1 Abrahaʌ̃ra bio drõãda b̶asia idjab̶a Ãcõrẽba idjira ne jũmane careba b̶asia. 2 Ewari ab̶a Abrahaʌ̃ba idji nezoca dji dromada trʌ̃sia. Abrahaʌ̃ba ne erob̶ʌra maʌ̃ nezocaba jũma wagabadjia. Abrahaʌ̃ba idjía jarasia:

–Bʌ jʌwara mʌ̃ b̶acara edre b̶ʌdua mʌ̃́a wãrãneba jarai carea. 3 Maʌ̃be bajãne idjab̶a naʌ̃ ẽjũãne b̶ʌ Ãcõrẽ quĩrãpita mʌ̃́a jaradua bʌa mʌ̃ warra itea naʌ̃ Canaaʌ̃ druad̶ebema wẽrãda jʌrʌẽ́da. 4 Ãtebʌrʌ wãdua mʌ̃ b̶ad̶a druad̶aa mʌ̃ ẽberãrãmaa. Wãrãneba jaradua mamabema wẽrãda mʌ̃ warra Isa itea eneida.–

5 Maʌ̃ne dji nezocaba panusia:

–Baribʌrʌ dji wẽrãda mʌ̃ ume naʌ̃ druad̶aa ze quĩrĩãẽ́bʌrʌ ¿mʌ̃a bʌ warrara bʌ b̶ad̶a druad̶aa edeica?–

6 Abrahaʌ̃ba panusia:

–¡Mʌ̃ warrara jãmaa ederãdua! 7 Ãcõrẽ bajãne b̶ʌba mʌ̃ra nama enesia mʌ̃ zeza ded̶ebemada, mʌ̃ ẽberãrã druad̶ebemada. Ãcõrẽba mʌ̃́a wãrãneba jarasia idjia mʌ̃ warrarãa naʌ̃gʌ druada diaida. Ara maʌ̃ Ãcõrẽba idji bajãnebema nezocada bʌ na diabueya bʌa mʌ̃ warra itea mamabema wẽrãda enemãrẽã. 8 Dji wẽrãda bʌ ume ze quĩrĩãẽ́bʌrʌ, bʌra naʌ̃ wãrãneba jarad̶ad̶ebemada ẽdrʌya. Baribʌrʌ mʌ̃ warrara jãmaa ederãdua.–

9 Ara maʌ̃da dji nezocaba idji jʌwara Abrahaʌ̃ b̶acara edre b̶ʌsia. Maʌ̃ne wãrãneba jarasia Abrahaʌ̃ba jarad̶ara idjia oida. 10 Maʌ̃be dji nezocaba Abrahaʌ̃ nebiad̶ebemada quĩrãtanoa pesia dji wẽrã ẽberãrãa diai carea. Idjab̶a Abrahaʌ̃ cameyoda die edaped̶a Naco purud̶aa wãsia Mesopotamia druad̶e.* Naco. Genesi 11:27-31; 22:20-24. Mesopotamia. Maʌ̃ druara hebreo bed̶ead̶e Aram Najaraím abadaa. Genesi 25:20.

11 Wãbʌrʌd̶e Naco puru caita baido juebada uria corod̶ama jũẽne wãsia. Quewara jũẽna bẽrã dji nezocaba cameyora ʌ̃nãũnamãrẽã egode chũmebigasia. Maʌ̃ne wẽrãrãra baido jued̶e zesesid̶aa ãdjia ewariza obada quĩrãca. 12 Mãwã b̶ʌd̶e dji nezocaba Ãcõrẽa jarasia:

