ଥେସଲନିକୀୟମାନଙ୍କ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
ତେସଲନିକିୟଇଂନେ ଡାଗ୍ରା ପାଉଲ୍ନେ ଦୁତିୟ ଉଲିଆଃ
ତେସଲନିକିୟ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ତେସଲନିକିୟ ମଣ୍ଡଲି ଡାଗ୍ରା ୨ ଉଲିଆ ପ୍ରେରିତ୍ ପାଉଲ୍ ବାନ୍ ଗୁଆର୍ବଗେ ୧:୧ । ୧ ତେସଲନିକିୟନେ ଇତୁଡ଼ା ବେଲା ଇଡ଼ିଙ୍ଗ୍ କ୍ରିସ୍ଟନେ ଜନମ୍ନେ ୫୧ ମୁଆଃ ଇଡ଼ିଙ୍ଗ୍ ଆକେନ୍ ଉଲିଆ ଗୁଆର୍ବଗେ । ପାଉଲ୍ ଉଡ଼ିବେଲା ତେସଲନିକିୟ ମଣ୍ଡଲିକେ ଉଲିଆ ଗୁଆର୍କେ ଅଃତେନ୍ ବେଲା ମେଁ କରନ୍ଥିୟ ମଣ୍ଡଲିନ୍ନିଆ ଲେଃଗେ । ମୁଡ଼ି ମଣ୍ଡଲି ମେଁ ୨ ମିସ୍ନାରି ୱେନେ ତିଆର୍ ଡିଂବଗେ ପ୍ରେରିତ୍ ୧୭:୧-୧୦ ।
ପ୍ରେରିତ୍ ଉଲିଆଃନ୍ନିଆ ବାସଂବକେ ଜେ ଉଡ଼ିରୁଆ ଜିହୁଦି ବାରି ଗୁଲେରୁଆ ଗ୍ରୀକ୍ ବାସା ବାସଂଡିଂକ୍ନେ ରେମୁଆଁଇଂନେ ବାନ୍ ଆକେନ୍ ତେସଲନିକିୟ ମଣ୍ଡଲି ଆଃରେବଗେ । ତେସଲନିକିୟ ମଣ୍ଡଲି ଡାଗ୍ରା ଗୁଆର୍ବକ୍ନେ ଉଲିଆଃନ୍ନିଆ କ୍ରିସ୍ଟନେ ପାଙ୍ଗ୍ନେ ବାରି ସାରାସାରି ବେଲା ବିସଏରେ ଗ୍ନୁଆର୍ ଲେଃକେ । ଡାଗ୍ଲା ପାଉଲ୍ ମ୍ବାୟା ମେଁନେ ଉଲିଆଃନ୍ନିଆ ତେସଲନିକିୟ ମଣ୍ଡଲି ଡାଗ୍ରା ଆକେନ୍ ବାର୍ମୁଇଂତର୍ ପାଙ୍ଗ୍ନେ ବିସଏରେ ଗୁଲୁଏ ସାମୁଆଁ ଗୁଆର୍ବକେ । ୨ ତେସଲନିକିୟନ୍ନିଆ ଗ୍ନୁଆର୍ ବିସଏ ପାକାପାକି ବାକି ବିସଏ ସାରାସାରି ବେଲା ବିସଏରେ ଲେଃକେ । ପାଉଲ୍ ଣ୍ଡିଗ୍ ଅଲ୍ସୁଆ ବିସଏରେ ତରକ୍ ଆମ୍ୟାଃଡିଂକେ । ସର୍ତେ ରେମୁଆଁ ମେଁଇଂନେ କାଦି ନ୍ସା କାମ୍ ଡିଂନେ ଦର୍କାର୍ ୩:୬-୧୦ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପାଉଲ୍ ମେଁନେ ଉଲିଆଃନ୍ନିଆ ନିଜର୍ ବାରି ମିସୁଃଚେ ସ୍ଲେଣ୍ଡ୍ରେଇଂନେ ଆଃସାମୁଆଃଚେ ଆଃମୁଲେ ଡିଂକେ । ୧:୧-୨
