4
Loúchaguni Máfia Jesúsu
(Mr 1.12-13; Lc 4.1-13)
1 Ába lanǘgüni Sífiri Sándu Jesúsu lídoun fulásu mageírawati lun loúchaguni Máfia.
2 Lárigiñe leréderun Jesúsu bián-wein wéyu lúma bián-wein áriebu meíginga, ába lalámachun. 3 Ábati liábin Máfia lubádun, ába laríñagun lun lun loúchaguni.
—Ánjein liraǘ bubei Búngiu, salíguagüdabeí dǘbü le feínme.
4 Ába loúnabun Jesúsu.
—Taríñajare Lerérun Búngiu. “Mámarügübei táu fein labágarida gürígia, labágariduba gíñe láu sun dimúrei le laríñagubei Búngiu.”
5 Ábati lanǘgüni Máfia Jesúsu Jerusaléoun, ubúrugu le sándubei joun juríu, ába laweínragüdüni tábulugun témpulu, 6 ába laríñagun lun.
—Ánjein liraǘ bubei Búngiu, chubába yágiñe lun ǘnabun, ladǘga taríñajare Lerérun Búngiu.
Laríñaguba Búngiu joun láni ánjeligu lun joúnigirunibu.
Janǘgübadibu jájaburugu lun machúgeragun lan bugúdi luágu dǘbü.
7 Ába loúnabuni Jesúsu.
—Aríñagatu gíñe Lerérun Búngiu. “Moúchaguabeí Babúreme Búngiu.”
8 Ába lanǘgüni Máfia Jesúsu luágun ában wǘbü íñuti, ába larúfuduni sun arúeijani le uboúagubei lun, lúma buri luweírigun, 9 ába laríñagun lun.
—Níchugubei sun le bun ánjabu ájuduragua nun.
10 Ábati laríñagun Jesúsu lun.
—¡Beíba nueí, Máfia! ladǘga taríñajare Lerérun Búngiu. “Lúnrügüba Babúreme Búngiu bájuduragua, lúnrügüba gíñe besériwida.”
11 Ábati ladísedun Máfia lueí, ába jayábin ánjeligu esériwidei.
Lagúmeseruni Jesúsu luwádigimari, Galiléa
(Mr 1.14-15; Lc 4.14-15)
12 Dan le lagáambunbei Jesúsu luágu níjein lan Juan furísunrugu, ába lídin lárigoún Galiléoun. 13 Merédeti Nazarét, ába lídin agánawa Capernaúm, ában fulásu le lárubei dúna lídan jageíra rása le Zabulón lúma Neftalí. 14 Lasúseredunbei sun le lun lagúnfulirun le labǘrüjabeí meja Isaías, lé meja proféta.
15 Lageíra Zabulón lúma Neftalí,
lídan ǘma lubádu barána, lueígiñe oúbaü le ñígiñe lubeí láfuara wéyu libíti Jordán,
Galiléa le ñí lubei jagánawa ja mámabaña juríu.
16 Jugúya lé meja lídaanbei lubúriga aríjaadün ában oúnwenbun larúgounga,
jugúya lé meja lídaanbei lamúñounga le lánina oúweni,
jarúgoungagüdawaali jáu.
17 Lúmagiñe dan ligía, ába lagúmeserun Jesúsu apúrichija ñi ítara.
—Sáansi jumeí jigáburi, ladǘga yaráfaali larúeijan Búngiu.
Lagúarun Jesúsu joun gádürü esénijatiña lun lánime disípulugu
(Mr 1.16-20; Lc 5.1-11)
18 Eíbugeina líña Jesúsu láru láru dúna Galiléa, ligía laríjin bián gamúlenuguátiña, ában jádaangiñe, Simón le méme gíribei Pédro, le ában, Andrés. Esénijani jabágaribei, jáguruñati. 19 Ábati laríñagun Jesúsu joun.
—Falá jumana, ábame mesénijanjadün lan úduraü, anáajarügaadünme gürígia nun lun nánigume.
20 Furése furése ába jígirunun jasénin, ába joúdin lúma.
21 Lubáruaguoun mémeraü Jesúsu, ábaya laríjin bián gamúlenuguátiña, Jacóbo lúma Juan, lirájüñü Zebedéo. Tídaañanu ában ugúnein lúma jáguchi arámadajoun jasénin. Ába lagúarun Jesúsu joun lun lánime disípulugu, 22 lídan óra ligía ába jígirunun ugúnein, ígira jáguchi, ába joúdin lúma Jesúsu.
Larúfudajan Jesúsu joun sarágu gürígia
(Lc 6.17-19)
23 Ábajei leíbuguni Jesúsu sun Galiléa arúfudajeina tídan buri jalígilisin juríu to lídaanboun ságü fulásu. Ábaja lapúrichijani ugánu buíti luágu larúeijan Búngiu, areídaguagüda ligía sun luwúyeri sándi le jawáguti gürígia. 24 Ába lagaambúniwa luágu Jesúsu lídan sun Síria, ába janǘgüniña sun ja asúfurirubaña láu ámuñegueinarügü sándi, igárigu, ja gawágubaña lagǘbüri espíritu, ja goúwejadibaña, jáma ja derégüdaaña úgubu, ába lareídaguagüdüniña. 25 Sarágu jáña gürígia afálaruti Galiléagiñe, lídaangiñé buri fulásu Decápolisna, Jerusaléngiñe, loúbawagugiñe Judéa, lúma lueígiñe oúbaü le ñígiñe lubeí laboúcha wéyu libíti Jordán.