1 ሄሳፌ ጉዬ፥ ዶርሳይ ፂዮኔ ዴሪያ ቦላ ኤቂዳይሳ ቤዓስ። ኢያራ ኢያ ሱንꬃይኔ ኢያ ኣዋ ሱንꬃይ ኤንታ ሶምዖን ፃፌቲዳ፥ 144፥000 ኣሳይ ዴዔስ። ሂዝ 9፡4፤ ዮ.ቆ 7፡3 2 ሳሎፔ ጊታ ሃꬃ ጉንꬁኔ ዳዳ ጉንꬁ ዳኒያ ዎልቃማ ጊርሲ ሲዓስ። ቃሲ ታ ሲዒዳ ጊርሳይ ዲꬂ ዲፂሺን ሲዔቲያ ጊርሳ ሜላ። 3 144፥000 ኣሳይ ኣራታ ሲንꬃን፥ ኦይዱ ዴዖን ዴዒያ ሜꬌቴꬃታ ሲንꬃኒኔ ጪማታ ሲንꬃን ኤቂዲ ኤንታፌ ሃራ ኦኒካ ታማራናው ዳንዳዖና ኦራꬃ ማዝሙሬ ዬፂዶሶና። 4 ሃይሳቲ ማጫሳራ ባንታና ቱኒሶና ናጊዳ ጌሻታ። ኤንቲ ዶርሳይ ቢያሶ ኡባ ካሎሶና። ኤንቲ ፆሳሲኔ ዶርሳስ ባይራ ጊዲዲ፥ ሺቃናው ሳዓ ኣሳ ጊዶፌ ዎዜቲዶሶና። 5 ኤንቲ ዎርዶይኔ ቦሬይ ባይና ኣሳታ። ሶፎ 3፡13

6 ሄሳፌ ጉዬ፥ ሜሪና ዎንጌላ ሳዓ ቦላ ዴዒያ ካዎቴꬃ ኡባስ፥ ዜሬꬂ ኡባስ፥ ያራ ኡባሲኔ ዱማ ዱማ ዶና ኡባስ ማርካታናው ሳሎራ ፒራꬊያ ሃራ ኪታንቾ ቤዓስ። 7 ሄ ኪታንቾይ ባ ቃላ ꬎቁ ኦꬂዲ፥ «ፆሳይ ኣላሚያ ፒርዲያ ሳቴይ ጋኪዳ ጊሾ ፆሳስ ያዪቴ፤ ኢያ ቦንቺቴ። ሳሎ፥ ሳዓ፥ ኣባኔ ፑልቶ ሃꬃ ሜꬊዳ ፆሳ ጎይኒቴ» ያጊስ።

8 ኮይሮይሳ ካሊዲ ሃራ ናምዓንꬆ ኪታንቾይ፥ «ዴሬ ኡባ ቱናኔ ማꬆያ ዎይኔ ኡሺዳ፥ ጊታ ባቢሎኔይ ኩንዳሱ! ኩንዳሱ!» ያጊዲ ዋሲስ። ኢሳ 21፡9፤ ኤር 51፡8፤ ዮ.ቆ 18፡2

9 ሄꬓንꬆ ኪታንቾይ ኤንታ ካሊዲ፥ ባ ቃላ ꬎቁ ኦꬂዲ፥ «ዶዓኔ ኢያ ሚሲሊያ ጎይኒያ ቃሲ ኢያ ማላ ባ ሶምዖን ዎይኮ ባ ኩሼን ዎꬂያ ኦኒካ ዴዒኮ፥ 10 ኢ ሃንቆ ፁዓን ኩሚዳ ፆሳ ሃንቆ ዎይኒያ ኡያና። ኤንቲ ጌሻ ኪታንቾታ ሲንꬃኒኔ ዶርሳ ሲንꬃን ኤፂያ ዲኔ ታማን ዋዬታና። ኢሳ 51፡17፤ ሜꬌ 19፡24፤ ሂዝ 38፡22 11 ኤንታ ዋያ ጩያይ ሜሪ ሜሪናው ጩዪሼ ዳና። ዶዓኔ ኢያ ሚሲሊያ ጎይኔይ ቃሲ ሄ ዶዓ ሱንꬃ ማላይ ዴዒያ ኦኒካ ቃማኔ ጋላስ ሼምፖይ ባይና ካዔታና» ያጊስ። ኢሳ 34፡10