–Mʌ̃ Ãcõrẽ, mʌ̃ boro Abrahaʌ̃ Ãcõrẽ, mʌ̃a bʌ́a bed̶ea djuburiaya nane bʌa quĩrĩãneba mʌ̃ boro Abrahaʌ̃ra quĩrã djuburiamãrẽã idjab̶a mʌ̃ sid̶a carebamãrẽã. 13 Mʌ̃ra naʌ̃ baidoma b̶ʌa. Naʌ̃ purud̶ebema awẽrãra namaa baido jued̶e zebadaa. 14 Mʌ̃a ab̶aʌ awẽrãa jaraya: “Mʌ̃ quĩrã djuburia bʌ zocora egode b̶ʌped̶a mʌ̃́a baidoda diadua.” Maʌ̃ne dji awẽrãba mʌ̃́a doduad̶a aibʌrʌ, idjab̶a bʌ cameyoa bid̶a baidora diayad̶a aibʌrʌ, mʌ̃a cawaya bʌa maʌ̃ awẽrãra bʌ nezoca Isa itea erob̶ʌda. Mãwãbʌrʌ mʌ̃a cawaya bʌa mʌ̃ borora quĩrĩãneba careba b̶ʌda.–

15 Wad̶i Ãcõrẽa iwid̶i b̶ʌd̶e unusia awẽrãda zebʌrʌda. Idjia zocoda equiad̶e erob̶asia. Maʌ̃ awẽrãra Rebeca abadjid̶aa. Idjira Betuel cau basía. Betuelera Abrahaʌ̃ djaba Naco warra basía. Betuel papara Milca basía. 16 Rebecara bio quĩrãwãrẽã b̶asia idjab̶a wad̶i umaquĩrã adua b̶asia. Idjira baido juebada uriama jũẽsia. Maʌ̃be idji zocod̶e baidora tʌped̶a diguid̶aa wãbʌrʌ basía. 17 Maʌ̃ne Abrahaʌ̃ nezocara Rebecamaa pira wãped̶a jarasia:

–Mʌ̃ quĩrã djuburia, bʌ zocod̶ebema baidoda mʌ̃́a maãrĩ diadua.–

18 Maʌ̃ne Rebecaba jarasia:

–Dodua, mʌ̃ boro.–

Ara maʌ̃da idji zocora ed̶a edaped̶a idji jʌwad̶e erob̶ʌd̶e Abrahaʌ̃ nezocaa dobisia. 19 Dobid̶acarea jarasia:

–Bʌ cameyo itea bid̶a mʌ̃a baidoda jueya ãdjia do quĩrĩãbʌda quĩrãca dod̶amãrẽã.–

20 Ara maʌ̃da baido idji zocod̶e b̶ʌra animarãba dobadad̶e weasia. Weaped̶a b̶arima zocãrã baidora juesia jũmarã cameyoba dod̶amãrẽã. 21 Mãwã jue b̶ʌd̶e Abrahaʌ̃ nezocaba chupea acʌ b̶esia Ãcõrẽba maʌ̃ awẽrãra Isa itea wãrãda erob̶ʌ cawaya.

22 Cameyo baido doped̶ad̶acarea dji nezocaba Rebecaa pĩrũ oro od̶a bio nẽbʌa b̶ʌda quẽbʌd̶e jʌ̃mãrẽã diasia. Idjab̶a mania oro od̶a nẽbʌa b̶eada bio zʌgʌa b̶eada umé diasia. 23 Maʌ̃ne iwid̶isia:

–¿Bʌra cai cau? Mʌ̃ djuburia jaradua, ¿bʌ zeza dera bari b̶ʌca dai cãĩni carea?–

24 Rebecaba panusia:

–Mʌ̃ra Betuel caua. Betuelera Naco warraa. Idji papara Milcaa. 25 Dai dera bari b̶ʌa bãrã cãĩnamãrẽã, idjab̶a bʌ cameyoba cod̶amãrẽã baraa.–

26 Maʌ̃ carea dji nezocara chĩrãborod̶e cob̶eped̶a Ãcõrẽa bia bed̶easia. 27 Nãwã jarasia:

–Bia quirua Ãcõrẽ, mʌ̃ boro Abrahaʌ̃ Ãcõrẽ. Bʌa mʌ̃ boro Abrahaʌ̃ra quĩrã djuburiad̶eba wãrãda careba b̶ʌa. Mʌ̃ra od̶e jipa enesia idji ẽberãrãmaa.–

