1 Ena Yesu ka nil si tongwa i, para wen di wei sire, iru di gawlima kobe tongwa, 2 “Are kaun sutan wei sinangwa ena Yuda nen bolima siipe siipe sungure, God yalin kobe ta sekungwa kaun erin bil mile, komina bil nerabinwa. Nerabingire ibal kobe Na U Ibal Obinga Yal na kanin sire, eri pera mina na si gulama dire, awli ibal tenamua,” dungwa.

3 Ena ka main kenin erungwa yal bil kobe te Yuda ka main yal singaba kobe bole, u ku bile kenin erungwa yal bil kaan Kayapas, ogin milungwa. 4 Milere Yesu aal kule kanin sire si gulabina dire, diria ere pirungwa. 5 Pirimba iru dungwa, “Komina bil kiire erin kaun milungure Yesu kanin sirabinba ibal kobe kura bil bile wi yau dinamua,” dire kane unin si milungwa.

6 Yesu Betani ai pire Saimon goma seki egile milungwa, malia gain wiige sungure milungwa, Yesu yalini ogin ala milungure, 7 abal ta ure wel niriin minanin wai wen sungwa tobe bil bilungwa, mugu dil ali yuure Yesu komina ne milungwa, garu di Yesu gibilin mina bile tongwa. 8 Tongure gawlima kobe kanere nigi de wen pirere, iru di tongwa, “Tameran imore garu di bile tome? 9 Wel niriin i tobe bilkaw bilungwa, irabinga kul gal bona aa te nekungwa ibal obin si terabinba.” 10 Dungwa i, Yesu pirere iru di tongwa, “Tameran nigi de pire tene? Abalini kal wai wen ere na tomua. 11 Kul gal bona aa te nekungwa ibal, i bole para morin milamba, na i ibal kobe bole baan araway ta milekerabilwa. 12 Na gulabinga wel i bile na tenangwa mere, malia kwi imo miliga wel niriin iray bile na tomua. 13 Na kawen di i terala i piro. Na guunan kanan gariba ulin kole kole kere di tenangwa gul, abalini kalkan erungwa di maribe erangure, ibal kobe abalini wai pire tenamua,” dungwa.

14 Ena Yesu gawlima kobe anan kole kole muru kawnan milin sutan yal ta kaan Yudas Isikerio, pi Yuda ka main kenin erungwa yal bil kobe milungwa gul ongwa. 15 Pirere iru dungwa, “Yesu i anin mina u maribe nalga takal na tenane?” Dungure kobile moni milin aan kawn muru te anan kole kole muru yalini tongwa. 16 Ena kaun iray, Yesu bale taal sirala dire kawn kule, kaun ta suul mile kane milungwa.

17 Komina bil ta, komina birete u bil pekungwa nere milungwa kaun, kamin kaun ta kawn kule erungure, gawlima kobe ure iru sirin bile Yesu tongwa, “God Yuda nen kobe ta sekungwa kaun nomanin si pirabina dire, komina nerabinga alde aa tekun ere nerabine?” 18 Di tongure iru dungwa, “I ogu ai bil pirere yal ta iray kananga iru di to, ‘Ka nil si tongwa yal iru dimua,’ da. ‘Na gulabinga kaun u bawa dungure, na te gawlimanan kobe para God Yuda nen kobe ta sekungwa kaun nomanin si pirabina dire, komina i, i ogin ala nerabinwa,’ iru di ta.” 19 Dungwa mere erere, komina bil iray nenangwa aa tekun erungwa.

20 Ena kamin girungure pare, Yesu te gawlima kobe anan kole kole muru kawnan milin sutan bole, komina nerabina dire amin di milunga. 21 Yal kobe komina ne milungure Yesu iru dungwa, “Yal ta u alia milere na bale taal sinamua.” 22 Dungure yalin kobe nigi de pire, inin inin iru sirin bile Yesu tongwa, “Singabo, na i sirabin mo, sekerala di piria.” 23 Dungure Yesu di tongwa, “Yal ta i suna milungwa, yalini na bole pele bala taran komina nil bile nobinga, ena yalini na bale taal sinamua. 24 Ka main minin ganin bilungwa mere Na U Ibal Obinga Yal u baan ta nalwa. Nabinba yal ta Na U Ibal Obinga Yal bale taal sinangwa yal iwe, aye, giil bil piramua. Man yal iray ta kule yekenangwa, wai wen milamba.” 25 Dungure bale taal sinangwa yal Yudas iru di tongwa, “Nil si tongwa yalo, na i sirabin mo, sekerala di piria.” Dungure Yesu mile, “I iru dinwa,” di tongwa.

