Paul di ouresi bura
Thessalonica vene
rofu
Ago di ini adina
Thessalonica bi Rome di taoni tora Macedonia gaganiri. Paul yaku minari ekalesia vene moi egogo reyo. Mina reyori, Paul yaku ago buni Jew de vene rofu niyo dada. Doba de, Jew vene yaku nitourage reyadi, amiye tau gade ini uka moigamo, Jew vene di vegu dada. Paul bi mina resi Thessalonica feresi Berea ri boyo. Corinth okisi ameyo doba niyo ma Paul bura yokoi baku reyo, ini asini ma vakoi moimai redo amiye Timothy iniye di sina Thessalonica duburi mina iniye gokai vedo kana.
Paul di ouresi bura Thessalonica vene rofu bi mironari mina ekalesia vene rofu, moi egira ma rama vo nigika bura reyo. Ina yaku Sei rofu buni tora gade maro, adina ini mokena vari gira aena ma uka mana di ago neideyo. Ina venesa doba de ameyori, ini beika vegu regasa amegamadi, mina vene rofu ni ruaka resi duburi Keriso dairi dego nikaitena sina nikabai resi niyo: kaere Keriso rofu mokena vari gira aesi muyeyo Keriso dairi denari, bi toga ameibobina vegu moigo ba? Ma goivaka Keriso bi dudusa dairi dego? Mina resi Paul niyo bi moimai regasa Keriso dego nari reyaganedi.
Beika sina ideri
Ago di ini adina 1.1
Buni tora gade nina ma roka moi odoro rina 1.2—3.13
Ekalesia di vegu egira rena ago 4.1–12
Keriso dairi dego di ago 4.13—5.11
Metona vegu egira rena ago 5.12–22
Metona ago 5.23–28
1
1 Mina bura na Paul, Silas ma Timothy gutuna —✡ Acts 17.1
Thessalonica ekalesia vene ya rofu bura reyafa, kaere bi Baba Sei ma Varika Iesu Keriso sa:
Buni tora gade ma uka amuta bi yasa.
Thessalonica vene di vegu amena ma mokena vari gira aena
2 Una bi ari neinei ya vene tau rofu usa usa nigasa ya vene fafau Sei rofu buni tora gade masifa. 3 Una bi uni Baba Sei di nemokori toga ya mokei baesifa, gokai yi mokena vari gira aena moimai yaku moi vata rido, ma gokai yi uka mana yaku yi moimai rei tavoi moi vata rido, ma gokai yi uka mokena, uni Varika amiye Iesu Keriso rofu, mina moi gira rido. 4 Usika ourena, una diba Sei yaku ini uka ya masi ya bi ini auba reyo, 5 adina uni ago buni bi ya rofu ago dudu maka de moi baeyafa, idu vava nufa ka, ma Vima kikifa ma mokena gira iniye dudu. Makai ya ya diba gokai yasa amegamafari, bi vegu reyafa; mina bi yi buni dada. 6 Ya vene bi una ma Varika amiye yaku amesifa kana mina reyadi; gokai esika esika tora gade moiyadi, idu Vima kikifa yaku ada ya vene maro, ma ya yaku ago buni moi gira riyadi.✡ Acts 17.5–9 7 Mina ye, ya bi Macedonia ma Achaia gagani di mokena vari gira aededi vene tau yaku veyaganedi kana niyadi. 8 Adina Varika amiye di ago bi ya rofu Macedonia ma Achaia ri maka de yakuyo, yi mokena vari gira aena Sei rofu di sina bi gagani gagani tau ka diba niyadi. Mina resi, minari beika yokoi de nigifa, 9 adina gokai una moi dui reyadi, bi iniye niyadi mironi. Ma gokai ofa sei rofu kero rei feresi vegu amedo ma rama Sei rofu naivo reyadi ka niyadi. 10 Ma ini Mida oma gutuna dego nari rededi ka niyadi—mina bi ini Mida Iesu, kaere bi muyenari dadi rae reyo ma kaere bi Sei di gubuyo baedo rofu una erufugo.