୨
ରକ୍ୟା ଡିଙ୍ଗ୍ଣ୍ଡ୍ରେ ଜିସୁ
୧ ଅ ନେଙ୍ଗ୍ନେ ଗଡ଼େଇଂ ଆପେକେ ନେଙ୍ଗ୍ନେ ଏନ୍ ଉଲିଆ ଗୁଆର୍ନେ ବିସୟ୍ ଏନ୍ ପଡ଼େଚେ ଡିରକମ୍ ଆରି ପାପ୍ ପେଡିଙ୍ଗ୍ ଣ୍ତୁ । ବାରି ପେଇଂ ଡିରକମ୍ ପେମ୍ୟାଏ ଜାଣ୍ଡେ ଜଦି ପାପ୍ ଡିଙ୍ଗ୍ଏ ନେ ନ୍ସା ଇସ୍ପର୍ନେ ଡାଗ୍ରା କେମା ଡିଙ୍ଗ୍ ନ୍ସା ମୁଇଂଜା ମ୍ନାପୁନ୍ୟବାନ୍ ରେମୁଆଁ ଲେଃକେ ମାପ୍ରୁ ଜିସୁ କିସ୍ଟ । ୨ ଆତେନ୍ କ୍ରିସ୍ଟ ନିଜେ ନେନେ ବାରି ସାପା ରେମୁଆଁ ଜାତିନେ ପାପ୍ କେମା ନ୍ସା ପାଙ୍ଗ୍ ଲେଃକେ ।
୩ ଇସ୍ପର୍ନେ ଆଦେସ୍ ପାଲନ୍ ଡିଙ୍ଗ୍ନେ ବାନ୍ ନେ ଡିଲାଡିଗ୍ ଆମେକେ ମ୍ୟା ନେଲେକେ । ୪ ଜଦି ଜାଣ୍ଡେ ବାସଙ୍ଗ୍ଏ “ନେଙ୍ଗ୍ ପର୍ମେସର୍କେ ମ୍ୟାନ୍ଲେକେ” ମାତର୍ ମେଁନେ ଆଦେସ୍ ପାଲନ୍ ଆଡିଙ୍ଗ୍ ଣ୍ତୁ ତେଲା ମେଁ ମୁଇଙ୍ଗ୍ ମିଚୁଆ । ମେଁନେ ଡାଗ୍ରା ସତ୍ ଣ୍ତୁ । ୫ ଡାଗ୍ଲା ଜାଣ୍ଡେ ଇସ୍ପର୍ନେ ସାମୁଆଁ ପାଲନ୍ ଡିଙ୍ଗ୍ଏ ମେଁନେ ଡାଗ୍ରା ଇସ୍ପର୍ନେ ଆଲାଦ୍ ସତେଆ ଲେଃକେ । ଏନ୍ ବାନ୍ ନେ ନେମ୍ୟାଏ ଜେ ନେ ମେଁନେ ଡାଗ୍ରା ନେଲେକେ । ୬ ପର୍ମେସର୍ନେ ଏତେ ନ୍ଲେଃକେ ଡାଗ୍ଚେ ବାସଙ୍ଗ୍ଏ ମେଁ ଜିସୁ କ୍ରିସ୍ଟନେ ରକମ୍ ଜିବନ୍ଜାପନ୍ ଡିଙ୍ଗ୍ଲେଃ ।
ତ୍ମିନେ ଆଦେସ୍
