1 Goxı̨ eyı hanıı ghǫ goınì nàtso nı̨dè dǫ gınì nàtso-le sìı gıts'àts'edı ha hǫt'e, eyıts'ǫ t'ats'ı̨ı̨wǫ k'ę̀ę̀ zǫ k'ehots'eɂa ha nıìle. 2 Gòet'ı̨ ayìı gıgha sìghà sìı k'ę̀ę̀ eghàlats'eeda xè gınà agets'ele ha hǫt'e, hanì-ı̨dè gınì nàtsoò agets'ele ha. 3 Zezì-Krı ededı̨ kò edegha sìghà k'ehoɂa-le ı̨lè. Dıı hanì weghǫ dek'eèhtł'è: “Dǫ naxık'adageedè nı̨dè, sı̨ sek'adageedè agedı hǫt'e,” dek'eèhtł'è. 4 Įnę̀ę whaà Nǫ̀htsı̨ Nı̨htł'è k'e t'asìı hazǫǫ̀ dek'eèhtł'èe sìı wet'à hoghàgoetǫ gha adlà hǫt'e. Ayìı dek'eèhtł'èe sìı wek'eyats'ehtı nı̨dè wet'à goınì nàtsoò ade ha hǫt'e eyıts'ǫ edaxàts'eedè ha.

5 Zezì-Krı wek'ę̀ę̀ aahda t'à, Nǫ̀htsı̨ naxınì nàtsoo xè naxıdzeè nàtsoò ayehɂı̨ı̨ sìı naxınì ı̨łè zǫ layııle. 6 Hanì-ı̨dè naxıdzeè ı̨łè t'à, eyıts'ǫ naxıwà ı̨łè t'à Nǫ̀htsı̨, Zezì-Krı Wetà, weghàsǫahdı ha welì.

7 Dànì Zezì-Krı dǫ naxı̨ı̨hwhǫ k'ę̀ę̀ dǫ ełeahwhǫ, hanì-ı̨dè Nǫ̀htsı̨ weghàsǫedıì aweahɂı̨ hǫt'e. 8 Ehkw'ı anaxèehsı̨, Nǫ̀htsı̨ weyatıì ehkw'ı dahxà Zezì-Krı Israel got'ı̨į̀ gogha eghàlaedaa ajà. T'akwe whaà Nǫ̀htsı̨ edeyatıì gocho ghàyı̨ı̨ɂǫǫ ı̨lèe sìı Zezì wek'ę̀ę̀ hòɂǫǫ̀ ayį̀į̀là. 9 Hanì-ı̨dè Israel got'ı̨į̀ agı̨ı̨t'e-le sìı Nǫ̀htsı̨ etegoòɂı̨ k'èxa gıghàsǫedı ha. Dıı hanì dek'eèhtł'è k'ę̀ę̀:

13 Nǫ̀htsı̨ edaxàgolee sìı sıì naxınà eyıts'ǫ naxıxè sìghà hòɂǫ ayııle. Nǫ̀htsı̨ naxıgha ehkw'ı adı welè, hanì-ı̨dè Yedàyeh Nezı̨ı̨ wedahxà naxınì deɂǫ̀ǫ̀ nàtsoò ade ha hǫt'e.

14 Sèot'ı̨ı̨, sıì nezı̨į̀ k'ehoahɂa hotıì wek'èehsǫ hǫt'e. Dànì aahda ha sìı deghàà wek'èahsǫ, eyıts'ǫ yatı nezı̨ı̨ ełeghàahɂà gha goahsǫ hǫt'e. 15 K'achı̨ wenaahdì ha dehwhǫ t'à, edèdaehdı-le xè t'asìı mǫ̀hdaa weghǫ naxıts'ǫ̀ ııtł'è hǫt'e. Nǫ̀htsı̨ wesǫnıwǫ ts'ıhɂǫ̀ wecheekeèdeè ehłı̨ ha seghàhòı̨ɂǫ hǫt'e, eyıt'à hanì naxıts'ǫ̀ eehtł'è. 16 Zezì-Krı wegha yahtıı wılaà ghàlaehda sììchì hǫt'e. Dǫ eyıì-le xàɂaa Nǫ̀htsı̨ wegodıì nezı̨ı̨ t'à hoghàgeehtǫ ha asį̀į̀là. Hanì-ı̨dè dǫ eyıì-le xàɂaa sìı Nǫ̀htsı̨ ghàgets'ele ha. Yedàyeh Nezı̨ı̨ wedahxà degaı agììdlà t'à Nǫ̀htsı̨ goghǫ sìghà anıwǫ ha.

