3
ኣዚናባኔ ማቺባ
1-2 ሄሳዳካ፥ ማቼቶ፥ ሂንቴ ኣዚናታፔ ፆሳ ቃላስ ኪቴቶናይሳቲ ዴዒኮካ ኣይኮካ ኦዴቶናሺን፥ ሂንቴ ያሻቴꬃኔ ሂንቴ ጌሻ ዴዑዋ ቤዒዲ ኣማናና ሜላ ኤንታው ሃሬቲቴ። ኤፌ 5፡22፤ ቆላ 3፡18 3 ሂንቴ፥ ሂንቴ ሁዔ ፒፆኒኔ ዎርቃ ኣሶን ዎይኮ ሎዖ ማዖን ሂንቴ ቦላ ኣሳቴꬃ ሎይሶን ጊዶፖ። 1ፂሞ 2፡9 4 ሺን ሂንቴ ዎዛና ጊዶን ዴዒያ ዬጌልሳቴꬃይ ፆሳ ሲንꬃን ሂንቴው ዳሮ ኣልዖ ጊዲዲ ꬋዮና፥ ኣሽኬኔ ዎፑ ጊዳ ኣያና ጊዶ። 5 ፆሳይ ኢማና ጊዳይሳ ኣማኒዳ ጌሻ ማጫሳቲ ቢኒ ዎዴ ባንታ ኣዚናታስ ሃሬቲዲ፥ ባንታና ሄሳዳ ዳሮ ሎይꬂዶሶና። 6 ሄሳዳ ሳራ ኣብራሃሜ፥ «ታ ጎዳው» ያጋዳ ፄጋሼ፥ ኢያው ኪቴታሱ፤ ሂንቴካ ኣይኮካ ያዮና ሎዖባ ኦꬂኮ ኢ ናይታ። ሜꬌ 18፡12
7 ኣዚናቶ፥ ሂንቴ ማቼቲ ሂንቴፌ ዳቡራንቾ ሜꬌታ ጊዴይሳ ኤሪዲ፥ ኤንታና ቦንቺቴ፤ ሂንቴ ዎሳ ꬉቦና ሜላ ፆሳይ ኢሚዳ ዴዑዋ ኤንቲ ሂንቴራ ኢሲፌ ላቲያ ጊሾ ኤንታ ቦንቺቴ። ኤፌ 5፡25፤ ቆላ 3፡19
ሎዖ ኦꬂዲ ሜቶ ኤኮ
8 ዉርሴꬃን፥ ኡባይ ኢሲ ቆፋን ዴዒቴ። ኢሶይ ኢሱዋስ ቃꬌቲሼ፥ ኢሻዳ ሲቄቲቴ፤ ቃሲ ኢሶይ ኢሱዋስ ኬሃታኔ ኣሽኬታ ጊዲቴ። 9 ኢታ ጊሾስ ኢታ ዎይኮ ጫሻ ጊሾ ጫዪዲ ዛሮፒቴ፤ ሄሳ ኣጊዲ፥ ፆሳይ ሂንቴው ኣንጁዋ ኢማናው ሂንቴና ፄጊዳ ጊሾ ኣንጂቴ። 10 ኣይስ ጊኮ፥ ጌሻ ማፃፋይ፥
«ዴዖ ዶሴይኔ ሎዖ ዎዴ ቤዓናው ኮዬይ ኦና ጊዲኮካ ባ ኢንፃርሳን ኢታባኔ ዎርዶ ኦዴቴይሳ ኣጎ። ማዝ 34፡12-16
11 ኢታባ ኦꬄይሳ ኣጊዲ ሎዖባ ኦꬆ፤
ሳሮቴꬃካ ኬሂ ኮዮኔ ካሎ።
12 ጎዳ ኣይፌይ ፂሎታኮ ፄሌስ፤
ቃሲ ኢ ኡባ ዎዴ ኤንታ ዎሳ ሃይዜስ።
ሺን ጎዳይ ኢታባ ኦꬄይሳታ ባ ሃንቆ ሶምዑዋን ፄሌስ»
ያጌስ።
13 ሂንቴ ሎዖባ ኦꬃናው ኣሞቲኮ ሂንቴና ቆሃናይ ኦኔ? 14 ሃሪ ኣቶሺን፥ ፂሎቴꬃ ጊሾ ሂንቴ ዋዬቲኮ ኣንጄቲዳይሳታ። ኣሳስ ያዮፊቴኔ ሂርጎፊቴ። ማቶ 5፡10፤ ኢሳ 8፡12-13 15 ኪሪስቶሳ ሂንቴ ዎዛናን ቦንቺቴኔ ጎዳዪቴ። ፆሳይ ሂንቴው ኢሚዳ ኡፋይሳስ ጋሶ ኦይቺያ ኦዴስካ ዛሮ ኢማናው ኡባ ዎዴ ጊጊ ኡቲቴ፥ ሺን ሄሳ ኣሽኬቴꬃኒኔ ያሻን ኦꬂቴ። 16 ቃሲ ኪሪስቶሳን ሂንቴ ዴዒያ ሎዖ ዴዑዋ ኢታባ ኦꬂዳባዳ፥ ሂንቴና ጫያ ኣሳይ ዚጊርያባን ዬላታና ሜላ ሂንቴ ካሃይ ጌሺ ጊዶ። 17 ፆሳይ ጊዳባ ጊዲኮ ኢታባ ኦꬂዳ ጊሾ ዋዬ ኤኬይሳፌ ሎዖባ ኦꬂዳ ጊሾ ዋዬ ኤኬይሲ ሎዖ። 18 ኪሪስቶሲ ኑና ፆሳኮ ሺሻናው ባው ፂሎ ጊዲዲ ዴዒሼ፥ ናጋራንቾታ ጊሾ ኢሲ ቶሆ ናጋራ ኡባስ ሃይቂስ፤ ኢ ባ ኣሳቴꬃን ሃይቂስ፥ ሺን ኣያናን ፓፂስ። 19 ቃሲ ሄ ኣያናን ኢ ቢዲ ቃሾን ዴዒያ ሼምፖታስ ቃላ ኦዲስ። 20 ኖሄይ ማርካቢያ ኬፂያ ዎዴ ሄ ሼምፖቲ ፆሳስ ኪቴቶና ኢፂዶሶና፥ ሺን ፆሳይ ኤንታና ዳንዳዒስ። ሆስፑን ኣሳ ፃላሊ ማርካቢያን ጌሊዲ፥ ꬋዮ ሃꬃፌ ኣቲዶሶና። ሜꬌ 6፡1-7፡24 21 ሄ ꬋዮ ሃꬃይ ሃዒ ሂንቴና ኣሺያ ፂንቃቴ ሌሚሶ ጊዲስ። ሃ ፂንቃቴይ ቦላ ቂታ ሜጮ ጊዶናሺን ሎዖ ካሃ ፆሳፌ ኤካናው ኢያ ዎሲያ ኦጌ ጊዲዲ፥ ኪሪስቶሳ ዴንዱዋ ባጋራ ሂንቴና ኣሼስ። 22 ኢ ሳሎ ቢዲ ፆሳ ኡሻቻን ኡቲዲ፥ ኪታንቾታ፥ ማታ ኣዋታኔ ዎልቃማታ ሃሬስ።