୭ ✡ ୨:୭ ଜହନ୍ ୧୩:୩୪.ଅ ନିଜର୍ ମୈତର୍ଇଂ ନେଙ୍ଗ୍ ପେଇଂନେ ଡାଗ୍ରା ମେଃଡିଗ୍ ତ୍ମି ଆଦେସ୍ ବିସୟ୍ରେ ନ୍ନାଗୁଆର୍କେ ଣ୍ତୁ, ମାତର୍ ଏନ୍ ସାପା ବାୱିର୍ ଆଦେସ୍ ଆଣ୍ଡିନେ ପେ ଅଃସେବାନ୍ ବାପେଲେକେ । ଆଣ୍ଡିନେ ବୁଦି ପେଇଂ ଅଁପେଲେକେ ଆତେନ୍ ଆଃ ବାୱିର୍ ଆଦେସ୍ । ୮ ମାତର୍ ଏନ୍କେ ମୁଇଂ ତ୍ମି ଆଦେସ୍ ରକମ୍ ଗୁଆର୍ଣ୍ଡିଂକେ ଏନ୍ ପେଇଂନେ ଡାଗ୍ରା ସତ୍ ଡାଗ୍ଚେ ତ୍ନାଏ । ତାଙ୍ଗ୍କିଗ୍ ଗୁଚେଡିଂକେ ବାରି ସତ୍ ତାର୍କିଗ୍ ତ୍ନାଡିଂକେ ।
୯ ଜାଣ୍ତେ ନିଜର୍ ବୟାଁକେ ଇଙ୍ଗ୍ଚେଚେ ବାସଙ୍ଗ୍ଏ ଜେ ମେଁ ତାର୍କିଗ୍ନ୍ନିଆ ଲେଃକେ ମେଁ ଏଃଜାକ ଡିଗ୍ ତାଙ୍ଗ୍କିଗ୍ନ୍ନିଆ ଲେଃକେ । ୧୦ ଜାଣ୍ଡେ ନିଜର୍ ବିସ୍ବାସ୍ ବୟାଁ ବାରି ତନାକେ ଆଲାଦ୍ ଡିଙ୍ଗ୍ଏ ମେଁ ତାର୍କିଗ୍ନ୍ନିଆ ଲେଃଏ ବାରି ମେଁନେ ଡାଗ୍ରା ଟେପ୍ଲଃନେ ମେଃଡିଗ୍ କାରନ୍ ଆଲେଃ ଣ୍ତୁ । ୧୧ ମାତର୍ ଜାଣ୍ଡେ ନିଜର୍ ବୟାଁ ଣ୍ତୁଲା ତନାକେ ଇଙ୍ଗ୍ଚେଏ ମେଁ ତାଙ୍ଗ୍କିଗ୍ନ୍ନିଆ ଲେଃକେ ବାରି ତାଙ୍ଗ୍କିଗ୍ନ୍ନିଆ ଅଲେଙ୍ଗ୍ଚେ ଆଣ୍ଡିପାକା ୱେଡିଙ୍ଗ୍କେ ଆତେନ୍ ଆମ୍ୟା ଣ୍ତୁ ଡାଗ୍ଲା ତାଙ୍ଗ୍କିଗ୍ ମେଁନେ ମ୍ମୁଁଆଃକେ କାନା ଆଡିଙ୍ଗ୍ ବକେ ।
୧୨ ଅ ଇସ୍ପର୍ ଗଡ଼େଇଂ, ପେଇଂନେ ଡାଗ୍ରା ଗୁଆର୍ଣ୍ଡିଂ, ଡାଗ୍ଲା କ୍ରିସ୍ଟନେ ମ୍ନି ନ୍ସା ପେଇଂନେ ପାପ୍ କେମା ଡିଙ୍ଗ୍କେ । ୧୩ ଅ ଆବାଇଂ ନେଙ୍ଗ୍ ପେଇଂନେ ଡାଗ୍ରା ଗୁଆର୍ଣ୍ଡିଂ; ଡାଗ୍ଲା ଜାଣ୍ଡେ ଅଃସେବାନ୍ ଲେଃକେ ଆମେକେ ପେଇଂ ମ୍ୟା ପେଲେକେ । ଅ ଙ୍ଗିରେଇଂ ନେଙ୍ଗ୍ ପେଇଂନେ ଡାଗ୍ରା ଗୁଆର୍ଣ୍ଡିଂ; ଡାଗ୍ଲା ପେଇଂ ପାପ୍ବାନ୍ ଜିତେ ପେଲେକେ ।