28 Maʌ̃ne Rebecara dji papa diguid̶aa pira wãsia. Jũẽped̶a Abrahaʌ̃ nezocaba jarad̶ara jũma nẽbʌrʌsia. 29-30 Rebecaba djabada erob̶asia Labaʌ̃ abadada. Maʌ̃ Labaʌ̃ba ũrĩsia idji djabawẽrãba nẽbʌrʌ b̶ʌda. Idjab̶a unusia idji djabawẽrãba pĩrũda quẽbʌd̶e jʌ̃ b̶ʌda, mania sid̶a jʌwaza jʌ̃ b̶ʌda. Maʌ̃ carea baido juebadamaa pira wãsia Abrahaʌ̃ nezoca jʌrʌd̶e. Jũẽbʌrʌd̶e unusia dji nezocara idji cameyo ume baido juebadama panʌda. 31 Maʌ̃ne Labaʌ̃ba jarasia:

–Ãcõrẽba careba b̶ʌ ẽberã, mʌ̃ diguid̶aa zedua. Bʌra ¿cãrẽ cãrẽã puru dajada b̶ʌ? Mʌ̃ dera b̶ʌa bʌ cãĩmãrẽã idjab̶a bʌ cameyo panani sid̶a b̶ʌa.–

32 Ara maʌ̃da dji nezocara Labaʌ̃ diguid̶aa wãsia. Jũẽnaped̶a Labaʌ̃ba cameyo ʌ̃rʌ̃ jʌ̃ b̶ead̶ara jũma ẽrãcuaped̶a ne cobigasia. Maʌ̃ awara baidoda jue diasia Abrahaʌ̃ nezoca ume zeped̶ad̶ara jĩrũ sʌgʌd̶amãrẽã.

33 Maʌ̃be Labaʌ̃ba ne cod̶amãrẽã diabisia baribʌrʌ Abrahaʌ̃ nezocaba jarasia:

–Mʌ̃ra poya ne coẽ́a mʌ̃a bed̶ea enena jarai naẽna.–

Labaʌ̃ba jarasia:

–Mãẽteara jaradua.–

34 Ara maʌ̃da dji nezocaba jarasia:

–Mʌ̃ra Abrahaʌ̃ nezocaa. 35 Mʌ̃ borora Ãcõrẽba bio careba b̶ʌ bẽrã idjira bio ne bara b̶ʌa. Ãcõrẽba idjía ovejada, pacada, parata torroda, oroda, nezoca umaquĩrãda, nezoca wẽrãda, cameyoda, burro sid̶a zocãrã diasia. 36 Maʌ̃ awara mʌ̃ boro quima Sara djora b̶ʌba umaquĩrã warrada tosia. Mʌ̃ boroba erob̶ʌra maʌ̃ warraa jũma diasia.

37 Idjab̶a mʌ̃ boroba mʌ̃́a wãrãneba jarabisia. Idjia nãwã jarasia: “Mʌ̃ra naʌ̃ Canaaʌ̃ druad̶e b̶abaria, baribʌrʌ mʌ̃ warra itea Canaaʌ̃nebema wẽrãda jʌrʌrãdua. 38 Ãtebʌrʌ mʌ̃ zeza druad̶aa wãdua. Mama wẽrã mʌ̃ ẽberãrãnebemada mʌ̃ warra itea jʌrʌd̶e wãdua.”

39 Maʌ̃ne mʌ̃a jarasia: “Dji wẽrãda mʌ̃ ume ze quĩrĩãẽ́bʌrʌ ¿mʌ̃a sãwã oi?” 40 Mʌ̃ boroba jarasia: “Mʌ̃ra Ãcõrẽ ume ewariza nĩbabaria. Ara maʌ̃ Ãcõrẽba idji bajãnebema nezocada bʌ ume diabueya bʌ wãbʌrʌma carebamãrẽã. Mãwã bʌa wẽrã mʌ̃ zeza b̶asi ẽberãrãnebemada mʌ̃ warra itea poya eneya. 41 Mʌ̃ ẽberãrãma jũẽnacarea ãdjirãba wẽrãda diad̶aẽ́bʌrʌ, naʌ̃ wãrãneba jarad̶ad̶ebemada bʌra ẽdrʌya.”

