22
Uze'eg Zeruzarez pe har wanehe
1 Teko wexak upuahu zàwenugar amo ywyàpyznaw rehe wiko mehe wà.
Na'aw Tupàn ze'eg a'e ywyàpyznaw rehe har xe kury: Màràzàwe tuwe pezeupir penàpuz 'aromo har rehe peapyk pà.
2 Màràzàwe tuwe pehapukaz peiko mynykaw iapo pà.
Màràzàwe tuwe taw pe har paw uzàuzàn e urywete haw rupi wà.
Zauxiapekwer Zeruzarez parer ko zeàmàtyry'ymawhu pe umàno ma'e kwer a'e wà,
nuzezuka kar kwaw amo zauxiapekwer wanupe a'e wà.
3 Wanuwihaw paw uzàwehem uzeàmàtyry'ym 'ym mehe wà.
Wàmàtyry'ymar upyhyk wamono'og pà wà.
Ni pitài u'yw nomomor kwaw wà.
Zauxiapekwer upyhyk te muite uzàwehem ma'e kwer wà no.
4 A'e rupi aze'eg nezewe peme kury.
— Petyryk ihewi kury.
Tuwe azai'o hezemumikahy haw iro ma'e rehe nehe.
Pezeagaw zo hemurywete kar pà nehe,
ta'e teko heremiaihu u'ar tuwe iaiw paw rehe a'e wà xe, a'e wanupe ihe, i'i Tupàn.
5 Zanezar Tupàn Ikàg Wera'u Ma'e uremono kar a'e 'ar mehe a'e.
Teko ukyze tuwe ma'e wi a'e 'ar mehe wà. Nukwaw kwaw wemiapo ràm wà. Umàno zauxiapekwer tetea'u ywyàpyznaw Ipuahu Zàwenugar Hexak Awer her ma'e rehe wà.
Weityk pàrirogaw iaiha ma'e tawhu izywyr har uhem àwàm iapo pà wà.
Tawhu pe har wanehapukaz uzenu ywytyruhu rehe upytywà àwàm henoz e pà wà.
6 Zauxiapekwer Eràw ywy rehe har ur ureàmàtyry'ym pà wà.
Werur weimaw kawaru wà. Werur ywyramawa zeàmàtyry'ymawhu rehe har wà no.
Werur ywyrapar wà, u'yw wà no.
Zauxiapekwer Kir ywy rehe har ur wà no, u'yw wi uzemimaw herur pà wà no.
7 Ywyàpyznaw Zuta ywy rehe har tynehem ywyramawa pupe wà.
Zauxiapekwer kawaru ku'az har ipuruzukaiw ma'e wiko Zeruzarez tawhu hukenaw huwake wà.
8 Naheta kwaw wanuwi wazepyro àwàm Zuta izuapyapyr wanupe.
A'e 'ar mehe pepyhyk takihepuku Ipupyaikawhu Ka'a her ma'e pe har pupe imonokatu pyr peho. 9 Peme'egatu pàrirogaw aiha ma'e peàmàtyry'ymar waneixe àwàm hekar pà. Pezapo 'ypaw tawhu pupe 'y pupe imynehem pà no. 10 Peme'egatu tàpuz Zeruzarez pe har paw. Peityk amo tàpuz. Peraha ita a'e tàpuz iapo pyrer pàrirogawaiha imukatu àwàm romo. 11 Pezapo amo 'y hyru ypaw pixika'i ma'e tawhu pupe. Pemonokatu 'y ypaw kwehe arer wi uwyryk ma'e kwer ipupe.
Kwehe mehe Tupàn umume'u agwer ma'e iapo pyràm a'e. Napezekaiw kwaw Tupàn rehe, a'e rupi napezapo kwaw 'ar katu mehe.
Napezeruzar kwaw agwer ma'e iapo kar har rehe.
12 Zanezar, Tupàn Ikàg Wera'u Ma'e penenoz penereko pemuzai'o kar pà pemuzemumikahy kar pà a'e.
— Pezupin pe'aw nehe, i'i peme. — Pemunehew pàn iànàm ma'e ma'e hyru iapo pyr pezemumikahy haw hexak kar pà nehe.
13 Naperuzar kwaw ize'eg. Pezemaraz mynykawhu iapo pà.
Pezuka tapi'ak awa wà. Pezuka àràpuhàràn hawitu ma'e wà no.
