1 Ena kaun i gawlima kobe Yesu milungwa gul ure iru sirin bile tongwa, “God kenin ere ke milungwa ai, ibena singaba mile goma name?” 2 Dungure gamege ala dire, “Wo,” dungure ungure, gawlima kobe milungwa suna alungure 3 Yesu iru di yalin kobe tongwa, “Na kawen dirala piro. I nomanin suna si kiruul sikire u gamege mere pekenanga, ena God kenin ere ke milungwa ai suna ta pekenanwa. 4 Yal ta nomanin yaa ime sire gamege mere mile u main nangwa, ena yalini God kenin ere ke milungwa ai suna singaba mile goma yenamua. 5 Yal ta na guunan kanan pire aa te wai ere gamege tenangwa mere yalini para aa te wai ere na tenamua.

6 “Gamege iru pire gi di na tongwa iwe. Yal ta ure kakiibi di kela kula tenangure gaan i kal digan ere taalime erangwa, ena gain giil bilkaw piramua. Kela kula tongwa yal i, kobile bilkaw naan mina kan sire pusi pirin nil ali erangure, sagu dire gulangwa paimua. 7 Gariba gul ibal kakiibi di kela kule tongwa, ena ibal taw kobe kal digan ere taalime erungwawe. Ayo, gariba gul ibal gain giil piramua. Kakiibi di kela kule te milamba, kela kule tongwa yal iwe. Ayo, yalini gain giil piramua.

8 “I kawnin mo anin erina kal digan ere taalime eringa i, di keli sire piseranga mere i kal digan i pisero. I anin kawnin sui para wai imo dungwa, enderin gaul ai nanga ta paikinamba, i anin kawnin ta diman dinangure kamin ai mile painanga ena iru painamua. 9 I omilin kanina kal digan ere taalime eringa i, i omilin woule eranga mere kal digan i pisero. I omilin su para wai imo dungwa enderin gaul ai nanga ta paikinamba, i omilin ta woule eranga kamin ai mile painanga ena iru painamua.

10 “Ena gamege goma dibinga iray, i nigi de pire tekio. Yalin kobi pire ka dirala i piro. Na Abe kamin mina milungwa, yalin kobe angel yalini guman mina morin morin milemua. 11 [Ibal kobe God main ta pirekire wou bilungwa aa ki di tegire, sigare kule u wai nama dire, Na U Ibal Obinga Yal ere ime wiwa.]

12 “Ka pore di i terala main paangwa mere i nomanin si piro. Yal ta bolima siipe siipe wan kandiret kenin ere milungwa, ta u baan ta nangwa yalini takal erame? Bolima siipe siipe nainti nain wai imo mile, kowan ali milungwa pisere, ta u baan ta ongwa waa duunamua. 13 Na kawen dirala piro. Inanin si waa duure kanangwa iwe, bolima siipe siipe nainti nain wai imo milungwa wai pirimba, ta waa duure kanungwa wai wen pire miinin maamua. 14 Yal ta iru erungwa mere gamege i u baan ta nama dire i Kamin Abe iru ta pirekemua.

15 “I enin taw kobe kal digan ere i tenangwa, i pi yalini milungwa gul pire i yasu inin milebilgiray, pirin paangwa i di maribe ero. I ka dinanga pirangure i yasu u taran nanwa. 16 Dimba i ka dinanga ta pirekenangwa, ena yal ta mo sutan para awli nangire i kalkan di maribe eranga, yal sutan mo sutakobe kane piramua. Pirangwa eme ka kol erangure kanungwa yal milamua. 17 Dinamba yalin kobe ka dungwa para pirekenamia, ena ka main ibal taminin para di gawa di to. Di tenangire para pirekenamia, ena Yuda milekungwa ibal mo takis ingwa yal milungwa mere, nomanin si pire yalini to.

18 “Na kawen di terala i piro. Gariba gul mile, kal ta manaa dinanga kamin ai ka dinga i milin u maribe namua. Te gariba gul mile, ka ta ‘Para painamua,’ dinanga kamin ai para, ka dinga i milin u maribe namua. 19 Kwi di terala i piro. Ena ibal sutan ka ta painangwa, ka dibia ere nomanin u taran nangure ana di God terabilga, ena na Abe kamin mina milungwa kal iray i tenamua. 20 Yal sutan mo sutakobe na pire u taminin milangwa, na para suna milabinwa. Milabinga, na Abe kamin mina milungwa kal iray i tenamua.” dungwa.

21 Ena Pita Yesu milungwa gul ure iru sirin bile di tongwa, “Singabo, na enan taw kobe kal digan ere taalime ere na te milangwa, ginin tamintan pirin gule ere terabine? Ginin anan kole muru kole sutan gule ere terabino?” 22 Dungure Yesu iru maan dire di tongwa, “Anan kole muru kole sutan, tamama. Kaun kaun pirin gule ere te milangal milanwa. 23 Iru dibinga piregire God kenin ere ke milungwa, iru mere milemua. Yal bil ta milere yalini konagi aa ki dungwa yal kobe, konagi ere kobile moni irere kwi maan yal bil tenama dire, aa tekun erala di piremua. 24 Kobile maan tenangwa aa tekun erala di erungwa, ena yal ta kobile moni binanwenbile, miliyon taw kobe, pirin pai dungwa kwi maan te ain erala di eremua. 25 Pirin pai dungwa gule erama dire, kobile moni kuunin erekimia, ena yal bil kobile moni inama dire yal i, te ebinbi te wan abilin kobe, te yalini kal para wen, yal ta terala di piremua. 26 Iru piremia ena konagi aa ki dungwa yal kobaan milungwa gul yaa gobin bile mile kawan dire iru di tongwa, ‘Kaun taw imore mile eme kobile moni muru i kwi maan te ain erabinwa.’ 27 Dungure kobaan miriin wen pire tere, pirin bilkaw paangwa gule ere tere, ‘Para ere po,’ di tomua.

28 “Ena yalini malge pire enin ta bole konagi aa ki di kobaan tongwa yal ta, kobile moni ten kina tawle goma tongure pirin paingure, ena naan aa gi dire iru dungwa, ‘Kobile moni tega malia i maan na to.’ 29 Dimia ena konagi aa ki dungwa yal ta, yaa gobin bile kawan dire iru dungwa, ‘Kaun taw imore mile eme kobile moni kwi maan te ain erabinwa.’ 30 Dimba manaa dire kanin sire kobile moni tenama dire, kanin paangwa ogu ala eremua. 31 Konagi aa ki dungwa yal taw kobe, yal ta iru erungwa kanere, nigi de wen pirere, pi kobaan milungwa gul pire di gawa dimua. 32 Dimia ena kobaan ‘Ere wo,’ di gala di konagi aa ki dungwa yal tongure, ungure iru di tongwa, ‘Nil erari yale, i yal digan milinwa. I kaan di na tengire, kobile moni para muru pirin pai imo dungure malia gule ere i tegirawa. 33 Tega, na miranan wen pire i tega mere, konagi aa ki dungwa yal ta, miriin wen pire tenaniba.’ 34 Dire kobaan den gulere aa ki di tongwa yal gain giil pirama dire, nusi kanin paangwa ogu eremua. Gain giil pire tenangure kobile muru maan te piserangwa, ena kanin gule eramua. 35 Ena, i enin kobe kal digan ere taalime ere i tongwa, pirin gule ere tekenana kobaan ere yal ta tongwa mere, na Kamin Abe iru ere i tenamua.” Dire Yesu iru dungwa.