1 Lord, Ighoe na valemami haia, te hau mai tua.

2 I naghona to gonighi na lei ghotu,

po gonia na pari mana maramana

ighoe to God haia tua.

3 Ighoe to bosa vanighai ge kai oli tana hava tai va butu mai ga,

mo riu olighai tana pughu ni pari.

4 Na togha ni niulu te vaghaa sakai na bongi vamua itamua,

E vaghara i bongi vamua, te tona padi tua

me vaghaa na bona ni aho kukulu tana bongi.

5 Ighoe to lavikehaghai vaghaa na tave ni beti te mua kabu hau,

Tai vaghaa na buburu te suaka dato mai tana roropo.

6 Tana roropo te totobo dato mai me kotukotu,

mi tana nulavi te sasagha me mate.

7 Nimua na rutu te durakeghai,

mi ghai tai mataghunia na reirei ni matamu.

8 Ighoe to talutatei na lei palumami tai mata poloi,

gaighi to righighi mai so.

9 Na lei bongi ni volamami te kubolu horu mai,

na pukuna nimua na rutu,

me tovongo taghai vaghaa na ahu te ghurihia.

10 Te saravia vamua tana vitu hangavulu na niulu,

ma hei te laga te saravia e alu hangavulu na niulu.

Hauva, ma ra heghai vamua na vahola mana dikalio

me mua daro bona ma Ai mate tua.

11 A hei te vadangia na mataghu te heghai nimua na rutu?

A hei te ghilalaa na mataghu te neghai to rutu vanighai?

12 Ko taraighai ge kai ghilalaa na kukuluna na volamami te mua daro,

keri vaho ge kai manahagha.

13 Lord, ivei vaho tua ko nia sara na darona nimua rutu?

Ko arovighai ighai na lei nimua na vure ni lutu.

14 Ko kutighai nia nimua dolo tughu roropo

ge kai linge togotogo ta na lei bongi ni volamami.

15 Ko neghai mai ge kai ghoi togotogo ghua

murina te kaleghai na dikalio tana lei niulu.

16 Ko tatei vanighai mai ighai

nimua na lei ghairau nimua na lei lutu sule!

Mana lei vinavahuhumami kara righia nimua rongoragha.

17 God, nimami na Lord, nimua na lei vauto ke kabu itamami!

Ko neghai mai ge kai nighi tangomana na lei totobo tai gonighi.