1 Teko ywy muitea'u har wà, ihe Tupàn hemiruze'eg romo aiko ihe.

Pezeapyaka katu heze'eg rehe nehe.

Pezekaiw katu heze'eg rehe nehe, teko ywy nànànar wà.

Aikuwe hehy hie pe ihe.

A'e wi hehem 'ym mehe we Tupàn Tuweharupi Wiko Ma'e herexak a'e.

Nazexak kar kwaw a'e mehe ihe rihi.

Herenoz herer imume'u pà a'e mehe a'e.

2 Uzapo heze'eg takihepuku haime katu ma'e ài.

Hemim hepyro pà opo pupe.

Heapo u'yw hakwa katu ma'e ài.

Hemonokatu a'e. — 'Ar ikatu ma'e rehe apyhyk putar nehe, i'i ihewe.

3 Uze'eg nezewe ihewe. — Izaew izuapyapyr wà, peiko heremiruze'eg romo.

Aexak kar putar hepuner haw purupe nehe, ma'e iapo kar pà peme nehe,

i'i Tupàn.

4 Ihe aze'eg hezeupe ihe. — Ama'ereko tetea'u ihe.

Nezewe rehe we Izaew nuzewyr kwaw Tupàn pe wà. Heremiapo kwer paw nahekuzar kwaw, a'e hezeupe.

Nezewe rehe we akwaw Tupàn Tuweharupi Wiko Ma'e ihewe hekuzar imur àwàm ihe.

Umekuzar putar hema'ereko awer a'e nehe.

5 Hezexak kar 'ym mehe we

Tupàn Tuweharupi Wiko Ma'e herexak wemiruze'eg romo hemuigo kar pà.

Omono'og kar wemiaihu ihewe wà.

— Emuzewyr kar heremiaihu ihewe ne wà nehe, i'i ihewe.

Hekatuahy tuwe Tupàn Tuweharupi Wiko Ma'e pe ihe.

Tupàn hezar wiko hekàgaw romo a'e.

6 Tupàn Tuweharupi Wiko Ma'e uze'eg nezewe ihewe.

— Ereiko putar heremiruze'eg romo nehe.

Eremuzewyr kar putar Izaew umàno 'ym ma'e kwer ihewe ne wà nehe.

Eremono'og putar a'e teko Izaew izuapyapyr ne wà nehe, pitài teko romo wamuigo kar pà ne wà nehe. Azapo kar putar a'e ma'e newe nehe.

Amo ae ma'e azapo kar putar newe nehe no. Urumuigo kar putar tatainy zàwenugar teko amo ae ywy rehe har wanupe nehe no.

Nezewe mehe ereraha putar hepurupyro haw ywy nànànar wanupe nehe no, i'i Tupàn.

7 Tupàn Tuweharupi Wiko Ma'e a'e, Izaew wazar Ikatuahy Ma'e a'e,

wapyro har a'e, uze'eg wemiruze'eg pe a'e kury.

Teko amo ywy rehe har tetea'u na'iakatuwawahy kwaw hemiruze'eg rehe wà.

Tuwihawete wanupe uma'ereko e ma'e romo hekon a'e.

Tupàn Tuweharupi Wiko Ma'e uze'eg wemiruze'eg pe.

— Tuwihawete a'e wà nehe, tuwihawete wana'yr a'e wà nehe no, wexak putar nepuner haw a'e wà nehe.

Ur putar nepy huwake wapyk pà upenàràg rehe wà nehe, nemuawate haw hexak kar pà newe wà nehe.

Ta'e ihe Tupàn Tuweharupi Wiko Ma'e ihe azapo ma'e heremimume'u kwer rupi katete ihe xe.

Ihe Izaew wazar Ikatuahy Ma'e ihe, urexak heremiruze'eg romo nemuigo kar pà ihe,

— Hekatu haw purupe hexak kar haw 'ar mehe nehe,

awazar putar peneminozgwer peme ihe nehe.

