1 Tupàn Tuweharupi Wiko Ma'e uze'eg nezewe a'e.

— Pezeapyaka katu nehe, iziwez ma'e wà.

Pezur pei'u pà nehe.

Pezur nehe, temetarer hereko 'ymar wà.

Peme'eg kar penemi'u ràm pezuwà nehe.

Pe'u nehe.

Peme'eg kar ma'ekamy kwer pezuwà nehe, peme'eg kar win nehe no, ta'e numekuzar kwaw newe a'e wà xe.

2 Màràzàwe tuwe pemono penemetarer penemi'u 'ym imekuzar pà.

Màràzàwe mehe tuwe pemumaw penemetarer pema'ereko haw hekuzar penemi'u 'ym ime'eg kar pà.

Aze peinu heremiapo kar nehe, aze peruzar nehe, Pe'u putar temi'u ikatu wera'u ma'e nehe.

Heta putar temi'u hete katu wera'u ma'e peme nehe.

3 Pezeapyaka katu heze'eg rehe nehe. Pezur ihewe nehe.

Pezekaiw katu herehe nehe. Nezewe mehe peneko haw pyahu ma'e pereko putar nehe.

Azapokatu putar heze'egaw upaw pixik 'ym ma'e ràm penehe we ihe nehe.

Kwehe mehe amume'u heze'egatu Tawi pe izupe heremiapo ràm imume'u pà ihe. Azapo putar a'e ma'e peme ihe nehe.

4 Amuigo kar Tawi teko wanuwihaw romo ihe, waneruze'egar romo ihe no.

Hexak mehe wexak hepuner haw a'e wà.

5 Pezapo kar putar ma'e teko amo ae ywy rehe har wanupe nehe kury.

Teko penemigwaw 'ym wiko putar peme uma'ereko ma'e romo wà nehe.

Uzàn putar wà peneruzar pà wà nehe.

A'e ma'e uzeapo putar nehe, ta'e ihe Tupàn Tuweharupi Wiko Ma'e pezar ihe xe,

Izaew wazar Ikatuahy Ma'e ihe xe,

amono hepuner haw peme ihe xe. Apuereko tuwihaw ài no,

hexakaw rehe pepuner mehe we nehe.

Peze'eg Tupàn Tuweharupi Wiko Ma'e pe nehe,

penuwake heko mehe we nehe no.

7 Tuwe teko iaiw ma'e upytu'u ikatu 'ym ma'e iapo re wà nehe.

Tuwe upytu'u ikatu 'ym ma'e rehe uma'enukwaw ire wà nehe no.

Pezewyr Tupàn Tuweharupi Wiko Ma'e Zanezar pe nehe, ta'e upurupuhareko a'e xe.

Umunàn zaneremiapo kwer ikatu 'ym ma'e paw a'e no.

8 Tupàn Tuweharupi Wiko Ma'e uze'eg nezewe.

— Hema'enukwaw paw uzawy pema'enukwaw paw a'e.

Nazapo kwaw ma'e pezàwe ihe.

9 Ywak upyta ywate ywy 'aromo a'e.

Nezewegatete hema'enukwaw paw upyta tuwe pema'enukwaw paw i'aromo a'e no. Heremiapo upyta wera'u penemiapo kwer wa'aromo no.

10 Àmàn u'ar ywate wi. Àmàn huwixàg ma'e tàtà ma'e u'ar ywak wi a'e no.

Xo ywy imuàkym ire zo uzewyr ywate.

Umuezuz kar ka'a. Itua'u. Hà'yz no.

Teko upyhyk hà'yzgwer itym wi pà wà no.

Teko u'u wà no.

11 Nezewegatete heze'eg heremimume'u a'e,

nuzewyr kwaw heremimutar iapo 'ym pà nehe.

Uzapo heremiapo putar haw upaw rupi.

12 Pehem putar Mawiron wi penurywete romo nehe.

Apueraha putar peywy rehe nehe. Zauxiapekwer napeàmàtyry'ym kwaw peata mehe wà nehe.

Ywytyruhu uzegar putar urywete romo wà. Ywytyr hurywete putar uzegar pà wà.

Ywyra paw uzepopetepetek putar wà nehe.

13 Ko 'ar rehe xo xu zo heta a'e pe. Hezuz putar ywyra xipere her ma'e a'e pe nehe.

Xo ka'a zo heta ko 'ar rehe. Uzexak kar putar ma'eputyr hyàkwegatu ma'e mur her ma'e a'e pe nehe no.

A'e ma'e hexak mehe pekwaw putar heremiapo kwer nehe.

Tuweharupi ukwaw kar hekatu haw peme nehe. Nukàzym pixik kwaw nehe.