekìıyeè k'e k'achı̨ Zezì wegà dǫ łǫ ełèwhede. Dǫ weghǫ shèts'ezhee gıts'ǫ-le t'à, Zezì edecheekeè gokayaı̨htı hadı, 2 “Dıı dǫ sedzeè t'à etegeèhɂı̨. Taı dzęę̀ sexè gıakw'è, hanìkò t'asìı wı̨ı̨zìı gıwàhǫǫdì-le. 3 Dǫ mǫ̀hdaa gǫǫwà gots'ǫ aget'ı̨ t'à bò dę nageedè agèhłà nı̨dè degeèhdì t'à nàgeetł'ì ha sǫnı,” gòhdı.

4 Wecheekeè gıts'ǫ̀ hadı, “Kǫ̀ta gòlaa ts'ǫ̀ gǫǫwà agǫ̀ht'e, eyıt'à edı̨į̀ gots'ǫ dǫ gıgha łèt'è deghàà nàts'eehdì ha?” gedı.

5 Zezì gots'ǫ̀ hadı, “Łèt'è dàtłǫ naxıts'ǫ?”

“Łèt'è łǫ̀hdı̨,” gıìhdı.

6 Zezì dǫ hazǫǫ̀, “Dèè k'e dahkw'e,” gòhdı. Eyı tł'axǫǫ̀ Zezì łèt'è łǫ̀hdı̨ neyı̨į̀wa gà yek'eèyaı̨htı. Łèt'è tàyı̨ı̨zhì gà dǫ gotaàgeedı ha edecheekeè goghàyı̨ı̨wa, eyıt'à wecheekeè hagį̀į̀là. 7 Łıwe nechà-lea łǫ-lea gıts'ǫ sìı Zezì k'achı̨ yek'eèyaı̨htı gà edecheekeè hagòhdı, “Dıı sı dǫ gıghàahdı,” gòhdı. 8 Dǫ hazǫǫ̀ gıgha hòt'a ts'ǫ̀ shègıazhe. Eyı tł'axǫǫ̀ dǫ hazǫǫ̀ t'asìı ghàgeèɂàa sìı wecheekeè nàgehtsı̨. Hazǫǫ̀ t'à tł'ohtǫ łǫ̀hdı̨ haàtłǫǫ nàgèhtsı̨. 9 Dǫzhìı dı̨-lemì haàtłǫǫ shègıazhe. Zezì dǫ hazǫǫ̀ nagoèhɂà tł'axǫǫ̀, 10 edecheekeè goxè elà yìetła gà Dalmanutha nèk'e ts'ǫ̀ geèɂe.

11 Pharısee gı̨ı̨lı̨ı̨ mǫ̀hdaa Zezì dageehke ha eyı nègı̨ı̨de. Zezì geèhdzà ha gı̨ı̨wǫ t'à hagıìhdı, “Yak'e gots'ǫ gogha enıìyah hoı̨htsı̨,” gıìhdı. 12 Eyı dǫ gıkwì dezhì t'à Zezì hòtł'ò dèhjı xè hadı, “Dànìghǫ dıı dǫ enıìyah deè geɂį̀ ha gı̨ı̨wǫ? Ehkw'ı anaxèehsı̨, hanıı wı̨ı̨zìı geɂį̀ ha nıìle,” gòhdı. 13 Eyı tł'axǫǫ̀ Zezì gots'ǫǫ̀ naèhtła gà elà yìetła, ets'èɂǫ̀ǫnèe ts'ǫ̀ tı te nǫǫ̀geèɂe.

14 Wecheekeè łèt'è dę nagedì nǫǫ̀. Elà yìı łèt'è ı̨łè zǫ edexè k'egeɂa ı̨lè. 15 Zezì gots'ǫ̀ hadı, “Edexoahdı! Pharısee gı̨ı̨lı̨ı̨ eyıts'ǫ Herodıan gı̨ı̨lı̨ı̨ sìı gıłèt'èa ch'à edexoahdı,” gòhdı.

16 Eyı hadı ghǫ ełets'ǫ̀ hagedı, “Łèt'è edexè ats'ı̨ı̨là-le t'à adı,” gedı.

17 Zezì hanì gogede gok'èezǫ t'à gots'ǫ̀ hadı, “Dànìghǫ łèt'è whìle ghǫ ełets'ǫ̀ goahde? Įłaà naxıkwì yìekw'ı-le nì? Naxınì t'à nànıahdè ha dezhì nì? 18 Naxıdaà eyıts'ǫ naxıdzıìhkw'ǫǫ̀ gǫ̀hłı̨-le nì? Eyı ts'ıhɂǫ̀ k'eaht'į̀-le xè aàhkw'ǫ-le nì? Dıì whaà-le dàgòjàa sìı asį̀į̀ wenaahdì? 19 Łèt'è sı̨làı t'à dǫzhìı sı̨làı-lemì gıwàhǫǫdì ekò t'asìı ghàgeèɂàa sìı tł'ohtǫ dàtłǫ dagoòɂǫǫ nàwhahtsı̨ nǫǫ̀?”

“Hoònǫ-daats'ǫ̀-nàke,” gıìhdı.

20 “Eyıts'ǫ łèt'è łǫ̀hdı̨ t'à dǫzhìı dı̨-lemì gıwàhǫǫdì ekò t'asìı ghàgeèɂàa sìı tł'ohtǫ dàtłǫ dagoòɂǫ aahłà nǫǫ̀?”

“Łǫ̀hdı̨,” gıìhdı.

