1 Inau tu dolovia Lord, na pukuna te rongovighi,

me bosa tughui nigua na lei kokoeliulivuti.

2 Na pukuna te tualaghi tuturu me varongohiu,

mi nau ku kokoeliulivuti tana bona tu vola mua.

3 Na gilu ni mate mamataghugha te laga vuleu tua,

te talighutia na sosonogu.

Mi nau tu righia na vahola mana dika lio.

4 Inau tu holoa na ahana Lord,

Lord, Ko volau!

5 Gaia Lord te dolo, me uto lee!

dida na God te veiarovi!

6 Gaia Lord te pilupungisira gaira,

te pile didira na taluutuni,

vavolau inau tu dutu na mate.

7 Mi taeni nau tu aheahe,

gaia Lord te uto ngangata vaniu.

8 Me volau tana mate, na matagu tara karukolobu,

mana tuagu tara turi padi.

9 Inau ku sakusaku tua tana matana Lord,

tana bona ku ghahau iani maramana.

10 Inau tu taluutunigho, ge u kokoeliulivuti.

Inau te sule ngangata nigua na vahola Lord.

11 Ta nigua na ghanaghana dila inau tu ngangaraha vanigho,

na vure raini tara kikokiko!

12 Na hava ku hea Lord tana lei totobo te nei vaniu?

13 Nau tu talu datoa na seu te vaughilala ni huioli,

Inau ku holoutoa na ahana Lord, na pukuna te vavolau.

14 Inau ku pangotighi nigua na baubahu vania Lord, tana maladira nina vure.

15 A gaira tara uto mate, Lord te dolovira,

me dika lio tana bona tara mate.

16 Lord, Inau nimua na tinoni ni lutu.

Eo, nimua na tinoni, na dalena nimua na tinoni lutu.

Mi ghoe ko tatavahaleu ta nigua na kabu pipiti!

17 Inau ku vahegho na sukaghi ni holouto,

mu ku holoa nigua na ahana Lord.

18 Inau ku pangotighi nigua na baubahu vania Lord, tana matadira nina vure.

19 Tana valena Lord, i lokana Jerusalem.

Holoutoa Lord!