୨. ବାରି ତେସଲନିକିୟ ମଣ୍ଡଲି ନ୍ସା ଇସ୍ପର୍କେ ଦନ୍ୟବାଦ୍ ବିଃଆରେ ଆରି ପାର୍ତନା ଡିଂଆର୍ଏ । ୧:୩-୧୨
୩. ଦର୍ତନିନେ ସାରାସାରି ବେଲା ବିସଏରେ ବାସଙ୍ଗ୍ଡିଂ । ୨:୧-୧୭
୪. ବାରି ମେଁ ଅଲ୍ସୁଆ ବିରଦ୍ରେ ବାରି ସ୍ଲେ ଡିଂନେ ବିସଏରେ ବାସଙ୍ଗ୍ଡିଂ । ୩:୧-୧୫
୫. ପାଉଲ୍ ବାର୍ମୁଇଂତର୍ ମଣ୍ଡଲିନେ ରେମୁଆଁଇଂକେ ସାର୍ଲଚେ ଆଃଡାଡିଂକେ । ୩:୧୬-୧୮
୧
୧ ✡ ୧:୧ ପ୍ରେରିତ୍ ୧୭:୧.ପାଉଲ୍ ସିଲ୍ୱାନ ବାରି ତିମତିନେ ତେସଲନିକିୟନ୍ନିଆ ଲେଃକ୍ନେ ରେମୁଆଁଇଂନେ ଆବା ଇସ୍ପର୍ ବାରି ମାପ୍ରୁ ଜିସୁ କିସ୍ଟନେ ବିସ୍ବାସି ମଣ୍ଡଲିକେ ଏନ୍ ଉଲିଆ । ଆବା ଇସ୍ପର୍ ବାରି ମାପ୍ରୁ ଜିସୁ କିସ୍ଟନେ ଲିବିସ ବାରି ସାନ୍ତି ଆପେକେ ଲେଲେ ।
୨ ନେନେ ଆବା ଇସ୍ପର୍ ବାରି ମାପ୍ରୁ ଜିସୁ କିସ୍ଟ ଆପେକେ ଲିବିସ ବାରି ସାନ୍ତି ବିଃଲେ ।
କ୍ରିସ୍ଟନେ ଆଗମନ୍ ବିଚାର୍
୩ ଅ ବୟାଁ ବାରି ତନାଇଂ ! ପେନ୍ସା ଇସ୍ପର୍କେ କାଲାଆଃ ଦନ୍ୟବାଦ୍ ବିଃନେ ନେନେ ଦର୍କାର୍ । ନେଃ ମନ୍ରେ ଆକେନ୍ ଡିଙ୍ଗ୍ନେ ଦର୍କାର୍ ଡାଗ୍ଚେ ନେନେ ମନେ ଡିଙ୍ଗ୍ନେଡିଙ୍ଗ୍ ମେସାଡାଗ୍ଲା ପେନେ ବିସ୍ବାସ୍ ବିନ୍ରେନ୍ନିଆ ମାଲେ ଡିଂଡିଙ୍ଗ୍କେ ବାରି ପେ ପେନେ ବିତ୍ରେ ଜାବର୍ ଆଲାଦ୍ ଡିଂପେଡିଂକେ । ୪ ତେସା ଇସ୍ପର୍କେ ପାର୍ତନା ଡିଙ୍ଗ୍ମ୍ୟାକ୍ନେ ମଣ୍ଡଲିଇଂ ଡାଗ୍ରା ଆପେକେ ଡୁଙ୍ଗ୍ୱେଚେ ନେନେ ଗର୍ବ ଡିଙ୍ଗ୍ନେଡିଙ୍ଗ୍ । ପେ ଡିରକମ୍ ସାପା ଦୁକ୍ ବାରି ତାଡ଼୍ନା ସମ୍ୱାଲେଚେ ନିଜେନେ ବିସ୍ବାସ୍ରେ ସ୍ଲ ନେୱେକେ ଣ୍ଡୁ । ଏନ୍ ସାମୁଆଁ ନେନେ ଗରବ୍ରେ ସାଃଚେ ବାସଙ୍ଗ୍ ନେମ୍ୟା ।
