1 A'e 'ar mehe Tupàn Tuweharupi Wiko Ma'e upyhyk putar utakihepuku nehe.

Uhua'u itakihe. Ikàg no. Ipuhuz no.

Teko uze'eg àzàguhu Erewiàtà her ma'e rehe wà. Tupàn ukutuk putar a'e àzàguhu a'e nehe.

Uwawak àzàguhu a'e. Uzemàzemàn no.

Tupàn Tuweharupi Wiko Ma'e uzuka putar mozuhu yryhu pe har a'e nehe.

2 A'e 'ar mehe Tupàn Tuweharupi Wiko Ma'e uze'eg putar nezewe nehe.

— Pezegar uwà heremitygwer pe har heta tetea'u haw rehe pe nehe.

3 Azekaiw hehe. Amuàkym tuweharupi no.

Ame'egatu hehe 'aromo. Ame'egatu hehe pyhaw no.

Nezewe mehe ni amo numuaiw kwaw wà nehe.

4 Naikwahy kwaw izupe kury. Hakuir hekwahy haw.

Aze xu hezuz imuaiw kar pà nehe, aze ka'a hezuz imuaiw kar pà nehe no,

amunyk putar tata xu rehe nehe, ka'a rehe nehe no, wamumaw pà nehe.

5 Aze heremiaihu wàmàtyry'ymar izepytywà kar wer ihewe wà nehe,

tuwe uzemuawyze kar ihewe wà nehe.

Azeharomoete, tuwe upytu'u heàmàtyry'ym ire wà nehe, i'i putar Tupàn.

6 Ywyra ikatu ma'e hapo katu a'e.

Na'e hezuz. A'e re iputyr.

Na'e i'akatu.

Nezewegatete teko Izaew izuapyapyr umynehem putar ywy paw a'e wà nehe no.

7 Tupàn Tuweharupi Wiko Ma'e uzepyk Izaew wanehe.

Uzepykahy wera'u waàmàtyry'ymar wanehe.

Tupàn uzuka xo màràmàràn Izaew izuapyapyr zo a'e wà.

Uzuka Izaew wazuka arer tetea'u wà.

8 Uzepyk wemiaihu wanehe, amo ywy rehe wamono kar pà ipyhyk pyrer romo wà.

Umuhem kar waiwy wi upytuhemaw ikàg ma'e pupe.

Ipytuhemaw ikàg a'e.

Nuzawy kwaw ywytu kwarahy ihemaw wi ur ma'e.

9 Umunàn putar teko wanemiapo kwer ikatu 'ym ma'e nehe.

— Pekatu herenataromo kury, i'i putar wanupe nehe.

Aze teko weityk tupàn a'ua'u amo ywy rehe har wazar wamuwete haw wà nehe,

aze ukauka wamuwete haw izyta wà nehe, ywy ku'i kwer romo iapo pà wà nehe,

ita tàtà 'ym ma'e ikaika haw ài wà nehe,

aze umumaw ywyra tupàn a'ua'u wanagapaw romo iapo pyrer wà nehe, aze weityk yhyk hyàkwegatu ma'e hapy haw ikaika pà wà nehe, xo a'e mehe zo Tupàn heharaz putar wanemiapo kwer ikatu 'ym ma'e wi nehe.

10 Tawhu pàrirogawaiha pupe imim pyrer, uzeapo teko heta 'ymaw romo kury.

Ni amo nuiko kwaw a'e pe wà kury.

Nuzawy kwaw ywyxiguhu.

Uzeapo tapi'ak wamai'u haw romo.

Ma'ea'yr u'u ka'api'i a'e pe upytu'u pà wà.

11 Ywyràkà uxinig upeupen pà.

Kuzà omono'og heraha zepe'aw romo wà.

Ko teko nukwaw kwaw ma'e wà.

A'e rupi Tupàn zaneapo arer nupuhareko kwaw wà nehe.

Uzepyk putar tuwe wanehe nehe.

12 A'e 'ar mehe Tupàn Tuweharupi Wiko Ma'e o'ok putar wemiaihu teko amogwer teko wamyter wi upaw rupi wà nehe. Ko 'ar rehe hemiaihu wiko ywy tetea'u wanehe wà. Waneko haw uzypyrog Ewparat yrykaw pe. Oho Ezit ywy rehe no. Teko oxooxok arozràn iapirer wi henuhenuhem pà wà. Nezewegatete amono'og putar Izaew ihe wà nehe no, amo teko wanuwi wa'ok pà pitàitàigatu ihe wà nehe no.