1 Mãwãnacarea Ãcõrẽba nãwã osia Abrahaʌ̃ba wãrãda ĩjã b̶ʌ cawaya. Idjia Abrahaʌ̃ra trʌ̃ jarasia:

–¡Abrahaʌ̃!–

Abrahaʌ̃ba panusia:

–¡Mʌ̃ra nama b̶ʌa!–

2 Maʌ̃ne Ãcõrẽba jarasia:

–Bʌ warra Isa ab̶abe quiruda bio quĩrĩã erob̶ʌda edaped̶a wãdua Moria druad̶aa. Mama mʌ̃a bʌ́a eyada jaradiaya. Maʌ̃ eyad̶e bʌa Isara mʌ̃́a babue diadua.–

3 Ara maʌ̃da Abrahaʌ̃ra diaped̶ed̶a pirab̶ariped̶a idjia edeida b̶ʌra burro ʌ̃rʌ̃ jʌ̃cuasia. Tʌbʌda b̶ʌasia idji warrara Ãcõrẽa babue diai carea. Maʌ̃be idji warra Isara, nezocarã sid̶a umé edesia Ãcõrẽba jarad̶a eyad̶aa.

4 Ewari ũbea babʌrʌd̶e Abrahaʌ̃ba dji eyara tʌmʌba unusia. 5 Maʌ̃ne idji nezocarãa jarasia:

–Nama panenadua. Burro sid̶a eropanenadua. Mʌ̃ra mʌ̃ warra ume awuá nocod̶aa wãnia Ãcõrẽa bia bed̶ead̶i carea. Mãwãnacarea bãrãmaa waya zed̶ia.–

6 Maʌ̃be Abrahaʌ̃ba dji tʌbʌra edaped̶a idji warra Isa equiad̶e cob̶ʌsia. Necoda, tʌbʌdau sid̶a edasia. Maʌ̃be umena ãbaa wãsid̶aa Ãcõrẽa ne babue diad̶i carea. 7 Wãbʌdad̶e Isaba Abrahaʌ̃a jarasia:

–¡Zeza!–

Abrahaʌ̃ba panusia:

–¿Cãrẽ, warra?–

Isaba iwid̶isia:

–Nama dadjia tʌbʌda, tʌbʌdau sid̶a eropanʌa baribʌrʌ ¿sãma b̶ʌ oveja zaque Ãcõrẽa babue diad̶ira?–

8 Abrahaʌ̃ba panusia:

–Warra, Ãcõrẽbʌrʌ oveja zaquera diaya babue diad̶i carea.–

Maʌ̃be nocod̶aa wãsid̶aa. 9 Ãcõrẽba jarad̶a eyad̶e jũẽnaped̶a Abrahaʌ̃ba mõgarada pã buesia Ãcõrẽa babue diabadada oi carea. Maʌ̃ ʌ̃rʌ̃ tʌbʌra cajẽrãped̶a idji warra Isara cabʌrá jʌ̃ped̶a tʌbʌ ʌ̃rʌ̃ cob̶ʌsia. 10 Maʌ̃be Abrahaʌ̃ba necora jʌwad̶e edasia idji warra beai carea. 11 Baribʌrʌ Ãcõrẽ nezocaba bajãneba trʌ̃ jarasia:

–¡Abrahaʌ̃, Abrahaʌ̃!–

Abrahaʌ̃ba panusia:

–Mʌ̃ra nama b̶ʌa.–

12 Maʌ̃ne bajãnebema nezocaba jarasia:

–Bʌ warrara bearãdua. Idjira ni maãrĩ biẽ́ orãdua. Bʌa id̶ibʌrʌ mʌ̃́a cawabisia bʌa Ãcõrẽra wãrãda waya b̶ʌda, bʌ warra ab̶abe quiruda Ãcõrẽa wãgaẽ́ diai bad̶a bẽrã.–

13 Abrahaʌ̃ba jẽda acʌbʌrʌd̶e oveja umaquĩrãda unusia. Maʌ̃ oveja cachura bacuru zaque jʌwated̶e jũẽ nũmasia. Ara maʌ̃da Abrahaʌ̃ra wãped̶a maʌ̃ ovejara jidasia. Maʌ̃drʌ Ãcõrẽa babue diasia idji warra cacuabari. 14 Maʌ̃ carea Abrahaʌ̃ba dji eyara trʌ̃ b̶ʌsia “Ãcõrẽba diabaria.” Maʌ̃ bẽrã hebreorãba wad̶ibid̶a jarabadaa: “Ãcõrẽba idji eyad̶e diabaria.”

15 Maʌ̃ne Ãcõrẽ nezocaba wayacusa bajãneba Abrahaʌ̃ra trʌ̃ jarasia. 16-17 Nãwã jarasia:

–Ãcõrẽba nãwã jara b̶ʌa: “Bʌ warra ab̶abe quiruda wãgaẽ́ diai bad̶a bẽrã, ara mʌ̃dji trʌ̃neba mʌ̃a wãrãneba jarabʌrʌa bʌra careba b̶aida. Mʌ̃a bʌd̶eba zocãrã yõbiya chĩdau zocãrã panʌ quĩrãca, pusa icawa ĩbʌ pichi zocãrã baraa quĩrãca. Maʌ̃ awara bʌd̶eba yõbʌdaba ãdji dji quĩrũ puru b̶eara jãrĩnia. 18 Bʌa mʌ̃ bed̶eara ĩjã od̶a bẽrã mʌ̃a bʌd̶eba yõbʌrʌd̶eba naʌ̃ ẽjũãne b̶ea purura jũma carebaya.”–

19 Mãwãnacarea Abrahaʌ̃ra jẽda wãsia idji nezocarã amenamaa. Mamaʌba ãbaa wãsid̶aa Beersebád̶aa. Mama Abrahaʌ̃ra b̶esia.

20 Mãwãnacarea Abrahaʌ̃ba ũrĩsia idji djaba Nacoba dji quima Milca ume warrarãda unusid̶ada. 21 Dji nabema warrara Uz abadjid̶aa. Maʌ̃are dji djaba Buzuda b̶asia. Buzuare Quemuelda b̶asia. Quemuelera Araʌ̃ zeza basía. 22 Idjab̶a Milcaba tosia Queseda, Hazoda, Pildáda, Jidlada, Betuel sid̶a. 23 Betuelera Rebeca zeza basía. Milcaba maʌ̃ ocho warrarãra Abrahaʌ̃ djaba Nacoa to diasia. 24 Nacoba dewara wẽrãda Reuma abadada erob̶asia. Reumaba tosia Tebada, Gahaʌ̃da, Tahada, Maacá sid̶a.