21 “Hanì nı̨dè, ı̨łaà naxıkwì yìekw'ı-le nì?” Zezì gòhdı.

22 Kǫ̀ta Bethsaıda nègı̨ı̨ɂe tł'axǫǫ̀, dǫ mǫ̀hdaa dǫ wedaà goìlee Zezì ts'ǫ̀ geèhchì, gıghǫnàdaetì, hagedı, “Gots'ǫ̀ K'àowo, nılà wek'e anele,” gıìhdı. 23 Zezì dǫ wedaà goìlee yılà nıìchì gà kǫ̀ta gots'ǫǫ̀ gòyeèdì. Dǫ wedaà k'e dèze, edılà yek'e ayį̀į̀là gà yets'ǫ̀ hadı, “T'asìı negha wègaat'ı̨ nì?” yèhdı.

24 Eyı dǫ ı̨daà k'eet'į̀, hadı, “Dǫ segha gìgaat'ı̨, hanìkò ts'ı k'egedè lanì gìgaat'ı̨,” yèhdı.

25 K'achı̨ Zezì edılà eyı dǫ wedaà k'e ayı̨į̀là. Ekòet'ıì wedaà k'aàt'ıì ajà eyıts'ǫ nezı̨į̀ t'asìı hazǫǫ̀ ghàedaà ajà. 26 Zezì hayèhdı, “Hòt'a naı̨tłe, hanìkò kǫ̀ta ts'ǫ̀ ı̨ı̨tła,” yèhdı.

27 Zezì eyıts'ǫ wecheekeè kǫ̀ta Caesarea-Phılıppı gà kǫ̀ gòlaa ts'ǫ̀ geède. Ekǫ gıadè ekò edecheekeè gots'ǫ̀ hadı, “Dǫ amìı aht'e sègedı?” gòhdı.

28 Wecheekeè hagıìhdı, “Dǫ mǫ̀hdaa John-Baptıst aąt'e gedı, mǫ̀hdaa Elıjah aąt'e gedı eyıts'ǫ dǫ mǫ̀hdaa whaà gots'ǫ nakwenàoɂǫǫ aąt'e nègedı,” gıìhdı.

29 Zezì dagoehke, “Ekò naxı̨, amìı aht'e sèahdı?” gòhdı.

Peter Zezì ts'ǫ̀ hadı, “Nı̨ sìı Chrıst anet'e,” yèhdı.

30 Zezì edecheekeè gots'ǫ̀ hadı, “Eyı ghǫ dǫ wı̨ı̨zìı ts'ǫ̀ haahdı-le,” gòhdı.

31 Ekò gots'ǫ Zezì dıı hanì (edeghǫ) edecheekeè ts'ǫ̀ gode, “Dǫ-wet'àaɂàa-deè sìı hòtł'ò daı̨ɂa ha. Ǫhdah gı̨ı̨lı̨ı̨, yahtıı gha k'aodèe eyıts'ǫ Nǫ̀htsı̨-yatıì-k'ègedìı-dǫǫ̀ gıgha wedę ha hǫt'e. Ełaàgıìhwhı ha eyıts'ǫ taı dzęę̀ k'ehǫǫwo nı̨dè naìdà ha hǫt'e,” gòhdı. 32 Hanì ehkw'ı gots'ǫ̀ xàyaı̨htı, eyıt'à Peter whatsǫǫ̀ yets'ǫ̀ goı̨de, hayèhdı, “Nexè hagode ha nıìle!” yèhdı.

33 Zezì edecheekeè gots'ǫ̀ ets'aèhtła xè goghàı̨dà ekò Peter ts'ǫ̀ hadı, “Wehłı̨ı̨, sechį̀ht'a ts'ǫ̀ aąde! Nǫ̀htsı̨ wınì k'ę̀ę̀ nànınewo nıìle, dǫ gınì k'ę̀ę̀ nànınewo hǫt'e,” yèhdı.

34 Zezì, wecheekeè eyıts'ǫ dǫ hazǫǫ̀ edets'ǫ̀ gokayaı̨htı tł'axǫǫ̀ gots'ǫ̀ hadı, “Amìı sek'èè at'ı̨ ha nıwǫǫ sìı edeghǫ nànıwo ha nıìle eyıts'ǫ edets'ǫ dechı̨et'aa sek'èè nayatı̨ ha hǫt'e. 35 Amìı edınì k'ę̀ę̀ eda ha nıwǫǫ sìı wedıhołè ha, hanìkò amìı sets'ıhɂǫ̀ eyıts'ǫ godı nezı̨ı̨ ts'ıhɂǫ̀ edınì k'ę̀ę̀ eda ha nıwǫ-le sìı edaxàweetè ha hǫt'e. 36 Dıı nèk'e dǫ t'asìı hazǫǫ̀ edegha dèhnǫ kò wedą̀ązhį̀ı̨ weghǫ wedıhòłı̨ nı̨dè eyı hazǫǫ̀ wegha wet'àaɂà nıìle. 37 Dǫ t'asìı wı̨ı̨zìı k'èxa ededą̀ązhį̀ı̨ dehnè ha nıìle. 38 Dıì dǫ hołı̨ı̨ k'ę̀ę̀ geedaa sìı amìı gonadąą̀ seghǫ į̀į̀zhaelı̨ xè seyatıì sı ghǫ į̀į̀zhaelı̨ nı̨dè wexè hoìla ha. Dǫ-wet'àaɂàa-deè edetà wets'ǫ enıìyah deè t'à yak'eet'ı̨į̀ goxè nììtła nı̨dè, yeghǫ į̀į̀zhaelı̨ ha hǫt'e.