26 Ena yal kobe komina nere milungwa, Yesu komina birete aa tere maki ye God tere, bege dire obin si yal kobe tere, iru dungwa, “Komina i, na miin te gaynan dimia, ire no.” 27 Dire pare nil wain sin kabe ta ire, maki ye God tere, suule obin si yal kobe tere iru dungwa, “I yal kobe para, nil i no. 28 Ibal kobe binanbile God bole guman kane ire u taran nama dire, na inan mayan garu diralwa. Te ibal kal digan ere taalime erungwa kire di erama dire, na inan mayan garu diralwa. 29 Na kawen dirala i piro. Malia na nil wain nega mere, iru ta ama nekeralba, God kenin ere ke milungwa ai pi milalga eme kwi neralwa.” 30 Dire geril ta di pisere ere malge pire, kamin kuul Olibe ongwa.

31 Ena Yesu iru di gawlima kobe tongwa, “Gilaa kaun i, i yal kobe nigi de pire na tere us sutaw nanwa. God mile, ‘Na bolima siipe siipe kenin erungwa yal sirabingire, bolima siipe siipe u sutaw namua,’ dungure ka main minin ganin iru bilungwa mere, u maribe namua. 32 Iru dinamba, na gulere alalga God iru erangure pare, na Galili gariba gul goma egire i eme unanwa.” 33 Dungure Pita ka dagi dire iru dungwa, “Yalin kobe nigi de pire i tere u sutaw namba, na iru ta pire i tekeralwa.” 34 Dungure Yesu iru di tongwa, “Na kawen i inin di terala piro. Kemina gilaa sia korale be dala di erangwa, i ginin sutakobe na kaanan di aal kule ka di kile di mena ere na tenanwa.” 35 Dungure Pita maan iru di tongwa, “I kaanin di aal kule i teralga, main iru ta paikimua. Iru tekiralga ibal kobe na i bole na si gulangwa, ena para wai we. I ka di kile di mena ere i tekeralwa.” Dungure gawlima kobe para iru di Yesu tongwa.

36 Ena Yesu te gawlima kobe bole pi eri main ta kaan Gesemani ongure, Yesu iru di tongwa, “Na ana di God terala erebina, i alia amin di milo.” 37 Direre Pita te Sebedi wan sutan awli pirere, suna ku ku maa ungure miriin pire milungwa. 38 Milere iru di yal sutakobe tongwa, “Na inan miriin bilkaw pire milere, gulalga mere piriwa. I abila mile el kwi nu milo.” 39 Direre baan ta pi bawa dire, yaa i kwi bile ana dire iru dungwa, “Na Abe, giil malia na piralga, pirekerala di pire iru ere na tenanba, painama di pirangire, ena giil piralwa,” dungwa.

40 Dire pare urere, yal sutakobe ul paingwa kanere ulin yuure iru di Pita tongwa, “I yal kobe kaun tawliga kwi milekeno? 41 Satan i kiranin sire kela kule tenangure i manaa dirala dire, i ul paikire si kwi ye mile ana morin di God te milo. I nomanin iru si piringa, ‘Na yobilaan biliga eralwa,’ di pirinba gain obin domua.”

42 Direre ginin ta kwi pire ana dire iru dungwa, “Na Abe, ena giil malia piralga i painama di piranga, giil piralwa.” 43 Dire pare sinaa dire kwi ure, yal sutakobe omilin meru dimia ul paingwa kanungwa.

44 Kanere goma ginin sutan ongwa, malia kwi pire, ana goma dungwa mere kwi dungwa. 45 Dire pare gawlima kobe sutakobe milungwa gul ure, iru di tongwa, “I yal kobe ul painga iray kwi paino? Ena i iru piro. Na U Ibal Obinga Yal, yal ta bale taal sinangure kal digan ere taalime erungwa, yalin kobe na sinangwa kaun u maala omua. 46 Ale, ere nabina wo. Bale taal na sinangwa yal kaya maala umia, kano,” dungwa.

47 Ena ka iru di milungure, ena gawlima kobe anan kole kole muru kawnan milin sutan, yal ta kaan Yudas te ibal binanbile para, kuba te di kuba pera aa te ire u milungwa. Yuda ka main kenin erungwa yal bil kobe te singaba kobe, nusi erungwa u milungwa. 48 Bale taal sungwa yal goma iru di ibal kobe tongwa, “Yal ta guman mu diralga, yalini yal iray milamua. Iru kane aa gi di mile kanin so.” 49 Dire u bawa dire gin taran Yesu milungwa gul pire, “Singabo, mile dino,” dire guman mu dungwa. 50 Dungure Yesu iru di tongwa, “Ye nego, kal ta erala di eranga kal iray ero.” Dungure ure aan aa gi dire kanin sungwa. 51 Yal ta Yesu bole milungwa di kuba pera i maribe ere, Yuda kenin erungwa yal bil yalini nil konagi yal ta, kiraan dual kule erungwa. 52 Erungure Yesu iru di yal ta iray tongwa, “I di kuba pera kwi gal gule ain yeyo. Yal ta di kuba pera aa te ibal sungure, ena ibal kobe yal iray, di kuba pera si gulangwa paamua. 53 Na Abe gala di teralga ena yalini gin taran angel taminin anan kole kole muru kawnan milin sutan, aa ki di na tenangwa nusi eramua. 54 Eramba, ‘Iru wen painamua,’ di ka main minin ganin bilungwa mere, tamintan milin u maribe name? Angel kobi nusi erangwa ta pekenamia, ena milin kawen u maribe namua,” dungwa.

