38
Tupàn umukatu tuwihawete Ezeki a'e
1 A'e kwarahy imumaw mehe tuwihawete Ezeki ima'eahy. Umàno tària'i. Tupàn ze'eg imume'u har Izai Amoz ta'yr oho hexak pà. Uze'eg izupe,
— Tupàn Tuweharupi Wiko Ma'e uze'eg nezewe newe. — Emuàgà'ym nema'e nehe, ta'e nanekatu kwaw nehe xe. Ezemuàgà'ym nemàno àwàm rehe nehe, i'i iko newe, i'i Izai izupe.
2 A'e mehe Ezeki uwak ywyok kutyr Tupàn pe uze'eg pà kury.
3 — O Tupàn Tuweharupi Wiko Ma'e, nema'enukwaw hereko awer rehe nehe. Apureruze'egatu neze'eg heruzar pà ihe. Tuweharupi aruzar katu tuwe neze'eg ihe. Tuweharupi azapo neremiapo putar haw no, i'i izupe.
Na'e uzai'oahy kury.
4 Na'e Tupàn umuzewyr kar Izai Ezeki pe kury. 5 — Eze'eg nezewe izupe nehe, i'i izupe.
— Ihe Tupàn Tuweharupi Wiko Ma'e neràmuz Tawi izar ihe, ainu ihewe neze'eg mehe ihe kury. Aexak nerehay kwer no. Amumaw kar putar amo 15 kwarahy newe nemuigo kar pà ihe nehe. 6 Urupyro putar Axir wanuwihawete wi ihe nehe. Apyro putar 'aw tawhu izuwi ihe nehe no, ere izupe nehe, i'i Tupàn Izai pe. 7 Uwazar Izai ize'eg izupe. — Tupàn Tuweharupi Wiko Ma'e uzapo putar ma'e newe nehe. Nezewe mehe erekwaw putar hemimume'u kwer iapo àwàm nehe. 8 Kwehe mehe tuwihawete Akaz uzapo amo myromyrogaw a'e. Umuzewyr kar putar Tupàn Tuweharupi Wiko Ma'e i'àg a'e nehe, 10 ipyrogaw wamim wi kar pà izupe a'e nehe, i'i Izai tuwihawete pe.
Umuzewyr kar i'àg uze'eg rupi katete 10 ipyrogaw wamim kar pà izupe.
9 Tuwihawete Ezeki ikatu re umuzàg ko zegar haw Tupàn ikatu haw rehe:
10 — Àmàno putar hetua'uhez 'ym mehe we ihe nehe, a'e hezeupe.
— Ko 'ar henataromo apyta putar umàno ma'e kwer waneta haw pe nehe, a'e hezeupe.
11 — Naexak pixik kwaw Tupàn Tuweharupi Wiko Ma'e
herekuwe mehe nehe, a'e hezeupe.
— Naexak pixik kwaw amo teko ihe wà nehe, a'e hezeupe.
12 Umuaikwera'i kar hereko haw imumaw pà a'e.
Nuzawy kwaw àràpuhàràn mono'ogar wanàpuzràn. Na'arewahy umuezyw imukanaw pà imuàgà'ym pà muite heraha pà wà, a'e hezeupe.
Kamir iapo har omonohok pàn ipehegwer a'e. Hereko haw nuzawy kwaw pàn ipehegwer, a'e hezeupe.
— Tupàn hemumaw putar na'arewahy kury, a'e hezeupe 'aromo ihe, pyhaw ihe no.
13 Amumaw pytun gatu herahy haw rehe, hehapukaz pà.
Aze mo zàwàruhu iriàw ukauka hekàgwer iko a'e, a'e mehe mo hahy mo nezewe ihewe.
'Aromo pyhaw, — Tupàn hemumaw putar nehe, a'e hezeupe.
14 Hekuhema'i wiriri ài.
Hekuhem pyku'i ài.
Hereha ikene'o, ta'e amumaw 'ar tetea'u ywak rehe heme'e pà heker 'ym pà ihe xe.
O hezar, apuraraw ma'erahy tekoko ihe. Hepyro pe nehe, a'e izupe.
15 Napuner kwaw Tupàn pe hezai'o pà.
A'e ae hemuma'eahy kar a'e.
Napuner kwaw heker haw rehe ta'e azemumikahy ihe xe.
16 O hezar, uruikuwe ure, ta'e erezapo ma'e urewe ne xe.
Aikuwe ihe no, ta'e erezapo ma'e ihewe ne xe.
Emur neruhàgaw ihewe nehe.
Nezewe mehe namàno kwaw nehe.
17 Erepuraraw kar ma'erahy ihewe hemukatu pà ne.
Akwaw neremiapo kwer.
Nezewe rehe we hepyro pe hemàno haw wi,
ta'e eremunàn heremiapo kwer ikatu 'ym ma'e paw ihewi ne xe.
18 Umàno ma'e kwer waneta haw pe har numume'u kwaw neremiapo kwer ikatu haw wà.
Ni amo numume'u kwaw nerer ikatu haw wà.
A'e pe har nuzeruzar kwaw puruwi netyryk 'ymaw rehe wà.
19 Wikuwe ma'e umume'u nekatu haw wà.
Amume'u nekatu haw teko wazàwegatete ihe kury.
— Teko paw upuner Tupàn rehe uzeruzar haw rehe wà,
i'i awa wa'yr wanupe wà.
20 Hepyro pe, o Tupàn Tuweharupi Wiko Ma'e.
A'e rupi urumupu putar urewioràwiràn ure nehe. Urumuzàg putar nekatu haw rehe zegar haw nehe no.
Urumumaw urereko haw paw neràpuzuhu pupe nekatu haw imume'u pà ure nehe.
21 Na'e Izai uze'eg tuwihawete rehe uzekaiw ma'e wanupe kury.
— Pemono pi 'a kwer imuku'i pyrer tuwihawete iperew rehe nehe. Ikatu putar nehe, i'i wanupe.
22 Upuranu tuwihawete Ezeki hehe.
— Ma'e uzeapo putar Tupàn Hàpuzuhu pe heho àwàm hexak kar pà ihewe nehe, i'i izupe.