12 ፆሳ ኪታ ናጌይሳቲኔ ዬሱሳ ኣማኔቴይሳቲ ጌንጪያ ሚኖቴꬃይ ቆንጪያ ዎዴይ ሄሳ።

13 ሄሳፌ ጉዬ፥ «ሂዛፔ ጎዳን ሃይቄይሳቲ ኣንጄቲዳይሳታ» ያጊያ ቃላ ሳሎፔ ሲዓስ።

ኣያናይ፥ «ኤ ቱማ፥ ኤንታ ኦሶይ ኤንታ ካሊያ ጊሾ ኤንቲ ባንታ ዳቡራፔ ሼምፓና» ያጌስ።

14 ሄሳፌ ጉዬ፥ ቦꬃ ሻራ ቦላ ኡቲዳ ኣሳ ናዓ ዳኔይሳ ቤዓስ። ኢ ባ ሁዔን ዎርቃ ካላቻ ዎꬂስ፤ ቃሲ ባ ኩሼን ባጫ ኦይኪስ። ዳኔ 7፡13-14 15 ሃራ ኪታንቾይ ፆሳ ኬꬃፌ ኬዪዲ፥ ሻራ ቦላ ኡቲዳይሳኮ ባ ቃላ ꬎቁ ኦꬂዲ፥ «ካꬃ ሺሾ ዎዴይ ጋኪዳ ጊሾ ኔ ባጫ ዬዳዳ ካꬃ ጫካ፤ ሳዓን ዴዒያ ካꬃይ ጋኪስ» ያጊስ። ኢዩ 3፡13 16 ያቲን ሻራ ቦላ ኡቲዳይሲ ባ ባጫ ሳዓ ዬዲዲ፥ ሳዓን ዴዒያ ካꬃ ጫኪስ።

17 ቃሲካ ሳሎን ዴዒያ ፆሳ ኬꬃፌ ሃራ ኪታንቾይ ኬዪስ፤ ኢያዉካ ኦጮ ባጪ ዴዔስ።

18 ታማ ቦላ ማቲ ዴዒያ ሃራ ኪታንቾይ ያርሾ ቤሳፌ ኬዪስ። ኢ ባ ቃላ ꬎቁ ኦꬂዲ ኦጮ ባጫ ኦይኪዳ ኪታንቹዋኮ፥ «ዎይኔ ኣይፌይ ቴሪዳ ጊሾ ኔ ኦጮ ባጫ ዬዳዳ፥ ሳዓን ዴዒያ ዎይኒያፔ ቃንፃ» ያጊስ። 19 ሄ ኪታንቾይ ባ ባጫ ዬዲዲ፥ ሳዓን ዴዒያ ዎይኒያፔ ቃንፂዲ፥ ፆሳ ጊታ ሃንቁዋ ጉምዒያ ቤሳን ዬጊስ። 20 ኤንቲ ካታማፔ ጋፃን ዴዒያ ዎይኔ ኣይፌ ጉምዒያ ቤሳን ዬꬌቲዶሶና። ሱꬂ ዎይኒያ ጉምዒያ ቤሳፌ ኬዪዲ ኢሲ ሙኩሉኔ ኡስፑን ፄቱ ኪሎ ሚቲሬ ሜላ ሃኪዲ፥ ፓራ ፑሎ ጋኪያ ሜላ ኤሊዲ ꬎቁ ጊስ። ኢሳ 63፡3፤ ኤር.ዜ 1፡15፤ ዮ.ቆ 19፡15