Pepyro àwàm 'ar ihem mehe nehe, apupytywà putar nehe.

Azekaiw katu putar penehe ikatu 'ymaw wi nehe.

Azapokatu putar heze'eg teko ywy nànànar wanupe nehe, peinuinuromo nehe.

Azapo wi putar ywy peneko haw nehe.

Amuzewyr kar putar peywy imuaiw pyrer nehe no.

9 Aze'eg putar zemunehew paw pe har wanupe nehe. — Pehem zemunehew paw wi nehe, a'e putar wanupe nehe.

Ipytunaw rehe wiko ma'e wanupe aze'eg putar nezewe nehe no. — Ni amo nuiko kwaw pezar romo wà kury. Peiko izar 'ym ma'e romo kury, a'e putar wanupe nehe.

Umai'u putar pe iwyr àràpuhàràn hawitu ma'e ài wà.

Te ywytyr ka'a heta 'ymaw rehe wexak putar ka'api'i wà nehe.

10 Na'ima'uhez kwaw wà nehe. Na'iziwez kwaw wà nehe.

Kwarahy haku haw nuhem kwaw wanehe nehe. Ywytu haku ma'e ywyxiguhu wi ur ma'e kwer nupuraraw kar kwaw ma'erahy wanupe nehe,

ta'e apuhareko katu ihe wà xe. Aexak kar putar waho àwàm wanupe nehe.

Araha putar ytyzuzàmaw pe wà nehe.

11 Azapo putar pe ywytyruhu rehe wanupe nehe.

Amuhygatu putar pe heremiaihu waho àwàm romo nehe.

12 Uzewyr putar ywy muitea'u har wanuwi wà nehe.

Ur putar kwarahy heixe haw awyze har kutyr wi wà nehe. Ur putar kwarahy heixe haw wi wà nehe no.

Ur putar ywy kwarahy hemaw awyze har kutyr har Àxuwà her ma'e wi wà nehe no.

13 Pezegar nehe, ywak. Penurywete nehe, ywy.

Ywytyr wà, penehapukaz penurywete haw rupi nehe,

ta'e Tupàn Tuweharupi Wiko Ma'e umurywete kar wemiaihu wà xe.

Upuhareko ma'erahy ipuraraw par wà no.

14 Teko Xiàw ywytyr rehe har uze'eg nezewe wà.

— Tupàn Tuweharupi Wiko Ma'e upuir zanewi a'e.

Heharaz zanewi a'e, i'i wà.

15 Tupàn Tuweharupi Wiko Ma'e uwazar waze'eg wanupe.

— Aipo kuzà upuner umemyr wi heharaz haw rehe.

Aipo upuner umemyr iamutar katu re upytu'u haw rehe.

Aze mo agwer ma'e uzeapo,

nezewe rehe we nahereharaz pixik kwaw pewi ihe nehe.

16 Zeruzarez, amuapyk nerer hepo rehe.

Nahereharaz pixik kwaw pàrirogaw iaiha katu ma'e neywyr har wi nehe.

17 Neapo wi wi àràm uhem waiko na'arewahy wà.

Ko 'ar rehe we nereityk arer nemumaw parer uzàwehem oho waiko newi wà.

18 Eme'e nezeywyr upaw rupi nehe. Exak uzeapo romo ma'e nehe.

Nepupe wiko ma'e kwer uzewyr wà waiko wà. Uhem wà waiko wà.

Amume'u ko ma'e hereko haw rehe ihe kury. Upaw rupi wiko ita hekuzar katu ma'e ài ihewe wà.

Wiko putar nemupuràg eteahy kar haw romo a'e ita ài wà nehe.

Nerurywete putar neretekwer rehe wamunehew mehe nehe.

Kuzà imen ma'e ràm umunehew ita hekuzar katu ma'e wetekwer rehe a'e, nezewegatete nepupe wiko ma'e ràm wiko putar ita ipuràg eteahy ma'e zàwe newe wà nehe no.

