8
Isuba mantabinti mima mono yuga piye
1 Pigoya, pi kaeyo kamana'ama nkagowapa mayamawe: Monota paitaratanti kiyerepa mantabinti mima Tabe Wa'egawama nkaemu yabaera ayatakantisa auka'i mima, 2 mono yugawapa Koti nkaota namapi piye. Pi nkaota namapa taga mono namane. Pipa wasanama wanane. Wa'egawama ituru puma kintemine.
3 Pigoya, a'ya'ma monota paitanta kiye kina'miba Kotiti i'muntana atakena yugarape muta atakena yugarape uwaitaye. Pigoya, kiyarepa Isu aeba muta atagina kanarasaye. 4 We, mampara mono kiye kina mima, paisa ago kamana wasima muta atawe. Piya puntika, Isu aeba mampabi mintesinta, mabisa mono kiyenawapa kampa waintesine. 5 Eya, mantabinti taga mpono namapa waintegini, marapa igeba awame namantanaba puma mono kiye yugaba pewe. Piya, paipa Moseseba kairasa mono nama ituru pukena poganaba, Kotiba marupa maya omintiye: Amuti awame pugayakintosa puma a'ya'maenaba po, omintiye. 6 Piya, Karaisiti aeba mono kiye yugaba aogima puma, paisa mono kiye kina'mi ntuga igaintiye. Eya, utaratami ntanama pai uwaitanti ntanamapa asugasagina, Karaisiti ntugarasa Kotiti atokaeratakenaenama paisaenamapa asugasaye.
Kasa atokaekenaenama marusaenamapa asugasaye
7 Pigoya, marusa uwaitanti ntanamaba au'wantana aogima aborasinta, kasa'enagaba kampa utaratamisine. 8 Piya, Koti wasanamika abogana kampa kanarasaogana, maya untine:
Aintiba ka yagaba naeba Isureyo tupe Yuta tupe naeti atokaewaitakena au'wapa kasa'ena aborakuwe, Wa'egawamaba piya untiye, iye.
9 Piya, paisaena wanane. Kasa'ena aborakuwe, untiye, iye.
Piya, paipa iyabamagipa iyata u'ma, Isipi marisa ibaburite wama menkitauwagini wantane. Pi ntagaba kamana'nepa uwaitauwagini, atokaekenaenama nkagupi kampa mintantane. Piya pugu, naeba nakabiwaitantone, Wa'egawamaba piya untiye, iye.
10 Eya, ma ntagaba a'ya waka, Isureyo tu atokaekenaga to kakema mayama utawaitakuwe, Wa'egawama untiye:
Piya, ago kamana'nepa napiyenawaipi atakana waikiye, iye.
Eya, ago kamana'nepa igupi kaetakana waikiye, iye.
Piya, naeba ige Koti miyekini, igeba nae tu mpikibewe, iye.
11 Piya, ka ka kina'miba igora miye kina'mipa: Wa'egamakaba abibebe piyomaba, kampa uwaimikibewe, iye.
Eya, igeba iyo'mipa: Wa'egamakaba abibebe piyomaba, kampa uwaimikibewe, iye.
We, pi ntagaba a'ya'ma kina'miba, amana kinape tabe kinape, kaga nagabebe puma nagakibewe, iye.
12 Piya, pi ntagaba naeba nantara puwaitamagi ataenawaipa mae igasima, aguntaenawaikaba to kakema kampa napikuwe, Wa'egawamaba piya untiye, iye.
13 Piya, Kotiba kasa atokaekenaenaga untipa, marusaenaba abararawaye. Eya, marusa kamana'wapa karenara wama, nagarikena piye.