42 Maʌ̃da id̶i mʌ̃ra baido juebadama jũẽped̶a Ãcõrẽa nãwã iwid̶isia: Ãcõrẽ, mʌ̃ boro Abrahaʌ̃ Ãcõrẽ, carebadua mʌ̃a od̶e zed̶ara bia odjamãrẽã. 43 Mʌ̃ra naʌ̃ baidoma b̶ʌa. Awẽrãda baido jued̶e zebʌrʌd̶e mʌ̃a idjía jaraya: “Mʌ̃ quĩrã djuburia, bʌ zocod̶ebema baidoda maãrĩ diadua.” 44 Maʌ̃ awẽrãba mʌ̃́a doduad̶a aibʌrʌ, idjab̶a bʌ cameyoa bid̶a baidora diayad̶a aibʌrʌ, mʌ̃a cawaya bʌa maʌ̃ wẽrãra mʌ̃ boro warra Isa itea erob̶ʌda.

45 Wad̶i mʌ̃ sod̶e bed̶ea b̶ʌd̶e unusia Rebecaba idji zocora equiad̶e eronĩda. Idjira baido juebadamaa zeped̶a baidora juesia. Maʌ̃ne mʌ̃a idjía jarasia: “Mʌ̃ quĩrã djuburia baidoda diadua.” 46 Ara maʌ̃da zoco equiad̶e erob̶ad̶ara ed̶aa edaped̶a mʌ̃́a jarasia: “Dodua, idjab̶a bʌ cameyoa bid̶a baidora diaya.” Ara maʌ̃da mʌ̃a dosia. Idjab̶a mʌ̃ cameyoa bid̶a idjia baidora dobigasia.

47 Maʌ̃be mʌ̃a iwid̶isia: “¿Bʌra cai cau?” Idjia panusia: “Mʌ̃ra Betuel caua. Betuelera Naco warraa. Idji papara Milcaa.” Maʌ̃ carea mʌ̃a pĩrũda idji quẽbʌd̶e jʌ̃ b̶ʌsia. Mania sid̶a idji jʌwad̶e jʌ̃ b̶ʌsia. 48 Maʌ̃be mʌ̃ra chĩrãborod̶e cob̶eped̶a Ãcõrẽa bia bed̶easia. Mʌ̃ boro Abrahaʌ̃ Ãcõrẽa bia quiruad̶a asia. Idjia mʌ̃ra bia enesia mʌ̃ boro djaba ãĩzaqueda idji warra itea edemãrẽã.

49 Bãrãba mʌ̃ boroda wãrãda quĩrã djuburiad̶eba carebad̶ibʌrʌ, mʌ̃́a jarad̶adua Rebecara mʌ̃ ume diabued̶ida. Baribʌrʌ diabued̶aẽ́bʌrʌ jarad̶adua mʌ̃a cawa crĩchai carea.–

50 Maʌ̃ ũrĩnaped̶a Labaʌ̃ba Betuel bid̶a panusid̶aa:

–Maʌ̃gʌra wãrãda Ãcõrẽneba ze b̶ʌa. Maʌ̃ bẽrã daiba poya jarad̶aẽ́a bia b̶ʌda wa biẽ́ b̶ʌda. 51 Rebecara nama bʌ quĩrãpita b̶ʌa. Ededua idjira bʌ boro warra quima bamãrẽã Ãcõrẽba jarad̶a quĩrãca.–

