1 Sèot'ı̨ı̨, naxı̨ sìı Moses wenàowoò wek'èahsǫ hǫt'e. Dǫ dıı nèk'e geeda gots'ǫ̀ eyı nàowo gıts'ǫ̀ k'àowo hǫt'e, wek'èahsǫ-le nì? 2 Ekìı-hò wedaànıts'ııdè: Moses wenàowoò k'ę̀ę̀ ts'èko wedǫǫ̀ eda gots'ǫ̀ wedǫǫ̀ xè ı̨łè zǫ lanì hǫt'e, hanìkò wedǫǫ̀ ełaı̨wo nı̨dè wet'à hots'et'ı̨ı̨ nàowoò wegha ıtà-le ajà. 3 Eyıt'à ı̨łaà wedǫǫ̀ eda et'ıì dǫzhìı eyıì-le xè honǫ̀ǫdza-ı̨dè hołı̨ı̨ k'ę̀ę̀ eghàlaı̨dà hǫt'e. Hanìkò wedǫǫ̀ ełaı̨wo tł'axǫǫ̀ dǫ eyıì-le xè honǫ̀ǫdza nı̨dè hołı̨ı̨ k'ę̀ę̀ eghàlaeda nıìle.

4 Eyıt'à sèot'ı̨ı̨, Zezì ełaı̨wo ts'ıhɂǫ̀ Moses wenàowoò ts'ǫ̀ ełaahdè k'ę̀ę̀ naxııtà. Hanì-ı̨dè eyıì-le wets'ǫ aaht'e ha, Zezì-Krı gogha naìdà wets'ǫ aaht'e ha, eyıt'à Nǫ̀htsı̨ wınì k'ę̀ę̀ aahda ha hǫt'e. 5 Goınìłı̨ı̨ gots'ǫ̀ k'àhowo ekò, Moses wenàowoò weghǫ ets'ıìkw'o t'à gonìłı̨ı̨ yek'èch'a eghàlaeda ha nıwǫ. Eyıts'ǫ gozhį̀į̀ t'à hołı̨ı̨ hots'èhtsı̨ı̨, gonìłı̨ı̨ k'ę̀ę̀ eghàlats'eeda ı̨lèe sìı wet'à ełaàts'ede ı̨lè. 6 Hanìkò dıì sìı eyı nàowo ts'ǫ̀ ełaàts'ı̨ı̨dè k'ę̀ę̀ goıtà t'à eyı nàowo gots'ǫ̀ k'àhowo-le ajà. Eyıt'à Yedàyeh Nezı̨ı̨ wenàowoò gòò t'à ts'eedaà ats'ejà, Moses wenàowoò wezǫą dek'eèhtł'èe sìı wek'ę̀ę̀ ts'eeda-le ats'ejà.

7 Eyıt'à Moses wenàowoò ghǫ dàts'edı welì? Eyı nàowo hołı̨ı̨ nì ı̨t'e? Hanì nıìle! Ayìı hołı̨ı̨ ne sìı wek'èehsǫ ha-le ı̨lè, hanìkò eyı nàowo zǫ weghàà wek'èehsǫǫ̀ ahjà. “Dǫ t'asìı wets'ǫ sìı weahwhǫ ha-le,” dek'eèhtł'è-le nı̨dè, dǫ eyıì-le wets'ǫ t'asìı ts'ı̨ı̨wǫ nı̨dè ehkw'ı nıìle, eyı deghàà wek'èehsǫ ha-le ı̨lè. 8 Hanìkò eyı nàowo wek'èch'a aht'ı̨ ha segha hòɂǫǫ̀ adlà hǫt'e. T'asìı łǫ sets'ǫ-le sìı sınìłı̨ı̨ t'à weghaehwhıì ahjà. Nàowo gǫ̀hłı̨-le nı̨dè hołı̨ı̨ nàowoò whìle ha ı̨lè. 9 Moses wenàowoò ghǫ eèhkw'o kwe ehda ı̨lè, hanìkò eyı nàowo seghǫ̀t'ǫ ts'ǫ̀et'ıì hołı̨ı̨ hohtsı̨ ha dehwhǫǫ̀ ahjà, eyıts'ǫ ełaıhwho lahjà. 10 Eyı nàowo et'ıì wet'à ts'eeda ha hǫt'e ı̨lèe, hanìkò wet'à ełaàts'ede wek'èhoèhzà. 11 Eyı nàowo wek'èch'a aht'ı̨ ha segha hòɂǫǫ̀ adlà t'à sınìłı̨ı̨ seghǫyaàɂǫ eyıts'ǫ wek'èch'a ahjà. Eyı nàowo wets'ıhɂǫ̀ hołı̨ı̨ ełaıhwhoò asį̀į̀là. 12 Moses wenàowoò hazǫǫ̀ degaı hǫt'e eyıts'ǫ nàowodeè sı degaı, ehkw'ı xè nezı̨ hǫt'e, wek'èts'eezǫ.

