6
Mida mida ma nono baba
1 Mida mida, Varika amiye dudu* Varika amiye dudu bura bedakai mina ago nufa de. yi nono baba di ago neidebifa, adina mina bi rama.✡ Col 3.20 2 “Yi nono baba emagui re,” bi ouresi ago gira bi ini nitore rena ago nufa:✡ Ex 20.12; Deut 5.16 3 “ye mina dudu yi vegu buni niyaine ma konori amei doba reyaine.”
4 Baba vene, yi mida mida moi gubuyo ga rebifa, idu Varika amiye di moi rorobo rina ma oteimana dudu, ini tora nidediri ourefeidebifa.✡ Col 3.21
Moimai rei tavoi rededi vene ma ini ourefeidededi vene
5 Moimai rei tavoi rededi vene, Keriso rofu regedi kana, ori ma tururu rena ma uka buni dudu, yi kono di ourefeidena amiye rofu ini ago neidefa.✡ Col 3.22–25 6 Amiye yaku ura regedi kana, ne rofu maka naivo ga refa, idu Keriso di moimai rei tavoi rededi vene kana, ye beika Sei ura redo bi uka meko noibanu dudu reyaganedi. 7 Uka ada dudu naivo refa, Varika amiye rofu kana, amiye rofu bi de. 8 Diba nifa ye beika vegu buni amiye yokoi yaku rego, bi Varika amiye rofu ini obini moigo, moimai rei tavoi redo amiye ba moimai rei tavoi de redo amiye.
9 Ma ourefeidena vene, mina ida yokoi makari, yi moimai rei tavoi rededi vene rofu moi ori regika biri rifa. Resi ya roada yi ourefeidena Amiye omari amesi ina rofu amiye yokoi bi buni ma yokoi bi buni de makai de mokedo, mina mokefa.✡ Deut 10.17; Col 3.25; 4.1
Sei di iya rena gugura tau noibanu
10 Sina metonari, Varika amiye ma ini isivaga tora iniye di vava dudu toga yeiva refo. 11 Sei di iya rena gugura noibanu akufa, ye ya kaya Bodaka di nirorotari rena mokena rofu are rei gira reyagane. 12 Adina una bi amiye rofu ruda de resifa, idu ourefeidena vene, vava nufa vene, mina kono di mukuna amededi vava ma oma sanari amededi vima no di vava, mina rofu ruda resifa. 13 Mina dada, Sei di iya rena varuka buaru moi akufa, ye meda no baegori, moi biri riyagane. Ma beika tau reyadiri, bi besa are rei gira rebigedi.
14 Mina resi, ago rama yi gagaba berota kana ukita risi mokena rorobo di kokoba fafa mereki gira akusi are refa.✡ Is 11.5; 59.17 15 Resi tamaka, ago buni di uka amuta di dogo rena kana, yi yuka rofu akufa.✡ Is 52.7 16 Mina tau noibanu fafau, mokena vari gira aena di mari moifa, ye mina dudu amiye no di fairo rededi ora tau noibanu kafegedi. 17 Ma moi vegu rina di ada bou gira ma Vima di bainasi moifa; mina bi Sei di ago.✡ Is 59.17 18 Meda tau noibanuri, Vima dudu, guriguri nina ma usa usa nina tau gade dudu usa nifa. Ye makai niduri rena noibanu dudu, toga nemoko kikisi Sei di vene tau noibanu fafau usa usa nibifa. 19 Resi na dada ka usa usa nibifa, ye sina nigika uka bubu dudu ago nigidari, bi na mago, ye ago buni di sui ago niokugida. 20 Na bi mina rofu ago moi raga rena seini ukita reyo amiye, ye uka bubu dudu niokugida, na ago niyagadu kana.
Metona yuata sina
21 Nai uka maida dubuini ma Varika amiye di vegu rama rena naivo redo amiye Tychicus yaku beika na rofu vata niyadi ma beika na reida, mina tau noibanu ya nioteimago, ye ya ka diba niyagane.✡ Acts 20.4; 2 Tim 4.12✡ Col 4.7–8 22 Makai dada ya rofu nifeidegida—una gokai resifa ya diba niyagane ma ina yaku yi uka egira reyaine.
23 Baba Sei ma Varika amiye Iesu Keriso yaku usika ourena uka amuta ma uka mana mokena vari gira aenasa ya maraine. 24 Uni Varika amiye Iesu Keriso koina de nina uka mana dudu, ini uka madedi vene noibanusa bi buni tora gade ameyaine.† Bura bedakai ka Rama nufa.