19 Zauxiapekwer umuaiw neywy. Ni amo teko nuiko kwaw a'e pe wà.

Ko 'ar rehe teko tetea'u wiko putar hehe wà nehe. Ywy ipixika'i putar wanupe nehe.

Nezukazuka arer wà nehe, nereityk arer wà nehe, muite heraha pyr romo wiko putar wà nehe.

20 Amo teko uzexak kar muite newi wà, uzar waneko haw pe wà.

Uzewyr nepupe wiko pà wà kury.

Amo 'ar mehe uze'eg putar nezewe wà nehe.

— Ko ywy ipixika'i wera'i zanewe.

Aze mo heta ywy uhua'u wera'u ma'e zanereko àwàm romo, i'i putar wà nehe.

21 Na'e ereze'eg putar nezewe nezeupe nehe:

Mo hemuigo kar ko kwarer wahy romo ko kuzàtài wahy romo a'e.

Aiko kuzà imemyr haw rehe upuner 'ym ma'e romo ihe.

Heityk pyrer romo aiko. Naheputar kwaw wà. Aiko zemunehew paw pe har zàwenugar romo.

Mo umugakwaw ko kwarer ko kuzàtài ihewe wà.

Aiko e ihe.

Ma'e wi ur ko teko paw wà, ere putar nehe.

22 Zanezar Tupàn Tuweharupi Wiko Ma'e uze'eg wemiaihu wanupe.

— Aupir putar hepo nehe.

Apoe'eg putar teko amo ywy rehe har wanuwihaw wanupe nehe.

— Peraha pena'yr penazyr wamuzewyr kar pà

Zeruzarez tawhu pe pe wà nehe.

Perur pepuxi'awar romo pe wà nehe. Perur peaxi'i rehe pe wà nehe no.

23 Tuwihawete amo ae ywy rehe har uzekaiw katu putar pememyr wanehe a'e wà nehe.

Tuwihawete kuzà wiko putar wanehe uzekaiw ma'e romo wà nehe no.

Tuwihawete wà, tuwihawete kuzà wà no, uzeamumew putar upenàràg rehe wapyk pà penenataromo wà nehe.

Umuhyk putar uwa ywy rehe wà.

Uwerew putar ywy imuku'i pyrer pepy wi u'ar ma'e kwer wà nehe no.

Nezewe mehe pekwaw putar Tupàn Tuweharupi Wiko Ma'e romo hereko haw nehe.

Herehe uzeruzar ma'e nuzemumikahy pixik kwaw wà nehe,

24 Zeàmàtyry'ymawhu imumaw ire zauxiapekwer upyhyk ma'e tetea'u a'e wà.

Aipo amo upuner a'e ma'e ipyro haw rehe wanuwi wà.

Tuwihawete ma'erahy ipuraraw kar har weraha teko uma'ereko e ma'e romo wamuigo kar pà a'e wà.

Aipo amo upuner wamuhem kar haw rehe izuwi a'e wà.

25 — Amo upuner, i'i Tupàn Tuweharupi Wiko Ma'e.

— Amo upyro putar a'e ma'e zauxiapekwer wanuwi a'e nehe.

Amo umuhem kar putar teko tuwihawete ikatu 'y ma'e hemipyhyk kwer a'e nehe no,

ta'e ihe azàmàtyry'ym putar peàmàtyry'ymar ihe wà nehe xe.

Ihe ae apyro putar pena'yr ihe wà nehe no.

26 A'u kar putar wo'o kwer peàmàtyry'ymar wanupe nehe.

A'u kar putar uwykwer wanupe win ài nehe no.

Nezewe mehe teko paw ukwaw putar ihe Tupàn Tuweharupi Wiko Ma'e romo hereko haw wà nehe. Pepyro har romo hereko haw ukwaw putar wà nehe no. Ihe Izaew wazar upuner ma'e ihe, aiko penekuzar imono har romo. Ukwaw putar hereko haw wà nehe no.