7
Kara pungisira nina vure God
1 Mi murina keri, inau tu righira ra vati na angel tara tughuru tana vati na piuna na maramana, tara tabe betoi ara vati na mata ni ghuri tara lovulovu mai tana pari mana tahi, mana lei ghai. Jeremiah 49:36; Daniel 7:2; Zechariah 6:5 2 Ma God te vahera na maana ge kara dikalai na pari mana tahi. Keri ge inau tu righia sakai na angel keha te va mai tana bona na aho te sogha dato, te holaa nina lagholagho God te vola. Ma gaia te nia ghaeghahe nia na manga sule vanira gaira e vati na angel, 3 “Pitu! Bei taghalaghinia gea mua na pari, mana tahi, mana lei ghai, polo kai talui nina vaughilala God tana sopa raedira* nina vaughilala God tana sopa raedira Na vaughilala keri te loghoa na ghanaghana ilokana God te righitaonira rana taluutuni soko, me hangara ge kara tughuru ngasi tana na vahaghitaili eni. Righia Ezekiel 9:4, 6; Matthew 24:22. nina lei tinoni lutu. 4 Inau tu rongovira e ngiha na vure gaira tara talu vaughilaladira nia nina vaughilala God. Gaira tara kaekage sakai hangalatu vati hangavulu vati na togha (144,000)† 144,000 Na ghanaghana ilokana na lei tinoni taluutuni soko tara tughua rana vure ni Jew tara mua taluutuni tana nina vure God, te vagha hiua na tete. tara talu vaughilaladira tana lei kema ni Israel:
5 Tana kemana Judah hangavulu erua na togha (12,000),
Tana kemana Reuben hangavulu erua na togha (12,000),
Tana kemana Gad hangavulu erua na togha (12,000),
6 Tana kemana Asher hangavulu erua na togha (12,000),
Tana kemana Naphtali hangavulu erua na togha (12,000),
Tana kemana Manasseh hangavulu erua na togha (12,000),
7 Tana kemana Simeon hangavulu erua na togha (12,000),
Tana kemana Levi hangavulu erua na togha (12,000),
Tana kemana Issachar hangavulu erua na togha (12,000),
8 Tana kemana Zebulun hangavulu erua na togha (12,000),
Tana kemana Joseph hangavulu erua na togha (12,000),
Tana kemana Benjamin hangavulu erua na togha (12,000).
Na vure subo tara holohabaa God
9 Mi murina keri, inau tu righira na vure subo, te vahola ngangata na idumiadira. Na vure rakiri tara mai tana lei komu udolu, tana lei kema, mi tana lei leu soko tana maramana, mara tughuru inaghona na malei sopou ni vunaghi haba, maia na Dale Sheep. Gaira tara nighi pupulu na tivi pura, mara tabei na ghaba ni niuniu. 10 Ma gaira tara nia ghaeghahe na manga sule, “Dida na God ivuvungana na malei sopou ni vunaghi haba, mana Dale Sheep, toro vavolaghita!”
11 Ma gaira na lei angel udolu tara tughuru talighutia na malei sopou ni vunaghi haba, ma gaira lei mane nagho, mara vati na totobo vola ghua. Ma gaira tara poghotao horu kikinima inaghona na malei sopou ni vunaghi haba, mara holohabaa God. 12 Mara bosa,
“Eo ke ghaghua igaa! Na vauto, na rongoragha, mana manaha, na holouto, na kikinima, na maana mana lagavule nina dida na God ke va me vaa. Amen!”‡ Eo ke ghaghua igaa ... Amen Na ghanaghana ilokana ‘Amen’ te vagha ‘Eo ke ghaghua igaa.’
13 Ma sakai tadira erua hangavulu vati na mane nagho te huatiu, “?Ahei gaira tara pupulu pura raini, mi vei tara va butu mai?”
14 Mi nau tu bosa tughu vania, “Mane Nagho, ighoe to ghilalaa.”
Ge bosa vaniu, “Agaira raini tara tughuru ngasi tana taluutuni tana bona ni gunaguna sule. Daniel 12:1; Matthew 24:21; Mark 13:19 Ma gaira tara apoi didira pupulu tana ghabuna na Dale Sheep, me va marabui.§ apoi didira pupulu tana ghabuna na Dale Sheep Na ghanaghana ilokana na mateana Jesus Christ te lavikehai na lei paludira rana vure tara taluutunia. Righia Daniel 12:1; Matthew 24:21; Mark 13:19 15 Mana pukuna keri, tara tughuru inaghona nina malei sopou God, mara gehegehe vania tana bongi mana dani, lokana nina Valetabu. Ma gaia te sopou vuvungana na malei sopou ni vunaghi haba ke kabu ighobudira, me righitaonira. 16 Ma gaira kara mua vitolo, ma kara mua ghoi mamangaha ghua. Mana aho mana na lei totobo te papara kara mua vahaghitailira, Isaiah 49:10 17 na pukuna na Dale Sheep te tughuru inaghona na malei sopou ni vunaghi haba, ke righitaonira te vagha na puku ni vatogha sheep. Agaia ke hulira va tana lei beti vuravura te vola. Ma God ke ghudurikehai na lei kolobu ni matadira. Buka Linge 23:1; Ezekiel 34:23; Buka Linge 23:2; Isaiah 49:10; 25:8
7:1 Jeremiah 49:36; Daniel 7:2; Zechariah 6:5
*7:3 nina vaughilala God tana sopa raedira Na vaughilala keri te loghoa na ghanaghana ilokana God te righitaonira rana taluutuni soko, me hangara ge kara tughuru ngasi tana na vahaghitaili eni. Righia Ezekiel 9:4, 6; Matthew 24:22.
†7:4 144,000 Na ghanaghana ilokana na lei tinoni taluutuni soko tara tughua rana vure ni Jew tara mua taluutuni tana nina vure God, te vagha hiua na tete.
‡7:12 Eo ke ghaghua igaa ... Amen Na ghanaghana ilokana ‘Amen’ te vagha ‘Eo ke ghaghua igaa.’
7:14 Daniel 12:1; Matthew 24:21; Mark 13:19
§7:14 apoi didira pupulu tana ghabuna na Dale Sheep Na ghanaghana ilokana na mateana Jesus Christ te lavikehai na lei paludira rana vure tara taluutunia. Righia Daniel 12:1; Matthew 24:21; Mark 13:19
7:16 Isaiah 49:10
7:17 Buka Linge 23:1; Ezekiel 34:23; Buka Linge 23:2; Isaiah 49:10; 25:8