୫ ଏନ୍ ସାପାବାନ୍ ପାର୍ମାନ୍ ଡିଙ୍ଗ୍ଲେକେ ଜେ, ଇସ୍ପର୍ନେ ବିଚାର୍ ସତ୍ ବାରି ପେ ସାପାରେ ମେଁନେ ଇନିନ୍ନିଆ ପେୱେଗାଏ, ଡାଗ୍ଲା ଆତେନ୍ ଇନି ନ୍ସା ପେ ମ୍ଲେଡ଼ିଆ ପେଡିଂକେ । ୬ ମେଃନେ ନ୍ୟାୟ୍ ଡିଙ୍ଗ୍ଡିଙ୍ଗ୍କେ, ଇସ୍ପର୍ ଆତେନ୍ ସାପା ସମାଦାନ୍ ଡିଙ୍ଗ୍ଏ । ଜାଣ୍ଡେଇଂ ଏବେ ଆପେକେ ତାଡ଼୍ନା ଡିଂଆର୍ଡିଂକେ, ମେଇଂ ତାଡ଼୍ନା ବାଆର୍ଏ । ୭ ଇସ୍ପର୍ ପେନେ ଦୁକ୍ କସ୍ଟନେ ଆଃଡାଚେ ଆନେକେ ଡିଗ୍ ଉଦାର୍ ଆଃଡିଙ୍ଗ୍ଏ । ଇସ୍ପର୍ ଆକେନ୍ କାମ୍ ଆଃଡାଏ ଉଡ଼ିବେଲା ମାପ୍ରୁ ଜିସୁ ମେଁନେ ମ୍ନାବପୁ ଦୁତ୍ଇଂ ବିତ୍ରେ କିତଂବାନ୍ ଜାର୍ଆର୍ଏ । ୮ ଜାଣ୍ଡେଇଂ ଇସ୍ପର୍କେ ଆମ୍ୟାଃଆର୍କେ ବାରି ମାପ୍ରୁ ଜିସୁନେ ନିମାଣ୍ଡାସାମୁଆଁ ଅମାନ୍ୟ ଡିଂଆର୍ଡିଂକେ ଆତେନ୍ ରେମୁଆଁଇଂକେ ଡଣ୍ଡ୍ ବିଃନ୍ସା ମେଁ ଆତେନ୍ ବେଲା ଡୁଆକ୍ନେ ସୁଆ ସାଃଚେ ପାଙ୍ଗ୍ଏ । ୯ ଆତେନ୍ ରେମୁଆଁଇଂ ମାପ୍ରୁନେ ଡାଗ୍ରା ବାରି ମ୍ନାବପୁନେ ଆସିର୍ବାଦ୍ବାନ୍ ବିନେ ଡିଙ୍ଗ୍ଚେ ଜୁଗ୍ ଜୁଗ୍ ନ୍ସା ବିନସ୍ଟ ଡିଂଏ । ୧୦ ମାତର୍ ଆତେନ୍ ଦିନା ମେଁ ମେଁନେ ରେମୁଆଁଇଂନେବାନ୍ ବାରି ସାପା ବିସାସିଇଂନେବାନ୍ ସନ୍ମାନ୍ ବାରି ଗୌରବ୍ ବାଏରେ । ଆକ୍ମେଇଂନେବାନ୍ ପେ ଡିଗ୍ ପେକୁଡ଼େଏ ମେସାଡାଗ୍ଲା ନେନେ ଆପେକେ ମେଁ ସାମୁଆଁ ବିଃନେବଗେ ଆତ୍ଅରିଆ ପେଇଂ ସାପାରେ ବିସ୍ବାସ୍ ଡିଙ୍ଗ୍ ପେଡିଙ୍ଗ୍କେ ।
୧୧ ଆତେନ୍ସା ନେନେ କାଲାଆଃ ପେନ୍ସା ପାର୍ତନା ଡିଙ୍ଗ୍ ନେଡିଙ୍ଗ୍ । ଆପେକେ ବ୍ରୁଆ ଡିକେଃ ଡିଂନେନ୍ସା ଇସ୍ପର୍ ୱାବକେ ଆତେନ୍ ଡିଙ୍ଗ୍ନେସାଃ ନେନେ ଇସ୍ପର୍କେ ସାର୍ଲ ନେଡିଙ୍ଗ୍କେ । ମେଁନେ ବପୁରେ ମେଁ ପେନେ ସାପା ସତ୍ କାମ୍ ପୁରନ୍ ଆଃଡିଙ୍ଗ୍ଚେ ପେନେ ବିସ୍ବାସ୍କେ ଆମ୍ନାପା । ୧୨ ଦେକ୍ରକମ୍ ବାବ୍ରେ ନେନେ ଇସ୍ପର୍ ବାରି ମାପ୍ରୁ ଜିସୁ କିସ୍ଟନେ ଅନୁଗ୍ରଅବାନ୍ ପେ ନେ ମାପ୍ରୁ ଜିସୁନେ ମ୍ନିକ୍ନେ ଦନ୍ୟବାଦ୍ ଡିଙ୍ଗ୍ପେୟାଏ ବାରି ଆପେକେ ଡିଗ୍ ମେଁ ଗୌରବ୍ ଡିଙ୍ଗ୍ଏ ।
✡୧:୧ ୧:୧ ପ୍ରେରିତ୍ ୧୭:୧.