11
Pureruze'egaw ikatu haw
1 Ur putar amo tuwihawete Tawi Zexe ta'yr izuapyr a'e nehe.
Nuzawy kwaw hàkà ywyra ipykwer wi hezuz ma'e nehe.
Nuzawy kwaw ywyra'i ywyra hapo kwer wi hezuz ma'e nehe.
2 Tupàn Tuweharupi Wiko Ma'e Hekwe wiko putar hehe we nehe.
Ukwaw katu kar putar ma'e izupe nehe. Uzapo kar putar ma'e izupe nehe. Omono putar ukàgaw izupe nehe no.
Ukyze putar Tupàn Tuweharupi Wiko Ma'e wi nehe.
Ukwaw putar hemiapo putar haw nehe no.
3 Hurywete putar heruzar mehe nehe.
Nume'e kwaw teko wanexakaw rehe nehe.
Nuzeapyaka kwaw teko amo teko wanehe ikatu 'ym ma'e imume'u mehe nehe.
4 Tupàn ze'eg rupi zo umume'u putar hemetarer 'ym ma'e wanemiapo kwer nehe. Ize'eg upyro putar a'e wà nehe.
Uzekaiw putar ma'e hereko 'ymar wanehe nehe.
Ize'eg nuzawy kwaw ywyràihàg. Ipupe uzepyk putar ko ywy rehe har wanehe nehe.
Upytuhemaw pupe uzuka putar ikatu 'ym ma'e wà nehe.
5 Weruze'eg putar wemiaihu ukatu haw rupi wà nehe,
umunar 'ymaw rupi wà nehe no.
6 Awarahu wiko putar àràpuhàràn hawitu ma'e wainuinuromo waàmàtyry'ym 'ym pà wà nehe.
Zàwàruhu ereopar her ma'e wiko putar àràpuhàrànetea'yr wainuinuromo uzeàmàtyry'ym 'ym pà wà nehe no. Upytu'u putar uzehezehe we wà nehe.
Tapi'aka'yr umai'u putar zàwàruhu iriàw wainuinuromo wà nehe no.
Kwarer pixika'i ma'e weraha putar a'e miar pe rupi wà nehe.
7 Tapi'ak kuzà u'u putar ka'api'i zàwàruhu kuzà uruxu her ma'e wainuinuromo wà.
Wamemyr upytu'u putar pitài ywy pehegwer rehe wà nehe.
Zàwàruhu iriàw u'u putar ka'api'i tapi'ak ài wà nehe.
8 Kwarera'i uzemaraz putar mozaiw wanuwake wà nehe. Nuxi'u kwaw moz kwarera'i wà nehe.
Aze kwarera'i umuixe opo ywykwar moz ipyta haw rupi nehe, nuxi'u kwaw wà nehe.
9 Xiàw ywytyr ikatu ma'e rehe
teko nuzapo kwaw ikatu 'ym ma'e uzeupeupe wà nehe. Numumaw kwaw amo wama'e wà nehe.
Ikatuahy putar a'e pe nehe.
'Y umynehem yryhu. Nezewegatete ywy tynehem putar Tupàn Tuweharupi Wiko Ma'e ikàgaw ipuràgaw ikwaw paw pupe a'e nehe no.
Tupàn hemiaihu wazewyr àwàm
10 A'e 'ar mehe Tawi Zexe ta'yr izuapyr nuzawy kwaw pànuhu tuwihawete her hereko har teko ywy nànànar wanupe nehe. Teko wiko putar hemiruze'eg romo wà nehe. Tupàn ikàgaw ipuràgaw uhyape katu heko haw tawhu pe a'e nehe. Teko tetea'u wexak putar wà nehe.
11 A'e 'ar mehe Zanezar a'e nehe, opo ikàg ma'e rehe we a'e nehe, umuzewyr kar putar wemiaihu amo ywy wi a'e wà nehe. Ko 'ar rehe wiko Axir ywy rehe wà, Ezit ywy rehe wà no, Pat ywy rehe wà, Exio ywy rehe wà no, Eràw ywy rehe wà, Mawiron ywy rehe wà no, Amat ywy rehe wà, Yryhu Mezitehàn her ma'e izywyr rehe wà, yrypypo'o yryhu rehe har wanehe wà no. A'e 'ar mehe umuzewyr kar putar wà nehe.
12 Tupàn upir putar pànuhu tuwihaw her hereko har nehe.
Hexak mehe teko Izaew ywy rehe arer wà nehe, Zuta ywy rehe arer wà nehe no, uzemono'og putar wà nehe.
Ko 'ar rehe ywy nànàn imuhàmuhàz pyrer romo wanekon wà.
Tupàn werur wi putar waiwy rehe wà nehe.
13 Teko Izaew ywy rehe àràm nahewyrowyroahy kwaw teko Zuta ywy rehe àràm wanehe wà nehe.
Teko Zuta rehe àràm upytu'u putar Izaew wàmàtyry'ymar romo wiko re wà nehe.
14 Uzemono'og putar Pirite kwarahy heixe haw kutyr har wàmàtyry'ym pà wà nehe.
Weityk putar teko kwarahy ihemaw kutyr har wà nehe no.
Upyhyk putar wanemetarer uhua'u ma'e wà nehe, wama'e hekuzar katu ma'e ipyro pà wà nehe no.
Weityk putar Enom izuapyapyr wà nehe: weityk putar Moaw izuapyapyr wà nehe no. Weityk putar Amon izuapyapyr wà nehe no.
15 Tupàn Tuweharupi Wiko Ma'e umuwipaw putar yryhu Xuwez her ma'e nehe.
Omono kar putar ywytuaiw yrykawhu Ewparat her ma'e kutyr nehe, imumaw pà nehe.
Xo 7 yrykaw zo heta we putar wà nehe.
Natypy kwaw wà nehe. Wyzài teko upuner putar wanahaw paw rehe wata pà wà nehe.
16 Kwehe mehe heta Izaew wanape ràm Ezit ywy wi wahem mehe.
Nezewegatete heta putar wanape ràm ikatu ma'e Axir ywy wi wahem mehe nehe no.
Heremiaihu wikuwe ma'e wata putar a'e pe rupi wà nehe.