52 Maʌ̃ bed̶ea carea Abrahaʌ̃ nezocara chĩrãborod̶e cob̶eped̶a Ãcõrẽa bia bed̶easia. 53 Maʌ̃be oro od̶ada, parata od̶ada, cacuad̶e jʌ̃bada sid̶a Rebecaa diasia. Idjab̶a nebia nẽbʌa b̶eada Rebeca djabaa, dji papaa bid̶a diasia. 54 Maʌ̃bebʌrʌ dji nezocara, idji ume zeped̶ad̶a sid̶a ne cosid̶aa. Ne cod̶aped̶a cãĩsid̶aa. Nurẽma pirab̶ariped̶a dji nezocaba jarasia:

–Mʌ̃ra idu wãbid̶adua mʌ̃ boromaa.–

55 Baribʌrʌ Rebeca djababa, dji papa bid̶a panusid̶aa:

–Rebecara wad̶ibid̶a die ewari dai ume b̶aida b̶ʌa. Mãwãnacarea bʌ ume wãida b̶ʌa.–

56 Maʌ̃ne dji nezocaba jarasia:

–Ãcõrẽba mʌ̃́a dji wẽrãda unubid̶a bẽrã mʌ̃ra nama dãrãbirãnadua. Mʌ̃ra idu wãbid̶adua mʌ̃ boromaa.–

57 Baribʌrʌ Rebeca djababa, dji papa bid̶a panusid̶aa:

–Mãwã baibʌrʌ, Rebecara trʌ̃nia cãrẽda jarai cawaya.–

58 Ara maʌ̃da Rebecara trʌ̃naped̶a iwid̶isid̶aa:

–¿Bʌra naʌ̃ ẽberã ume nawena wãica?–

Maʌ̃ne Rebecaba panusia:

–Mãẽ, mʌ̃ra wãya.–

59 Ara maʌ̃da Rebecara idji wagabari wẽrã ume idu wãbisid̶aa. Idjab̶a Abrahaʌ̃ nezocara, idji ume zeped̶ad̶a sid̶a idu wãbisid̶aa. 60 Maʌ̃ne Rebeca djabarãba idjira nãwã bia jarasid̶aa:

62 Maʌ̃misa Abrahaʌ̃ warra Isara Beer-Lajai-Roid̶eba zed̶ada Negue druad̶e b̶asia. 63 Ewari ab̶a quewara babʌrʌd̶e idjira drua pʌrrʌa nĩbasia.† Drua pʌrrʌa nĩbasia. Hebreo bed̶ead̶e maʌ̃ra ebud̶a b̶ʌẽ́a. Naʌ̃gʌrã crĩchada diaisicada: “Crĩcha jʌrʌd̶e wãsia”, “Ãcõrẽa ewari iwid̶id̶e wãsia”, “aujĩãne wãsia”, “idji achirã ume nẽbʌrʌd̶e wãsia” wa “bacuru zaqueda ud̶e wãsia.” Maʌ̃ne cameyoda zesebʌdada unusia. 64-65 Ara maʌ̃ne Rebeca cameyo ʌ̃rʌ̃ chũmʌba Isara unusia. Maʌ̃ bẽrã Rebecaba Abrahaʌ̃ nezocaa iwid̶isia:

–¿Cai awuá dadjirãmaa zebʌrʌra?–

Nezocaba panusia:

–Jãʌ̃ra mʌ̃ boro Isaa.–

Maʌ̃ bed̶ea ũrĩped̶a Rebecara cameyod̶eba ud̶aa b̶adosia. Mãwãped̶a idji quĩrãdarrara quẽbʌ daucha wuaba bʌrasia, Isa quima baida bed̶ea b̶ʌd̶a bẽrã.

66 Maʌ̃ne Abrahaʌ̃ nezocaba od̶ara jũma Isaa nẽbʌrʌsia. 67 Ara maʌ̃da Isaba Rebecara idji papa querasi wua demaa edesia. Mãwã Isaba Rebecara edaped̶a bio quĩrĩã b̶esia. Idjab̶a idji papa jaid̶ad̶a carea sopuara jõsia.