55 Dire pare Yesu iru di u ku bilungwa ibal tongwa, “I di kuba pera te kuba ire unga, komina kunibe nongwa mere iru kuunin ta milebinga, kanin na kulala dire uno? Yuda ibal ka main ogu bil, kaun kaun ka nil si te milebinga, na kanin ta sikingirawa. 56 Ka kebe yal kobe ka main minin ganin bilungwa mere, kalkan iru ere milin u maribe omua.” Dungure gawlima kobe para yalini pisere si ere ongwa.

57 Yal kobe Yesu kanin si milere, Yesu awli pi Yuda ka main kenin erungwa yal bil kaan Kayapas milungwa gul ongwa. Ongure Yuda ka main nil si tongwa yal kobe, te singaba kobe para, u ku bile milungwa. 58 Milungure, Pita tawliga tayan mile duulin bile pire, kenin erungwa yal bil ogin malge pi bawa dire, ere suna ongwa. Pirere kalkan u maribe nangwa kanala dire, el kwi nu milungwa yal i bole amin di milungwa. 59 Ka main kenin erungwa yal bil kobe te u ku bilungwa ibal para muru, Yesu si gulala dire ka digwane waa Yesu tenangwa, ka i waa duungwa. 60 Waa duumba ka ta i maribe erekungwa. Dimba ka kol kanungwa ibal binanbile ure, “Kakiibi dirabina,” di pirungwa. Ena ka kol kanungwa ibal su ure 61 iru dungwa, “ ‘God ka main ogu bil ibal kiingwa sulalwa. Sulere pare kaun sutakobe na inan kwi kiiralwa,’ dire Yesu iru dungwa na yalsu pirebilwa,” dungwa.

62 Dungure Yuda ka main kenin erungwa yal bil alere iru di Yesu tongwa, “I maan ka ta piranga ta dekino? Ka kol kanungwa yal kobe di maribe erungwa tamintan mere dime?” 63 Iru sirin bilimba, Yesu pire unin si milungwa. Ka main kenin erungwa yal bil, kwi dire iru di tongwa, “God kwi mile paangwal paangwa, i pire maabinin mina aa taw sire i kirara kawen di na to. I God konagi erungwa yal Kirisito milino? Te i God Wan milin mo, milekene?” 64 Dungure Yesu maan iru di tongwa, “I iru dingiwe. Dinba ka di i ibal kobe terala i piro. Malia miliga i kaninba, eme Na U Ibal Obinga Yal, God Yobilaan wen Kobaan aan wen kol amin di miliga kanere, te kawa bolimina urabinga para kananwa.” 65 Dungure ena kenin erungwa yal bil iray, galsuna aa te ole dire iru dungwa, “Yalini God gain ka simua. Ka kol kanungwa yalin kobe tameran ka kwi diname? Yalini gain ka sungwa pirere, 66 i takal waa di nomanin si pirine?” Dungure yalin kobe maan dire iru dungwa, “Yalini kal ki ere pirin paamia, ena si gulo.”

67 Ena yal taw kobe ebil sipadi, Yesu guman mina tere sire, te ibal taw de dagi sire 68 iru dungwa, “God konagi erungwa yal Kirisito, ka kebe yal dungwa mere bolin kule di maribe ero. Ibena i sime?”

69 Ena Pita malge yene i milungure, kenin erungwa yal bil nil konagi gi ta urere iru di tongwa, “Yesu Nasarete nen milungware i bole para milingirawa.” 70 Dimba ibal para milungwa mina, Pita ka di kile di mena ere iru dungwa, “I ka dingi na ta pirekun erekiwa.” 71 Dire ogu malge yene kana giran ta ongure, nil konagi gi ta mile, iru di yal kobe tongwa, “Yalini Nasarete nen Yesu bole milungwa yal milemua.” 72 Dungure Pita kwi ama ka di kile di mena ere, maabin mina aa taw sire iru dungwa, “Yalini guman na kawen kirara ta kanekiwa.” 73 Dungure kawn tawliga mile pare, yal kobe maala milere iru di Pita tongwa, “Yesu gawlima kobe kowa kowa dungwa mere i para iru dingi, ena i yal ta milingirawa.” 74 Dungure Pita ka nigi dongwa dire iru dungwa, “God mabin mina kawen di tekerala God na sinangwa paamua. Yalini i kane dinga, na guman ta kanekigirawa.” Dungure sia korale gin taran be dungwa. 75 “Sia korale be dala di pirangwa, i ginin sutakobe na kaanan di aal kule ka di kile di mena ere na tenanwa,” dire Yesu goma iru di Pita tongwa, nomanin si pirere, Pita mena pire kay mun bile yaare simil kay miingwa.