1 Dǫ hazǫǫ̀ dèe-ts'ǫ̀-k'àowo k'èagı̨ı̨t'e ha hǫt'e. K'aodèe gı̨ı̨lı̨ı̨ sìı ededahxà eghàlageeda nıìle, hanìkò Nǫ̀htsı̨ dahxà eghàlageeda hǫt'e, Nǫ̀htsı̨ hanì hòɂǫǫ̀ ayį̀į̀là t'à. 2 Eyıt'à dǫ dèe-ts'ǫ̀-k'àowo k'èı̨t'e-le nı̨dè, Nǫ̀htsı̨ dǫ gha nàowo whehtsı̨ı̨ sìı k'èı̨t'e nıìle. Amìı hat'ı̨ı̨ sìı edesınìyahtıì at'ı̨ hǫt'e. 3 Dǫ ehkw'ı eghàlageedaa sìı k'aodèe ts'àgeejı̨ nıìle, hanìkò dǫ ekǫ-le eghàlageedaa sìı, k'aodèe ts'àgeejı̨ ha hǫt'e. Eyıt'à k'aodèe ts'àahjı̨ ha-le dahwhǫ nı̨dè, ayìı ehkw'ıı sìı weghàlaahda. Hanì-ı̨dè k'aodèe gı̨ı̨lı̨ı̨ sìı naxıghǫ nezı̨į̀ agedı ha. 4 Naxıts'ǫ̀ nezı̨į̀ eghàlageeda ha Nǫ̀htsı̨ gha eghàlageeda hǫt'e. Hanìkò ekǫ-le eghàlaahda nı̨dè dahjı̨ ha hǫt'e, k'aodèe gı̨ı̨lı̨ı̨ sìı gık'èaht'e-le k'èxa hoìla anaxegele ha hǫt'e. Nǫ̀htsı̨ gha eghàlageeda hǫt'e, eyıts'ǫ Nǫ̀htsı̨ dahxà dǫ wejıı sìı dagı̨ı̨ɂaà agogele ha hǫt'e. 5 Eyıt'à k'aodèe gı̨ı̨lı̨ı̨ sìı gık'èaht'e ha naxıgha wet'àaɂà hǫt'e. Danaxegį̀ı̨hɂa ha sǫnı dahwhǫ zǫ t'à gık'èaht'e-le, hanìkò naxıdzeè t'à ehkw'ı dahwhǫ ts'ıhɂǫ̀ gık'èaht'e.

6 Nǫ̀htsı̨ gha eghàlageeda eyıts'ǫ eyı la gıgha wheɂǫ ne t'à dèe-ts'ǫ̀-k'àowo ts'àts'eehdì ha hǫt'e. 7 Eyıt'à dǫ ts'ǫ̀ naxını̨htł'è gǫ̀hłı̨ nı̨dè naxını̨htł'è naahłe. Dèe-ts'ǫ̀-k'àowo ts'àts'eehdì ts'ǫǫ̀hk'e naxını̨htł'è nı̨dè naxını̨htł'è naahłe. Eyıts'ǫ k'aodèe hazǫǫ̀ gıts'ǫ̀ nezı̨į̀ naahɂa xè gıghàhoahdì ha hòɂǫ nı̨dè, hanì gıts'ǫ̀ naahɂa.

8 Naxını̨htł'è gǫ̀hłı̨ welè-le. Enı̨htł'è ı̨łè zǫ t'aats'ǫǫ̀ gots'ǫ ha sìı ełeghǫnets'eètǫ eyı hǫt'e. Eyı t'aats'ǫǫ̀ naxını̨htł'è elı̨ ha hǫt'e, eyıts'ǫ t'aats'ǫǫ̀ wek'e eghàlaahda ha hǫt'e. Dǫ hazǫǫ̀ ghǫnıahtǫ nı̨dè nàowo hazǫǫ̀ k'èaht'e hǫt'e. 9 Moses wets'ǫ nàowodeè wek'èahsǫ hǫt'e: “Ełexè hołı̨ı̨ hoahtsı̨-le,” “Dǫ ełaahwhı-le,” “Aahɂį̀-le,” “Dǫ t'asìı wets'ǫ sìı weahwhǫ-le,” eyıts'ǫ nàowo eyıì-le hazǫǫ̀ gha sìı dıı nàowo ı̨łè weghǫ ahodı hǫt'e: “Edeghǫnıahtǫ lanì naxèot'ı̨ gıghǫnıahtǫ,” dek'eèhtł'è. 10 Dǫ gıghǫnıahtǫ nı̨dè, gıts'ǫ̀ hojıì eghàlaahda ha nıìle. Eyıt'à ełeghǫnets'eètǫ nı̨dè Moses wenàowoò deghàà weghàlats'ı̨ı̨dà gha ıtà hǫt'e.

11 Dıı nèk'e dıì dàgot'ı̨ı̨ sìı wek'èahsǫ ne t'à hanì ełets'ǫ̀ eghàlaahda. Hòt'a ts'ıahwhı lanì ha nìhǫǫwo. Gots'ǫ̀ K'àowo edaxàgole ha ts'ǫ̀ whaà-le agòjà. T'akwełǫ̀ǫ̀ gogha ehkw'ı-ahodı gots'ǫ sìı dıì hòt'a denahk'e wets'ǫ̀ whaà-le agòjà. 12 To k'àhdzǫ wetehoòwo t'e, whaà-le-t'ıì goxè dzęh agode ha. Eyıt'à to dǫ t'asìı wejıı k'alagedèe sìı wedę ats'ııle, dzęh eghàlats'eeda gha edexè sınìhots'ììɂà ha hǫt'e. 13 Dzęh dǫ geeda lanì ehkw'ı ts'eeda ha hǫt'e. Ts'edǫ xè ts'ıɂǫ̀-hots'eeɂà welè-le, gozhį̀į̀ t'à hołı̨ı̨ k'alats'edèe welè-le, ełets'ǫ̀ nàyats'ehtı welè-le, eyıts'ǫ ełeghǫ ts'ohots'eedı welè-le. 14 Hanìkò dıı haaht'ı̨: Gots'ǫ̀ K'àowo Zezì-Krı wınì k'ę̀ę̀ aahda. Dànì gonìłı̨ı̨ k'ę̀ę̀ k'ehots'eɂaa sìı ghǫ nànıahdè-le.