Ago buni
Matthew
yaku bura reyo
Ago di ini adina
Ago buni Matthew yaku bura reyo una rofu niyo Sei yaku nitore reyo Iesu bi uni Moi vegu rina amiye. Ma Sei yaku Iesu dudu ini nitore rena ago ini vene rofu moi rama aeyo. Mina ago buni bi Jew vene maka de, kaere Iesu bi ini fogori vata nisi amegamo, idu kono tora noibanu di vene rofu.
Matthew yaku ini buka bura rei mona reyo. Ini adinari bi Iesu di vata niyo meda, ini babatiso rena ma Satani yaku ini uka maina regika nivena di ago bura reyo. Resi bi ini ago ogau nina, oteimana, ma amiye moi buni rena moimai Galilee ri mina bura reyo. Gabi Iesu yava ika oto dina Galilee gutuna Jerusalem ri ma ini metona furari di vegu mina bukari bura reyo. Mina metona vegu bi satauro ikoko reyadi ma dadi rae reyo.
Mina buka di agori Iesu bi Oteimana amiye tora, kaere bi Sei di ago gira ini rama nina di vava nufa. Ina ka Sei di ourefeidena amena sana di ago oteimaro. Ini oteimana ago tau di bado tora 5 bi: (1) Omuna ikari ogau nina ago; mina ago bi Sei di ourefeidena amena sana omari vene di vegu, reremama, ma buni buni (koro 5—7); (2) Moimai rena oteimana ago gira usi dina vene 12 rofu (koro 10); (3) Sei di ourefeidena amena sana omari di mokena ago (koro 13); (4) Usi dina vegu di adina di oteimana ago (koro 18); ma (5) Ari metona ma Sei di ourefeidena amena sana omari dena di oteimana ago (koro 24—25).
Beika sina ideri
Iesu Keriso di tutubena imito rina ma vata nina sina 1.1—2.23
John Babatiso di moimai 3.1–12
Iesu babatiso reyo ma Satani yaku ini uka maina regika niveyo 3.13—4.11
Iesu moimai ariara Galilee ri 4.12—18.35
Galilee gutuna Jerusalem ri 19.1—20.34
Metona fura Jerusalem atafuri ma ini ideri 21.1—27.66
Varika amiye dadi rae resi amiye atafuri baeyo di ago 28.1–20
1
Iesu Keriso di tutubena
(Lk 3.23–38)
1 Mina bi Iesu Keriso di tutubena imito rina sina; ina bi David di tutubena, kaere bi Abraham di tutubena.
2 Abraham bi Isaac di baba, ma Isaac bi Jacob di baba, ma Jacob bi Judah ma ini dubuiyaka di baba niyo. 3 Judah bi Perez ma Zerah di baba (ini nono bi Tamar); Perez bi Hezron di baba niyo; Hezron bi Ram di baba; 4 Ram bi Amminadab di baba. Amminadab bi Nahshon di baba; Nahshon bi Salmon di baba. 5 Salmon bi Boaz di baba ma ini nono bi Rahab. Boaz bi Obed di baba niyo, ma ini nono bi Ruth. Obed bi Jesse di baba niyo; 6 Jesse bi kini David di baba.
David bi Solomon di baba niyo, ma ini nono sena bi Uriah di rema. 7 Solomon bi Rehoboam di baba niyo; Rehoboam bi Abijah di baba; Abijah bi Asa di baba. 8 Asa bi Jehoshaphat di baba niyo; Jehoshaphat bi Jehoram di baba; Jehoram bi Uzziah di baba. 9 Uzziah bi Jotham di baba niyo; Jotham bi Ahaz di baba; Ahaz bi Hezekiah di baba. 10 Hezekiah bi Manasseh di baba niyo; Manasseh bi Amon di baba; Amon bi Josiah di baba. 11 Mina ituari ini gagani gutuna nifeideyadi ma Babylon ri amegamadiri, Josiah bi Jehoiachin ma ini dubuiyakasa di baba niyo.✡ 2 Kgs 24.14–15; 2 Chr 36.10; Jer 27.20
12 Nifeideyadi ma Babylon amegamadi usi dinari Jehoiachin bi Shealtiel di baba niyo; Shealtiel bi Zerubbabel di baba; 13 Zerubbabel bi Abiud di baba. Abiud bi Eliakim di baba niyo; Eliakim bi Azor di baba; 14 Azor bi Zadok di baba niyo. Zadok bi Achim di baba niyo; Achim bi Eliud di baba; 15 Eliud bi Eleazar di baba. Eleazar bi Matthan di baba niyo; Matthan bi Jacob di baba. 16 Jacob bi Joseph di baba, Mary di maruka ina rofu Iesu vata niyo kaere roka niyadi bi Keriso.
17 Ye Abraham gutuna deyo David di tutubena bi 14; David gutuna amiye nifeideyadi ma Babylon ri amegamadi di tutubena ka bi 14, ma amiye nifeideyadi ma Babylon ri amegamadi gutuna Keriso vata niyo di tutubena ka 14.
Iesu Keriso gokai vata niyo
(Lk 2.1–7)
18 Ye, Iesu Keriso ini gokai vata niyo bi yomakai. Ini nono Mary bi Joseph nikau reyadi, idu gogo amena koderi bi, ma iniye Vima kikifa di vava dudu rivo niyo.✡ Lk 1.27 19 Ma ini nikau rumana Joseph bi mokena rorobo nufa amiye ye ina ura de Mary bi amiye di nemokori ini roka moi no rigo, ye inaike maka suiri nikau reyadi mina ukero vau rego di vonisi mokeyo. 20 Joseph mina mokegamori, Varika amiye di naivo naivo vima yaduka venari ogau nisi niyo, “Joseph, David di tutubena, Mary yi rema niyainedi bi megi bi ori ga re. Adina mina bi Vima kikifa di vava dudu rivo niyo. 21 Mina rumana mida moigori, ini roka nigiya bi Iesu* Iesu: Mina roka di ini adina bi “moi vegu rina.”—ini adina bi ina yaku ini vene di vegu no rededi gutuna erufusi moi vegu rigo.”✡ Lk 1.31
22 Mina tau vakoi vata niyadi bi beika Varika amiye yaku ini ago niyo amiye rofu niyo bi rama aego: 23 “Rumanasa varena kode rema yokoi yaku rivo nisi rumana mida odigo, ye ini roka nigedi bi Immanuel” (ini adina bi, “Sei bi unasa”).✡ Is 7.14
24 Joseph dadiyori, Varika amiye di naivo naivo vima yaku niyo kana Mary mesi ini yavari moi dui reyo. 25 Idu inasa gogo varena de boyo† Bura bedakai ka ini ourena nufa. rumana mida odiyo, ma Joseph yaku ini roka maro bi Iesu.✡ Lk 2.21