1 Peme'egatu nehe. Tupàn Tuweharupi Wiko Ma'e umuaiw putar ywy nehe.

Uzapo putar ywy ywyxiguhu romo nehe.

Umuaiw putar ywy nehe.

Umuhàmuhàz putar hehe har wà nehe no.

2 Uzapo putar nezewegatete teko paw wanupe nehe no,

xaxeto wà nehe, xaxeto 'ym wà nehe no,

hemetarer katu ma'e awa wà nehe, wanupe uma'ereko ma'e wà nehe no,

hemetarer katu ma'e kuzà wà nehe, wanupe uma'ereko ma'e wà nehe no,

ma'eme'egar wà nehe, ma'eme'eg kar har wà nehe no,

wemetarer amo pe màràn 'ar rehe imono har wà nehe, wanemetarer imur pyrer ipyhykar wà nehe no.

3 Umuaiw putar ywy paw nehe.

Umumaw putar ywy paw nehe, ta'e Tupàn Tuweharupi Wiko Ma'e umume'u a'e ma'e wemiapo ràm a'e xe.

4 Uxinig ywy oho iko. Oxoroxorok no.

Ywy paw upaw oho iko.

Ywak upaw oho iko. Ywy uzemuaiw oho iko.

5 Ywy na'ikatu kwaw Tupàn henataromo a'e, ta'e hehe har na'ikatu kwaw henataromo a'e wà xe.

Nuweruzar kwaw Tupàn ze'eg wà. Nuweruzar kwaw hemiapo karer wà. Tupàn uzapokatu uze'eg wanehe we.

Teko uhaw a'e ze'eg a'e wà. — Xiruzar a'e ze'eg tuweharupi nehe, i'i kwehe mehe wà. Upytu'u heruzar ire wà.

6 A'e rupi Tupàn omono uze'egaiw hereko ywy rehe kury. Umumaw hereko no.

Ywy rehe har umekuzar wemiapo kwer waiko wà kury.

Tata ma'e hapy har wapy ywy rehe har wà.

Xo màràmàràn zo uhem putar izuwi wikuwe pà wà nehe.

7 Uwà tyw uxinig oho waiko wà.

Nuhyk kwaw win purupe.

Hurywete ma'e kwer paw ikuhem waiko uzemumikahy pà wà kury.

8 Teko numupu kwaw ipu ma'e wà kury.

Numupu kwaw uwioràwiràn uzegar haw hurywete ma'e imuzàg pà wà.

Mynykaw iapo arer upytu'u iapo re wà. Uzegar ma'e kwer upytu'u uzegar ire wà no.

9 Nui'u kwaw win pupe umynykaw pe wà kury.

Uwà iro wanupe kury.

10 Tawhu teko waka'u awer iaiw kury.

A'e pe har uwàpytym wàpuz huken wà.

Numuixe kar kwaw ni amo wà.

11 Teko uhapukaz nahu rupi wà,

ta'e naheta kwaw win wanupe kury xe.

Turywete haw upaw wanuwi.

Uhem turywete haw waiwy wi.

12 Iaiw tawhu kury. U'ar tàpuz paw rupi.

Uken uzekazeka a'e no.

13 Xo màràn uri zo heta u'yw rehe wà,

xo màràn uwà zo heta u'yw rehe wà

wapo'o re wà.

Nezewegatete ywy nànàn xo màràmàràn

teko zo wikuwe putar wà nehe.

14 Wikuwe ma'e uzegar putar urywete haw rehe wà nehe.

Kwarahy heixe haw kutyr wiko ma'e umume'u putar Tupàn Tuweharupi Wiko Ma'e uhua'u haw a'e wà nehe.

15 Kwarahy ihemaw kutyr wiko ma'e umume'u ikatu haw wà nehe.

Yryhu iwyr wiko ma'e

umume'u putar Tupàn Tuweharupi Wiko Ma'e Izaew wazar her ikatu haw wà nehe.

16 Teko ywy muite wera'u rehe har

uzegar Tupàn Ikatuahy Ma'e ikatu haw rehe wà. Xinu wazegar mehe zane wà.

Aze'eg nezewe ihe kury. — Hemaranugar ihe. Hepuhareko pe nehe.

Napuner kwaw amo ma'erahy ipuraraw paw rehe.

Teko wanupe ikatu 'ym ma'e iapo har wà, hemu'em wiwi waiko amo wanupe wà.

Heta temu'emaw taw wanàwanàn, a'e ihe.

17 Pezeapyaka katu nehe, teko ywy nànànar wà.

Uzemi'ikar ma'e uzàn oho miar wanaikweromo wà. Nezewegatete zauxiapekwer uzàn putar oho penaikweromo wà nehe no.

Uzapo ywykwar ipyk pyr pepyhyk àwàm romo wà. Uzapo tukaz pepyhykaw romo wà.

18 Uzemi'ikar ma'e wanuwi uhem ma'e kwer u'ar putar ywykwar pupe nehe.

Ywykwar wi uhem ma'e kwer uzepyhyk kar putar miar izepyhykaw zàwenugar pupe nehe.

Ukyr etea'u putar àmàn nehe.

Nuzawy kwaw ypaw wanehe izakookaw nehe. Uryryryryz putar ywy uwy pe har rehe nehe no.

19 Ywy uryryryryz putar oxoroxorok pà nehe.

Uzepei'ài'àg putar upaw rupi nehe.

20 Ywy uzemupy'àpy'àm putar uka'u ma'e ài nehe.

Uzemutuhug xe kutyr nehe, pemutyr nehe no, 'amutyr nehe no.

Nuzawy kwaw tàpuzràn ywytuaiw henataromo har nehe.

Ikatu 'ygwer ywy hemiraha ipuhuz katu a'e.

A'e rupi ywy nuzawy kwaw awa u'ar ma'e kwer nehe. Nupu'àm wi kwaw nehe.

21 A'e 'ar mehe Tupàn Tuweharupi Wiko Ma'e uzepyk putar teko waneruze'egar ywak rehe har wanehe nehe.

Uzepyk putar tuwihaw ywy rehe har wanehe nehe no.

22 Omono'og putar ywykwar pupe waneityk pà nehe.

Upyta putar a'e pe uhem 'ym pà kwarahy tetea'u wamumaw pà wà nehe.

A'e re Tupàn uzepyk putar wanehe nehe.

23 Zahy upytu'u putar uhyape re nehe, ta'e imaranugar putar nehe xe.

Kwarahy hakuir putar ukyze haw wi nehe,

ta'e Tupàn Tuweharupi Wiko Ma'e Ikàg Wera'u Ma'e

wiko putar tuwihawete Xiàw ywytyr rehe nehe xe, Zeruzarez tawhu pe nehe xe.

Wemiaihu wanuwihaw wanenataromo wexak kar putar ukàgaw nehe.

Wexak kar putar upuràg eteahy haw nehe no.