17 Nǫ̀htsı̨ wegha sılaà eghàlaehda t'à Zezì-Krı weghàsǫehdı hǫt'e. 18 Edeghǫ xàdahohdì ha dehwhǫ-le. Zezì-Krı sı̨ set'à ayìı ghàlaı̨dàa sìı eyı zǫ weghǫ xàdahohdì ha dehwhǫ. Dǫ eyıì-le xàɂaa ts'ǫ̀ goıhdeè asį̀į̀là t'à, ayìı dàhłà eyıts'ǫ ayìı dàehsı̨ ts'ıhɂǫ̀ dǫ eyıì-le xàɂaa sìı Nǫ̀htsı̨ ts'ǫ̀ agèhłà xè gık'èı̨t'eè agejà. 19 Yedàyeh Nezı̨ı̨ wedahxà nàhtsoò asììdlà ts'ıhɂǫ̀ enıìyah łǫ hòwhıhtsı̨ t'à dıı hanì eghàlaıhdà hǫt'e. Eyıt'à kǫ̀ta Jerusalem gots'ǫ nıwàa nèk'e Ilırıcum ts'ǫ̀ Zezì-Krı wegodıì nezı̨ı̨ deghàà dǫ hazǫǫ̀ ts'ǫ̀ wek'ayawhıhtı hǫt'e. 20 Dǫ ı̨łaà Zezì-Krı ghǫ gıìkw'o-le sìı godı nezı̨ı̨ t'à gıts'ǫ̀ gohde ha dehwhǫ hǫt'e. Hanì-ı̨dè dǫ eyıì-le sekwe eyı eghàlagı̨ı̨dàa sìı gılaà k'e eghàlaehda ha dehwhǫ-le. 21 Dıı hanì dek'eèhtł'è k'ę̀ę̀ ahde ha dehwhǫ,

23 Hanìkò dıì sìı dııyeè nèk'e la ghǫ naht'e, eyıts'ǫ whaà gots'ǫ naxıts'àhtła ha dehwhǫ ı̨lè t'à, 24 Spaın nèk'e ts'ǫ̀ dehtła nı̨dè, naxık'eèhtła ha dehwhǫ. Hanì-ı̨dè whaà-lea ts'ǫ̀ naxıgà-ıhdà tł'axǫǫ̀-ı̨dè Spaın nèk'e ts'ǫ̀ ahde gha sets'àahdı ha dìì-le. 25 Hanìkò dıì sìı Jerusalem ts'ǫ̀ ahde ha dehwhǫ, ekǫ Nǫ̀htsı̨ wets'ǫ dǫ nàgedèe sìı gıts'àhdı ha t'à. 26 Macedonıa nèk'e eyıts'ǫ Achaıa nèk'e ekǫ gòet'ı̨ agı̨ı̨t'ee sìı Nǫ̀htsı̨ wets'ǫ dǫ etegeèt'ı̨ı̨ Jerusalem nàgedèe sìı gogha sǫǫ̀mba ełègį̀ı̨la. 27 Gınà gogha sǫǫ̀mba nàgı̨ı̨htsı̨ hǫt'e, hanì dǫ-teèt'ı̨ı̨ ts'àgedı ha ı̨lè t'ıį̀t'e. Godı nezı̨ı̨ Israel got'ı̨į̀ gıts'ǫ̀ nììt'ǫǫ sìı dǫ eyıì-le xàɂaa ghàgı̨ı̨ɂǫ t'à dǫ eyıì-le xàɂaa sìı t'asìı wet'à ts'eedaa Nǫ̀htsı̨ goghàı̨laa t'à Israel got'ı̨į̀ ts'àgedıı sìı ehkw'ı hǫt'e. 28 Dıı la weghǫ naht'e xè sǫǫ̀mba hazǫǫ̀ gıtł'aıhwha tł'axǫǫ̀-ı̨dè, Spaın nèk'e ts'ǫ̀ dehtła t'à naxık'eèhtła ha. 29 Naxıts'àwhıhtła nı̨dè Zezì-Krı sexè eghàlaeda t'à naxıxè deghàà sìghà ayele ha wek'èehsǫ.

30 Eyı la weghàlaehdaa sìı sıì wèhoedı-le t'à sets'àahdı ha hǫt'e. Sèot'ı̨ı̨, Zezì-Krı wedahxà, eyıts'ǫ Yedàyeh Nezı̨ı̨ wesǫnıwǫ dahxà Nǫ̀htsı̨ ts'ǫ̀ segha yaahtı ha naxeehwhǫ. 31 Judea nèk'e dǫ gıgha ehkw'ı-ahodı-le sìı gıch'à edaxàseetè ha segha yaahtı, eyıts'ǫ Jerusalem Nǫ̀htsı̨ wets'ǫ dǫ gıts'àhdıı sìı gınà aht'ı̨ ha, eyı sı gha yaahtı. 32 Hanì-ı̨dè Nǫ̀htsı̨ wınì k'ę̀ę̀ sınà naxıts'àhtła ha welì, eyıts'ǫ naxıxè whıhda t'à sınì nàtsoò anade ha. 33 Nǫ̀htsı̨ naxıxè welè eyıts'ǫ naxıxè sìghà hòɂǫ ayııle. Amen.