1 Inau tu dolovigho, Lord; Ighoe a nigua na pilupilu.

2 A Lord, nigua na vatu ngasi,

nigua na bona ni polo,

ma nigua na vavola;

nigua na God a nigua na vatu,

itatana tu topoa na pilupilu.

Gaia nigua na tako, te pilupiluu me righitaoniu.

3 Inau tu holoa va Lord, te manana na holohaba,

na pukuna gaia te vavolau itadira na ghagua na levunimate.

4 Na alo ni mate te utu talighutiu;

mana tave ni tataghalaghi te ghoghoro i vuvungagu.

5 Na sosodo ni mate te talighutiu;

mana ghilu ni mate te talua vaniu na taripiti.

6 Hauva ta nigua na vahaghitaili

inau tu tangi vania va Lord,

Eo, inau tu kokoeliulivuti vania va nigua na God ge ke hangau.

Gaia te rongoviu mai tana bonana te tabu;

nigua na tangi te saravia na kulina.

7 Vaho na maramana te anu me kahikahi;

na panatani na lei ghotu tara aleale;

ara anuanu na pukuna nina rutu God.

8 Na ahu te rughuhoru mai tana ihuna;

na lapilapi ni lake mamataghugha te tataghalaghi

te sosogha horu mai tana mangana;

mana gougovu te bera me vavu te rughuhoru mai tatana.

9 Gaia te hangavia na kokou me horu mai;

na pui tana sara ni marevona.

10 Gaia te haehaghe vuvungana na Cherubim,

me lovo dato tana vuvungana na parako

nia na ghata ni ghuri.

11 Gaia te poroa heghena nia na pui,

na pui ni uha te pa ku te talighutia.

12 Na mararana gaia te tona potaa na pui,

me dudura horu mai na lei gougovu ghala.

13 Vaho a Lord te kokoe horu mai kokou vagha na viviha;

na talama ni mangana te haba vule tara rongovia.

14 Gaia te nighi rana lei nina kuali

me havukaghinira na ghana levunimate;

me nia vetena vania na viti mara hughuhughu poto.

15 Vaho ta nimua na vevetena,

Ghe Lord, mi tana pogaana na ghuri ni aheahemu na horara te mamaha,

mana banatana na maramana tara pipili lee.

16 Gaia te hagalo horu mai kokou me vavolau,

gaia te holakeha datou tana tahi lalo.

17 Gaia te vavolau itadira na ghagua na levunimate mamata ghugha,

mi tadira gaira tara niu sika mara lagavuleu.

18 Gaira tara hughutiu

ge kara mateu tana bona inau tu labe,

hauva ma Lord te tabe datou.

19 Gaia te uhuliu va tana bona ni kabu mahebo;

Gaia te vavolau na pukuna te niu togotogo.

20 A Lord te tabau nia nigua na lutu uto;

a Lord te vuevugheu nia nigua na kabu maemane.

21 Na pukuna inau tu taonighi nina na lei vetena Lord;

Inau tu mua ririu keha sania nigua na God

mu ku taonia te dika.

22 Inau tu righitaoni ngangata nina vetena inaghogu,

inau tu mua lugu na righitaoniani nina vetena.

23 Inau tu maemane tana matana God;

inau tu mua lugu na righitaoniu heghegu tana tangotangodika.

24 A Lord te tabau nia nigua na lutu uto;

na pukuna te marabu na limagu,

te marabu tana matana.

25 Lord, ighoe to utuni vanira rahei tara taluutuni utunigho;

mo uto haliu vanira rahei tara maemane.

26 Ghe, Lord, ighoe to marabu

mo tategho vanira rahei tara marabu,

ma gaira tara dika, ighoe to kanahaghinira

27 Ighoe to vavolara tara talumuri,

mo vahaghitailira tara talunaghora heghedira.

28 Lord, ighoe to nia hevei mai na marara tana volagu;

mo ghuru kehaa na pungi itagua.

29 Ighoe to vaheu na laga ge ku vahaghitailira nia na ghagua na kana;

mana maana ge ku lagavulea didira pilupungisi.

30 Ma vania God, na halautuna te maemane.

Na lei nina baubahu Lord tara utuni.

Gaia na tako vanira rahei tara rei va itatana ge ke pilupilura.

31 A Lord heghena te God,

God heghena dida na pilupilu.

32 Gaia na God te vaheu na laga,

gaia te nea na halautugu ge tatavahale.

33 Gaia te righitaonighi na marevogu vaghaa na deer

gaia te righitaoniu tana lei tetete ni ghotu.

34 Gaia te gonidilau me naunauu na kisumate,

gaia te vaheu na laga ge ku nia va na baghe halo.

35 Ighoe to vaheu na takona nimua na vola kasila.

na lima madolomu te bereu,

me nimua na lio dolo te talu suleu.

36 Ighoe to goni okaa na halautuna na marevogu

ge kara bei turi madali.

37 Inau tu ghurutaonira na ghagua na kana mu lotira;

inau tu mua beto koekobe tu lagavulera.

38 Inau tu labu horura

ge kara mua tangomana na tughuru dato;

gaira tara tumu sara ni marevogu.

39 Ighoe to vaheu na laga ni kisumate;

gaia te vaheu na laga

ge ku nia vana na baghe halo.

40 Ighoe to nera ge ra ririu mara sama;

inau tu taghalaghinira tara niu sika.

41 Gaira tara holoa ahei ge ke hangara.

Hauva me taho ahei ke vavolara.

Gaira tara ngangaraha vania Lord,

hauva me mua bosa tughu vanira.

42 Nau tu pilepilera vaghaa na pughu ni pari te lovolaghinia na ghuri.

Inau tu halara va tana beti vaghaa na lololo.

43 Ighoe to neu ge u lagavulera tara huru tabou,

ighoe to viliu ge ku vunaghidira na lei kema;

na vure tu mua ghilalara tara vuha mai kabu

i sarana nigua na maana mara lutu vaniu.

44 Na vure tana kema keha tara tongaghi vaniu;

Gaira tara taoni vetena tana bona tara rongovia na mangagu.

45 Gaira udolu tara sivilaghinia didira na lio malaghai;

mara vuha ghebeghebe tana bona tara ghahara ga pitua na levunimate.

46 A Lord te vola!

holohabaa nigua na pilupilu!

tughuniladaa nina uto mana haba God te vavolau.

47 Gaia God te vaheu na lagavule

tadira na ghagua na levunimate;

Gaia te laga vulera na lei kema tana rurughugu.

48 Me vavolau tadira ghagua na levunimate.

Ghe Lord, ighoe to vaheu na lagavule tana ghagua na levunimate

mo pilupungisiu tadira tara kanahaghiniu.

49 Me vaghaa keri, Ghe Lord,

inau ku vahegho na holohaba tana ghobudira na lei kema;

mi nau ku linge rivurivu va tana ahamu.

50 Ighoe to vahea na lagavule sule nimua na vunaghi;

Ighoe to tatea na dolo te tona haliu

vania nimua na tinoni to vilia,

vania David mana vinavahuhuna ke va me va.