11
Tupàn uzamutar wemiaihu weruzar 'ymar wà
1 Tupàn Tuweharupi Wiko Ma'e uze'eg iko teko Izaew wanehe kury.
Izaew kwarer romo heko mehe azamutar katu ihe.
Aenoz hera'yr Ezit ywy wi ihe.
2 Tuweharupi ainoz wiwi hezeupe.
Tuweharupi utyryk wewer ihewi.
Heremiaihu uzuka ma'ea'yr tupàn ua'u Ma'aw her ma'e henataromo wà.
Wapy yhyk tupàn a'ua'u wamuwete katu pà wà no.
3 Xo ihe zo amu'e heremiaihu wata haw rehe ihe wà.
Apyhyk hezywa pupe wà.
Nukwaw kwaw wanehe
uzekaiw ma'e romo hereko haw wà.
4 Azamutar katu ihe wà. Apuhareko katu ihe wà.
A'e rupi arur hezewake ihe wà.
Apyhyk hezywa pupe ihe wà.
Teko umuapyk kar kwarer u'uwaromo wà. Nezewegatete azekaiw katu wanehe ihe.
Azemumew wanupe wanemi'u imono pà wanupe,
i'i Tupàn.
5 Na'izewyr wer kwaw ihewe wà kury. A'e rupi oho wi putar Ezit ywy rehe wà nehe. Zauxiapekwer Axir pe har weityk putar Izaew wà nehe no. 6 Ur putar zeàmàtyry'ymaw nehe. Zauxiapekwer Izaew wàmàtyry'ymar o'ok putar uken pàrirogawhu wi wà nehe, tawhu pupe wixe pà wà nehe. Weityk putar tàpuz a'e tawhu pe har paw wà nehe. Uzuka putar heremiaihu wà nehe, ta'e wanuwihaw weraha pe ikatu 'ym ma'e rupi wà xe. 7 Heremiaihu nukyze kwaw ihewi wà. Naheputar kwaw uwihawete romo wà. A'e rupi zauxiapekwer amo ae ywy rehe har weraha putar wemipyhyk kwer romo wà nehe. Ni amo nupuner kwaw wapyro haw rehe wà nehe.
8 Aipo apuner pewi hepuir haw rehe nehe, Izaew wà.
Aipo napupytywà kwaw ihe nehe.
Kwehe mehe amumaw Anima tawhu ihe. Aipo apumumaw putar nezewegatete nehe.
Kwehe mehe aityk Zemoim tawhu ihe. Aipo apuityk putar nezewegatete nehe.
Nan kwaw pa. Napuner kwaw nezewe haw iapo haw rehe nehe.
Ta'e apupuhareko katu hepy'a pe ihe xe. Ta'e apuaihu katu ihe xe.
9 Namuigo kar kwaw hekwahy haw hezar romo nehe.
Namumaw zuapyr wi kwaw heremiaihu ihe wà nehe.
Ta'e Tupàn romo aiko ihe xe. Naiko kwaw teko romo.
Ihe Tupàn ikatuahy ma'e ihe, aiko heremiaihu wainuromo ihe.
Namumaw zuapyr wi kwaw ihe wà nehe.
10 Amo 'ar mehe akororo putar zàwàruhu iriàw ài ihe nehe, heàmàtyry'ymar wakutyr ihe nehe. A'e 'ar mehe teko heremiaihu oho putar heraikweromo wà nehe. Teko heremiruze'eg ur putar kwarahy heixe haw wi uzàn pà wà nehe. 11 Uwewe mehe wiràmiri uhem oho àwàm me na'arewahy a'e wà. Heremiaihu ur putar Ezit wi nezewe wà nehe no. Pykahu uhem oho àwàm me na'arewahy wà. Nezewegatete heremiruze'eg ur putar Axir wi wà nehe no. Amuigo kar wi putar waiwy rehe ihe wà nehe. Ihe Tupàn Tuweharupi Wiko Ma'e amume'u ko ma'e kwez ihe kury.
Tupàn uze'egahy Izaew wanehe Zuta wanehe no
12 Nezewe i'i Tupàn Tuweharupi Wiko Ma'e. — Teko Izaew umàmàn heywyr wemu'emaw pupe wà. Wanemu'emaw nuzawy kwaw pàrirogawhu ihewe. Teko Zuta naheputar kwaw uzar romo wà. Tupàn Ikatuahy Ma'e romo aiko ihe. Tuweharupi azapo ma'e heze'eg rupi katete ihe.