88
Na linge nina kemana Korah, linge taonia na tangi ni hinuluna, “na vahaghitaili.” Na maskil nina Heman tana kema ni Ezra
1 Lord God, ighoe to huioliu,
inau tu tangihia nimua na hahanga tana bongi mana dani.
2 Ko rongovia nigua na kokoeliulivuti, mo ko talu kulimu mai ta na tangi.
3 Na volagu te vonughia na gunaguna,
me dutuviu tua na mate.
4 Inau tu vaghara na balu tara dutu ni mate,
me taho tua siki laga itagua, ghobudira rana mate.
5 Inau tara sogha sania,
te vaghau na tinoni tara tavughia i lokana na gilu tara nia ponolio,
mara mua righi olia tua.
6 Ighoe to sonihoruu i borona ma gilu taho, te pungi gaa.
7 Nimua na rutu te mavatiu,
te vaghaa na karaha ni tahi te tumu savusavu mai tagua ge sukuu.
8 Ighoe to tiua kehara kulagu na vure itagua,
mo neu ge na mataghuniu,
gaira tara pilupiluu, mu mua tangomana ge ku soghapolo.
9 te nia pungi tua na matagu,
na tangi tu nea Lord,
tughu bongi tu nongia na hahanga itamua,
mu haudatoi vanigho gatu na limagu tana kokoeliulivuti.
10 Ighoe to tatei nimua na lei butuli vanira rana mate?
ma ra tughuru dato sughua mara holohabagho?
11 Kara tangomana so gaira tara mate,
ge kara ladavaghinia nimua dolo te mua soko?
pi tana bona ni haurake kara ladavaghinia nimua na utuni?
12 Na lei totobo uto to gonighi tua kara nighighi tana bona te pungi gaa!
Pa nimua hahanga kara ghilalaa tana komu te pariparilee?
13 Lord, inau tu tangi ni hahanga gatu itamua,
tughu roropo tu kokoeliulivuti gatu itamua.
14 Lord, e ghua ge o niu sika?
E ghua ge o ririu keha vaniu?
15 Vuivuni tana vahuagu mai tua tu vahaghitaili mu dutuvia na mate,
inau tu nia leboro na paparana nimua na totoro.
16 Nimua rutu papara te laga vulei,
ma nimua na gunaguna te dikalau.
17 Tana bongi udolu tara pilupiluu,
vaghaa na maumanu tara pilu pungisia.
18 Ighoe to nera tu dolovira mu dutuvira
ge ra ghogho saniu na pungi vamua te haidu koluu itaeni.