୧୪ ଅ ଗଡ଼େଇଂ ନେଙ୍ଗ୍ ପେଇଂନେ ଡାଗ୍ରା ଏନ୍ ଉଲିଆ ଗୁଆର୍ଣ୍ଡିଂକେ ଡାଗ୍ଲା ପେଇଂ କିତଂନେ ଆବାକେ ମ୍ୟା ପେଲେକେ । ଏ ଆବାଇଂ ନେଙ୍ଗ୍ ପେଇଂନେ ଡାଗ୍ରା ଗୁଆର୍ଣ୍ତିଂକେ ଡାଗ୍ଲା ଜାଣ୍ଡେ ଅଃସେବାନ୍ ଲେଃକେ ଆମେକେ ପେଇଂ ମ୍ୟା ପେଲେକେ ଏ ଙ୍ଗିରେଇଂ ନେଙ୍ଗ୍ ପେଇଂନେ ଡାଗ୍ରା ଗୁଆର୍ଣ୍ତିଂକେ ଡାଗ୍ଲା ପେଇଂ ବପୁବାନ୍ ବାରି ଇସ୍ପର୍ନେ ବ୍ନାଲିର୍ ପେଇଂ ଡାଗ୍ରା ଲେଃକେ ବାରି ପେଇଂ ପାପ୍ବାନ୍ ଜିତେ ପେଲେକେ ।
ମଞ୍ଚ୍ପୁର୍କେ ଆଲାଦ୍ ଆଡିଙ୍ଗେପା
୧୫ ପେଇଂ ମଞ୍ଚ୍ପୁର୍କେ ବା ଆତ୍ ଲେଃକ୍ନେ ବିସୟ୍ ଇଂକେ ଆଲାଦ୍ ପେଡିଂ ଣ୍ତୁ । ଜଦି ଜାଣ୍ଡେ ମଞ୍ଚ୍ପୁର୍କେ ବଲ୍ ବାଏ ତେଲା ଆବାନେ ଆଲାଦ୍ ମେଁନେ ଡାଗ୍ରା ଣ୍ତୁ । ୧୬ ଡାଗ୍ଲା ଗାଗ୍ଡ଼େନେ ଲାଲ୍ସା ମୁଆଁନେ ଲାଲ୍ସା ମଞ୍ଚ୍ପୁର୍ ବିସୟ୍ ବାରି ରେମୁଆଁନେ ଗରବ୍ ଏନ୍ ସାପା ବିସୟ୍ ଆବାନେ ଣ୍ତୁ । ମାତର୍ ମଞ୍ଚ୍ପୁର୍ବାନ୍ ପାଙ୍ଗ୍ଲେଃକେ । ୧୭ ମଞ୍ଚ୍ପୁର୍ ନସ୍ଟ ଡିଙ୍ଗ୍ଡିଙ୍କେ । ଏନ୍ ଏତେ ମଞ୍ଚ୍ପୁର୍ନ୍ନିଆ ଲେଃକ୍ନେ ବିସୟ୍ ଆଣ୍ଡେଙ୍ଗ୍ ଡିଙ୍ଗ୍ ନସ୍ଟ ଡିଙ୍ଗ୍ଡିଂକେ । ମାତର୍ ଜାଣ୍ଡେ ପର୍ମେସର୍ନେ ଇକ୍ଚା ପାଲନ୍ ଡିଙ୍ଗ୍ଏ, ମେଁ ମାଡାନେ ଜୁଗ୍ ଜାକ ମ୍ୱ୍ରଲେଃଏ ।
ଜିସୁନେ ସତ୍ରୁ
