2 Amo 'ar mehe

ywytyr Tupàn Tuweharupi Wiko Ma'e hàpuzuhu

hereko har iaiha wera'u putar amo ywytyr paw wanuwi a'e nehe.

Upyta putar amogwer ywytyr wa'aromo nehe.

Teko ywy nànànar uzàn putar oho a'e pe wà nehe.

3 Uze'eg putar nezewe uzeupeupe a'e wà nehe.

— Zazeupir ywytyr Tupàn Tuweharupi Wiko Ma'e Izaew wazar henaw rehe nehe.

Zaha Tupàn Izaew wazar hàpuzuhu pe nehe.

Tupàn zanemu'e putar zaneremiapo ràm rehe nehe.

Zata putar hape rupi nehe,

ta'e Tupàn Tuweharupi Wiko Ma'e ipurumu'e haw ur Zeruzarez wi a'e xe.

Xiàw ywytyr rehe wiko mehe uze'eg wemiaihu wanupe, i'i putar uzeupeupe wà nehe.

4 Tupàn wiko putar teko ywy nànànar wanemiapo kwer imume'u har romo nehe.

Umume'u putar wanehe uzepyk àwàm nehe no. Teko tetea'u oho putar henataromo a'e wà nehe. A'e ae umume'u putar wanemiapo kwer nehe.

A'e teko uzapo putar utakihepuku wà nehe, ywy heruwaruwakaw iapo pà wà nehe.

Uzapo putar upurukutukaw takiheapar romo wà nehe no.

Teko ywy nànànar nuzapo pixik kwaw zeàmàtyry'ymawhu a'e wà nehe.

Nuzemuàgà'ym pixik kwaw zeàmàtyry'ymawhu pe oho haw rehe wà nehe.

5 Pezur nehe, Zako izuapyapyr wà, Tupàn Tuweharupi Wiko Ma'e ize'eg nuzawy kwaw tatainy.

Zata tatainy Zanezar hemimur kwer rupi nehe.

6 O Tupàn, eretyryk neremiaihu Zako izuapyapyr wanuwi ne,

ta'e waiwy tynehem tekwe ikatu 'ym ma'e wanehe uma'ereko ma'e pupe wà xe.

A'e uze'eg ma'e wiko Pirite ywy wi ur ma'e kwer romo wà.

Tynehem uzeapo ma'e ràm imume'u har ywy kwarahy hemaw kutyr har wi ur ma'e kwer wapupe no.

Neremiaihu uzapo ma'e amo ae ywy rehe har wazàwe wà.

7 Izaew waiwy heta tetea'u itaxig parat. Heta tetea'u itazu or no.

Teko nupuner kwaw ipapar haw rehe wà, ta'e heta tetea'u a'e xe.

Heta tetea'u ywyramawa zeàmàtyry'ymawhu rehe har a'e ywy rehe wà no. Heta tetea'u kawaru wà no. Nazapuner kwaw wapapar haw rehe nehe.

8 Heta tetea'u tupàn a'ua'u wanagaw paw no.

Neremiaihu wapyk upenàràg rehe a'e tupàn a'ua'u wanenataromo wà,

umuwete katu wemiapo kwer wà.

9 Amo umuigo kar putar a'e teko paw ikàg 'ym ma'e romo wà nehe. Imaranugar putar wà nehe no.

O Tupàn, emunàn zo wanemiapo kwer ikatu 'ym ma'e nehe.

10 Pekar putar pezeàmim àwàm itakwaruhu pupe nehe.

Pehàwykàz ywykwar

pezeàmimaw romo nehe, Tupàn ikwahy haw wi pehem pà nehe,

petyryk putar Tupàn Tuweharupi Wiko Ma'e ipuner haw tuwihawete romo heko haw wi nehe.

11 Ur putar amo 'ar nehe. A'e 'ar mehe Tupàn umuigo kar putar wiko wera'u ma'e wà nehe, ikàg 'ym ma'e romo wà nehe.

Ukàgaw imume'u har wiko putar ikàg 'ym ma'e romo wà nehe.

A'e 'ar mehe teko umume'u putar Tupàn Tuweharupi Wiko Ma'e ikatu haw wà nehe. Numume'u kwaw amo wakatu haw wà nehe.

12 A'e 'ar mehe Tupàn Tuweharupi Wiko Ma'e, Ikàg Wera'u Ma'e, umuigo kar putar wiko wera'u ma'e paw wà nehe, ikàg 'ym ma'e romo wà nehe.

Uzapo putar nezewe haw upuner haw imume'u har wanupe nehe no.

— Aiko upuner ma'e romo ihe, aze amo teko i'i wà nehe, Tupàn umuigo kar putar a'e teko ikàg 'ym ma'e romo a'e wà nehe.

13 Umumaw putar ywyràkàxigyw iaiha ma'e uhua'u ma'e Irimano ywy rehe har a'e wà nehe.

Umumaw putar ywyra kawar her ma'e Màxà ywy rehe har paw rupi a'e wà nehe no.

14 Umumew putar ywytyruhu iaiha katu ma'e paw wà nehe no.

Umumew putar ywytyr aiha ma'e paw wà nehe no.

15 Weityk putar tàpuzaiha paw rupi nehe.

Weityk putar pàrirogaw ikàg ma'e tawhu izywyr har paw rupi nehe no.

16 Uzapypyk putar kanuhu uhua'u ma'e paw rupi nehe.

Uzapypyk putar kanu ipuràg eteahy ma'e nehe no.

17 A'e 'ar mehe wiko wera'u ma'e uzeapo putar ikàg 'ym ma'e romo wà nehe.

Ukàgaw imume'u har uzeapo putar ma'e hereko 'ymar romo wà nehe no.

Teko umume'u putar Tupàn Tuweharupi Wiko Ma'e ikatu haw azeharomoete a'e wà nehe. Numume'u kwaw amo wakatu haw wà nehe.

18 Tupàn a'ua'u wanagapaw ukàzym putar upaw rupi wà nehe.

19 Tupàn Tuweharupi Wiko Ma'e izexak kar mehe

ywy rehe har ukyze putar izuwi azeharomoete wà nehe.

Uzàwehem putar oho itakwar pupe wà nehe.

Wezyw putar ywykwar ohoete ma'e pupe wà nehe no,

Tupàn ikwahy haw wi uhem pà wà nehe.

Utyryk putar Tupàn Tuweharupi Wiko Ma'e tuwihawete romo heko haw ikàg ma'e wi wà nehe.

20 A'e 'ar mehe teko paw upyhyk putar tupàn a'ua'u itaxig parat iapo pyrer wà nehe, itazu or iapo pyrer wà nehe no.

Upyhyk putar wemiapo kwer wemimuwete wà nehe.

Na'e wezar putar a'e tupàn a'ua'u wanagaw paw aguza wanupe anyra wanupe wà nehe.

21 Tupàn Tuweharupi Wiko Ma'e izexak kar mehe

ywy rehe har ukyze putar izuwi azeharomoete wà nehe.

Uzàwehem putar oho itakwar pe wà nehe.

Wixe putar itahu huawyr pupe wà nehe,

Tupàn ikwahy haw wi uzeàmim pà wà nehe.

Utyryk putar Tupàn Tuweharupi Wiko Ma'e wi wà nehe, ta'e tuwihawete ikàg ma'e romo hekon a'e xe.