Pemai'u. Pei'u uwà tykwer win her ma'e pupe penemimutar rupi.
Peze'eg nezewe.
— Zamai'u nehe, zai'u win pupe nehe,
ta'e pyhewe zàmàno putar nehe xe, peze pezeupeupe.
14 Tupàn Tuweharupi Wiko Ma'e Ikàg Wera'u Ma'e uzexak kar ihewe uze'eg pà.
— Nahereharaz kwaw a'e wanemiapo kwer ikatu 'ym ma'e wi ihe nehe, upaw rupi umàno putar wà nehe. Namunàn kwaw wanemiapo kwer wanuwi wamàno 'ym mehe nehe. Ihe teko wazar ihe, Tupàn Ikàg Wera'u Ma'e ihe, amume'u ko ze'eg kwez ihe kury, i'i Tupàn.
Uze'eg Xemina rehe kury
15 Zanezar Tupàn Ikàg Wera'u Ma'e hemuze'eg kar hemono Xemina tuwihawete hàpuzuhu rehe uzekaiw ma'e pe a'e. — Emume'u ko ze'eg izupe nehe, i'i ihewe. 16 — Ma'e erezapo iko. Mo uzapo kar itakwaruhu newe netym àwàm romo a'e. Mo uzapo kar itakwaruhu ywytyr apyr newe netym àwàm romo. 17 Nekàg ne, nezewe rehe we Tupàn Tuweharupi Wiko Ma'e nepyhyk putar nehe. Ukàgaw pupe nemomorahy putar muite a'e nehe. 18 Teko omomor iapu'a ma'e wà, nezewegatete Tupàn nemomor putar muite amo ywy uhua'u ma'e pe nehe. A'e pe eremàno putar neywyramawa zeàmàtyry'ymawhu rehe har wanuwake nehe. Ywyramawa nemynehem nerurywete haw pupe wà. Eremàno putar wanuwake nehe, ta'e ereiko purumumaranugar kar har romo nezar pe ne xe, Zuta wanuwihawete pe ne xe, ere izupe nehe, i'i ihewe.
19 Tupàn Tuweharupi Wiko Ma'e uze'eg Xemina pe.
— Ureityk putar nerenaw ywate har wi ihe nehe. Ikàg 'ym ma'e romo urumuigo kar putar nehe.
20 Na'e ainoz putar heremiruze'eg Eriaki nehe. Iwki ta'yr a'e. 21 Amunehew kar putar tuwihaw kamir izupe nehe. Amono putar neku'aw har izupe nehe. Amono putar nepuner haw paw izupe nehe. Eriaki wiko putar Zeruzarez tawhu pe har wanu ài nehe, Zuta ywy rehe har wanu ài nehe no. 22 Amono putar tuwihaw romo hexak kar haw izupe nehe. Wiko putar tuwihaw tuwihawete iwy pe nehe. Aze uwàpytymawok ma'e nehe, ni amo nuwàpytym kwaw a'e ma'e wà nehe. Aze uwàpytym ma'e nehe, ni amo nuwàpytymawok kwaw wà nehe. 23 Teko umupu'àgatu tàpuz izyta ràm ywy rehe wà, nezewegatete amuigo kar putar a'e awa tuwihaw romo nerekuzaromo ihe nehe. Teko uzeruze'egatu putar iànàm paw wanehe a'e wà nehe, ta'e tuwihaw romo hekon putar a'e nehe xe. 24 Iànàm a'e wà, ikàg wera'u ma'e wà, ikàg 'ym wera'i ma'e wà no, ipuhuz katu putar izupe a'e wà nehe. Hekuzar katu putar wanemi'u izupe nehe. Hekuzar katu putar wama'e ime'eg myr izupe nehe no. Umekuzar putar wama'e paw wanupe nehe. Iànàm nuzawy kwaw kanek tàpuz izyta rehe imuzaiko pyrer wà, kawawhu wà no, y'a wà no. 25 Izyta upen wapuhuz katu haw wi. Nezewegatete Eriaki upytu'u putar tuwihaw romo wiko re nehe. Iànàm paw ima'uhez putar wà nehe no. Ihe Tupàn Tuweharupi Wiko Ma'e Ikàg Wera'u Ma'e amume'u ko ma'e kwez ihe kury.