୧୮ ଅ ଗଡ଼େଇଂ ତେଃଡାନେ ଜୁଗ୍ ପିଙ୍ଗ୍ଚା ଡିଙ୍ଗ୍କେ । କ୍ରିସ୍ଟନେ ସତ୍ରୁ ପାଙ୍ଗ୍ନେ ବେଲା ଡିଙ୍ଗ୍ଡିଙ୍କେ ଡାଗ୍ଚେ ଅଁପେଲେକେ; କିସ୍ଟନେ ଗୁଲୁଏ ସତ୍ରୁ ଏବେ ତ୍ନାଡିଂକେ; ସତେଆ ତେଃଡାନେ ଜୁଗ୍ ଡାଗ୍ରା ପିଙ୍ଗ୍ଚାଡିଙ୍କେ ଡାଗ୍ଚେ ନେ ମ୍ୟାନେଲେକେ । ୧୯ ଆକ୍ମେଇଂ ସତ୍ରେ ନେନେ କୁଦାନେ ରେମୁଆଁ ଣ୍ତୁ ଆତେନ୍ ସା କ୍ମେଇଂ ଆନେକେ ଆତାର୍ ବିବ ଆର୍କେ ନେନେ କୁଦାନେ ଡିଙ୍ଗ୍ଲେଲା ମେଇଂ ନେନେ ଏତେ ପାଲେଆର୍ଏ; ନେବାନ୍ ସ୍ଲ ୱେନେବାନ୍ ମେଇଂ ନେନେ କୁଦାନେ ଣ୍ତୁ ଡାଗ୍ଚେ ଟିକ୍ ବାବ୍ରେ ଜାନାପଡ଼େଲେଃକେ ।
୨୦ ବାରି ପେଇଂ ଆତେନ୍ ପବିତ୍ର ରେମୁଆଁବାନ୍ ଦିକ୍ୟା ଡିଙ୍ଗ୍ ପେଲେଃକେସା ପେ ସାପାରେ ବୁଦି ବା ପେଲେକେ । ୨୧ ନେଙ୍ଗ୍ ପେଇଂନେ ଡାଗ୍ରା ଗୁଆର୍ନେ କାରନ୍ ଡିଙ୍ଗ୍କେ ? ପେଇଂ ସତ୍କେ ମ୍ୟା ପେଲେକେସା ନେଙ୍ଗ୍ ଜେ ପେଇଂନେ ଡାଗ୍ରା ଗୁଆର୍ଣ୍ତିଂକେ ଆତାନ୍ ଣ୍ତୁ । ମାତର୍ ପେଇଂ ସତ୍କେ ମ୍ୟାପେଲେକେ ଡାଗ୍ଚେ ଏନ୍ ଗୁଆର୍ଣ୍ଡିଂ ?
୨୨ ତେଲା ନାଲେ ବାସଙ୍ଗ୍ଣ୍ଡ୍ରେ ଜାଣ୍ଡେ ? ଜିସୁକେ ଉଦାର୍ କର୍ତା କିସ୍ଟ ଡାଗ୍ଚେ ଜାଣ୍ଡେ ଆବାସଙ୍ଗ୍ ଣ୍ତୁ, ମେଁ ମିଚ୍ ବାସଙ୍ଗ୍ଣ୍ଡ୍ରେ । ବାରି ମେଁ କ୍ରିସ୍ଟନେ ସତ୍ରୁ ଆବା ଇସ୍ପର୍ନେ ବାରି ମେଁନେ ଉଙ୍ଗ୍ଡେ ଜିସୁ ମ୍ୱାୟାକେ ମେଁ ଗ୍ରଅନ୍ ଆଡିଙ୍ଗ୍ ଣ୍ତୁ । ୨୩ ଆଣ୍ଡିନେ ରେମୁଆଁ ଉଙ୍ଗ୍ଡ଼େକେ ଗ୍ରଅନ୍ ଆଡିଙ୍ଗ୍ ଣ୍ତୁ ମେଁ ଆବାକେ ଡିଗ୍ ଗ୍ରଅନ୍ ଆଡିଙ୍ଗ୍ ଣ୍ତୁ । ଆଣ୍ଡିନେ ରେମୁଆଁ ଉଙ୍ଗ୍ଡ଼େକେ ଗ୍ରଅନ୍ ଡିଙ୍ଗ୍ଏ ମେଁ ମ୍ନାଃ ଆବାକେ ଡିଙ୍ଗ୍ ଗ୍ରଅନ୍ ଡିଙ୍ଗ୍ଏ ।
