Fawu u e leta
ke Pol usuf Fan
Tesalonika
Orek famu
Leta igii Pol, Sailas ke Timoti rituul siit u usuf fan Tesalonika, aunbiing rituul kiis ta na Korin.
Pol i ongen u le fal lo ri iwu e wolwol kiri kunan paipaifis ke Iesu. Fal lo ri, ri tara le Iesu ka fis tah, i e wara ae Pol ka famalal ri ini paipaifis ke Iesu na leta igii. Ka fas ri le tom lek nagogon in tapiek famu ma ik lame fager in fuun e fanu. Namih, Iesu ik fis sabin ma ik nagogon foron tom tel sinang laulau.
Pol i fas ri sabin le gong ri tapiek foron tom angos, rin rakrakai tom na tel foron rokap na sinang.
Fawu u e Leta usuf fan Tesalonika i aragii:
1:1-2 Tanwara na leta igii
1:3-12 God in nagogon fanu
2:1-17 Taptapiek ken tom lek nagogon ma nami Iesu ik fis sabin
3:1-15 Keren tel foron rokap na foim ma gong kere angos
3:16-18 Farfarop na orek ke Pol
1
1 Aposel 17:1Ia Pol, Sailas ke Timoti, kemtuul sisiit usuf gam foron tom unune na Tesalonika, ae gam unune lo God Tama kerer ke Kumguui, Iesu Karisito.
2 Famais ke siaroh usuf gam sing God Tama kerer ke Kumguui Iesu Karisito.
Nagogon ke God usuf Fanu
3 Foron tualikmemtuul, i rokap le kemtuulen fotrokap la tom lo God isi gam. Ma i tortores tom le kemtuulen tel u arae, wara le unune kimi i laulaumet la ke famais kimi usuf temtem tikii lo gam i kuumkuum la. 4 Pesu, na fatpoton foron uh na tom unune ke God, kemtuul got la ini sinangun tifat kimi ke ini unune kimi na palgan foron tatawin turan fangungut ae gam famam kalsakai u.
5 Foron tier tikii igii, i famalal u le nagogon ke God i tortores. Ma wara na tifat kimi na foron tatawin ae gam kalsakai u isi matanfuntih ke God, ke God in foteng gam le gam tortores isi kau na matanfuntih kia. 6 God i tortores ma in ta fangungut usuf fanse ae ri ta fangungut usuf gam. 7 Ke in famange gam ae gam kalsakai fangungut ma in tel u sabin arae lo kemtuul, aunbiing Kumguui Iesu in tapiek tinbae na kukulii na karfian yiif turan foron rakrakai na angelo kia. 8 In ta fangungut usuf fanu ae biil ri usum lo God ke biil ri misuut na Rokap na Fafas ke Iesu Kumguui kirer. 9 Aisaia 2:10Rin kep fangungut ae biil ti farfarop lo ma Kumguui in babat ufu ri tina kiiskiis kia ke tina rakrakai kia ae ifuun ini memeh. 10 Tier igii in tapiek na aunbiing Kumguui in fis, isi kep memeh ke ususe fages sing fanu kalkaluu kia ae ri unune lo. Gam sabin tura ri, wara le gam ka unune ta na foron orek ae kemtuul fas ta gam ini.
11 I e wara, ae kemtuul ka sising mulmul usuf God kirer isi gam. Kemtuul sising le in lupes gam isi ifasi gamek mi na matngan liu ae i tawi pes ta gam isi. Ke na rakrakai kia, in lupes gam isi gamek tel fasuut foron rokap na foim ae gam ier isi tel u, ke foron tier tikii ae unune kimi i fatapiek u la. 12 Kemtuul sising arae, isi liu kimi ik ta memeh una asa Iesu Kumguui kirer ma i sabin ik ta memeh usuf gam, wara na famais ke God kirer ke Kumguui Iesu Karisito.