13 Eyıt'à eyı nàowo nezı̨ı̨ sìı ełaıhwhoò asį̀į̀là nì? Hanì honàedı nıìle! Eyı nàowo nezı̨ı̨ wet'ǫ̀ǫ̀ gohołı̨į̀ sıì wejıı hǫt'e wenıts'eedì ats'et'į̀, eyıts'ǫ nàowo nezı̨ı̨ wek'èts'eezǫǫ̀ ats'et'į̀ nı̨dè hołı̨ı̨ ełaàts'edeè agohɂį̀ hǫt'e. Eyıt'à nàowodeè weghàà gohołı̨į̀ sıì wejıı hǫt'e wenıts'eedì.

14 Moses wenàowoò sìı degaı-deè hǫt'e wek'èts'eezǫ, hanìkò goxı̨ sìı degaı-deè ats'ı̨ı̨t'e nıìle, hołı̨ı̨ gots'ǫ̀ k'àhowo t'à. 15 Dàht'ı̨į̀-aht'ı̨ı̨ sìı deghàà wenıehdì nıìle. Ayìı dàhłe ha dehwhǫǫ sìı k'ę̀ę̀ eghàlaehda-le, hanìkò ayìı wedzaehwhǫǫ sìı eyı weghàlaehda. 16 Eyıt'à ayìı dàhłe ha dehwhǫ-le kò weghàlaehda nı̨dè eyı nàowo nezı̨ı̨ hǫt'e nǫǫ̀ dehwhǫ aht'ı̨. 17 Eyı weghàà xàè sı̨ aht'ı̨-le wek'èehsǫ, hanìkò hołı̨ı̨ seyìı wheɂǫǫ sìı hołı̨ı̨ k'ę̀ę̀ eghàlaehdaà asehɂı̨. 18 T'asìı nezı̨ı̨ wı̨ı̨zìı sets'ǫ̀-èlı̨ nıìle wek'èehsǫ, sınì hazǫǫ̀ hołı̨ı̨ zǫ hǫt'e. Ayìı nezı̨ı̨ sìı weghàlaehda ha dehwhǫ, hanìkò t'asìı nezı̨ı̨ weghàlaehda ha segha dìì hǫt'e. 19 T'asìı nezı̨ı̨ weghàlaehda ha dehwhǫǫ sìı weghàlaehda-le. Nàowołı̨ı̨ k'ę̀ę̀ eghàlaehda ha-le dehwhǫ kò k'èdaà nàowołı̨ı̨ k'alahwho. 20 Sı̨ hahwhǫ-le kò haht'ı̨ nı̨dè, sı̨ xàè aht'ı̨ nıìle, hanìkò hołı̨ı̨ seyìı wheɂǫǫ sìı eyı at'ı̨ hǫt'e.

21 Eyıt'à dıı hanì sexè hòɂǫ: Nàowo nezı̨ı̨ eghàlaehda ha dehwhǫ kò nàowołı̨ı̨ sedaèht'è. 22 Sedzeè t'à Nǫ̀htsı̨ wenàowoò degaı ghǫ sınà hǫt'e, 23 hanìkò nàowołı̨ı̨ sezhį̀į̀ yìı eghàlaedaa sìı nàowo nezı̨ı̨ sedzeè yìı wheɂǫǫ k'èch'a eghàlaeda wek'èehsǫ. Hołı̨ı̨-nàowoò seyìı eghàlaedaa sìı sets'ǫ̀ k'àhowo t'à sedaàtǫ laaht'e. 24 Eyıt'à sıì sexè gots'eèdı hǫt'e! Dıı sezhį̀į̀ wet'à ełaehwhı ha sìı amìı yech'à edaxàsį̀ı̨htı̨ lì? 25 Nǫ̀htsı̨ masì weehwhǫ, gots'ǫ̀ K'àowo Zezì-Krı wet'ǫ̀ǫ̀ edaxàseetè ha hǫt'e! Eyıt'à sedzeè yìı Nǫ̀htsı̨ wenàowoò sets'ǫ̀ k'àhowo hǫt'e, hanìkò sınìłı̨ı̨ ts'ıhɂǫ̀ hołı̨ı̨-nàowoò sets'ǫ̀ k'àhowo hǫt'e.