୨୪ ପେଇଂ ଅଃସେବାନ୍ ଆଣ୍ତିନେ ବୁଦି ବାପେଲେକେ ଆତେନ୍ ପାଲନ୍ ଡିଙ୍ଗ୍ପା । ପେ ଜଦି ଆତେନ୍ ବୁଦି ଅନୁସାରେ ପେବ୍ରୁଆ ପେଡ୍କେଃଏ ତେଲା ଆବା ପର୍ମେସର୍ ବାରି ଉଙ୍ଗ୍ଡ଼େନେ ଡାଗ୍ରା ପେଲେଃଏ । ୨୫ ଉଙ୍ଗ୍ଡେ ଆନେକେ ଏନ୍ ମାଡାନେ ପାରାନ୍ ମ୍ୱିଏ ଡାଗ୍ଚେ ପାର୍ମାନ୍ ଡିଙ୍ଗ୍ ବକେ ।
୨୬ ଜାଣ୍ଡେଇଂ ଆପେକେ ବାୟା ଆଡିଙ୍ଗ୍ ନ୍ସା ଚେସ୍ଟା ଡିଙ୍ଗ୍ ଆର୍ଏ ମେଁଇଂନେ ବିସୟ୍ରେ ନେଙ୍ଗ୍ ପେଇଂନେ ଡାଗ୍ରା ଏନ୍ ସାପା ଗୁଆର୍ମ୍ୱକେ । ୨୭ ଆପେକେ କିସ୍ଟ ଜିସୁ ମେଁନେ ପବିତ୍ର ଆତ୍ମାନ୍ନିଆ ବର୍ତି ଆଡିଙ୍ଗ୍ବକେ । ଆଣ୍ଡି ଜାକ ଏନ୍ ଆତ୍ମା ପେନେ ଆତ୍ମାନ୍ନିଆ ଲେଃଏ, ମେଇଂନେ ସିକ୍ୟା ମିଚ୍ ଣ୍ଡୁ, ବୁଦି ଗ୍ରଅନ୍ ଡିଙ୍ଗ୍ନେ ପେନେ ଦର୍କାର୍ ଣ୍ତୁ । ପବିତ୍ର ଆତ୍ମା ଆପେକେ ସାପା ବିସୟ୍ରେ ନିମାଣ୍ଡା ବୁଦି ବିଏ, ମେଁନେ ବୁଦି ମିଚ୍ ଣ୍ତୁ । ଆତେନ୍ ଆତ୍ମାନେ ବୁଦି ପାଲନ୍ ଡିଙ୍ଗ୍ଚେ କିସ୍ଟନେ ଏତେ ମିସେଚେ ଲାଲାପା ।
୨୮ ଏ ଗଡ଼େଇଂ କ୍ରିସ୍ଟନେ ଡାଗ୍ରା ମିସେଚେ ଲାଲାପା ତେଲା ମେଁ ଉଡ଼ିବେଲା ପାଙ୍ଗ୍ଏ ପେ ମାବ୍ଟକୁଟା ମେଁନେ ସାମ୍ନା ଡିଙ୍ଗ୍ ପେୟାଏ ଆତେନ୍ ଦିନା ପେଇଂ ଗିଆସ ପେଡିଙ୍ଗ୍ ଣ୍ତୁ । ୨୯ ନେ ମ୍ୟା ନେଲେକେ ଜେ କ୍ରିସ୍ଟ ନ୍ୟାୟ୍ ବିଃଣ୍ଡ୍ରେ । ଏନ୍ ଡିଗ୍ ନେ ମ୍ୟାନେ ନେଲେକେ ଜେ ଜାଣ୍ଡେଇଂ ସତ୍କାମ୍ ଡିଙ୍ଗ୍ଆର୍ଏ ମେଇଂ ଇସ୍ପର୍ନେ ଗଡ଼େଇଂ ।