1 Tupàn Tuweharupi Wiko Ma'e uze'eg nezewe.

— Hepurupytywà wer heremiaihu wanehe.

Nuenoz kwaw upytywà àwàm ihewe wà.

Hezexak kar wer wanupe.

Naherekar kwaw wà.

— Aiko xe ihe, aiko xe ihe,

a'e teko ihewe uze'eg 'ym ma'e wanupe ihe.

2 Tuweharupi apyho hepo

a'e teko herehe ipureruzar wer 'ym ma'e wanupe.

Pe ikatu 'ym ma'e rupi pe zàwenugar rupi wata ma'e romo wanekon wà.

Wyzài wemimutar uzapo oho waiko wà.

3 Tuweharupi uzapo ikatu 'ym ma'e herenataromo umaranugar 'ym pà wà.

Uzuka ma'ea'yr tupàn a'ua'u wanupe wà, ma'etymaw a'e tupàn a'ua'u wanupe imonokatu pyrer rehe wà.

Wapy yhyk hyàkwegatu ma'e tupàn a'ua'u wanenataromo ma'ea'yr hapy haw rehe wà.

4 Oho tywypaw pe umàno ma'e kwer wanehe upuranu pà wà.

Umumaw pytun gatu teko heta 'ymaw pe wà, ta'e ipurexak wer puahu haw zàwenugar rehe wà xe.

U'u tàzàhuràn ho'o kwer wà.

Umynehem ukawaw temi'u ihewe ikatu 'ym ma'e pupe wà.

5 A'e re uze'eg nezewe amo wanupe.

— Pepytu'u nehe.

Pepokok zo urerehe nehe, ta'e uruiko ikatu wera'u ma'e romo pewi ure xe, i'i waiko wà.

Agwer teko hemuikwahy kar a'e wà.

Hekwahy haw nuzawy kwaw tata uwew 'ym ma'e.

6 Amuapyk wanemiapo kwer paw hepape rehe ihe.

Napytu'u kwaw wanehe hezepyk 'ym mehe we ihe nehe.

Amekuzar kar putar wanemiapo kwer ikatu 'ym ma'e wanupe ihe nehe.

7 Umekuzar putar waipy wanemiapo kwer wà nehe no.

Wapy yhyk hyàkwegatu ma'e tupàn a'ua'u wanenataromo ma'ea'yr hapy haw ywytyr rehe har rehe wà.

Uzuhaw heze'eg ma'ea'yr ywytyr rehe wazuka mehe wà.

A'e rupi amekuzar kar putar wanemiapo kwer ikatu 'ym ma'e wanupe nehe,

upaw rupi katete nehe, pitàitàigatu nehe.

Uze'eg Tupàn Tuweharupi Wiko Ma'e kwez kury.

8 Uze'eg wi Tupàn Tuweharupi Wiko Ma'e.

— Aze amo uwà tynehem tykwer pupe nehe,

aze amo wexak a'e uwà i'yw rehe wà nehe, uze'eg putar nezewe izupe wà nehe.

— Naximumaw kwaw nehe,

ta'e win imy'e pyràm

ikatuahy putar a'e nehe xe, i'i putar izupe wà nehe.

Nezewegatete ihe nehe no, azamutar katu heremiaihu ihe wà.

A'e rupi namumaw kwaw ihe wà nehe.

9 Amono putar wazuapyapyr tetea'u Zako izuapyapyr wanupe ihe wà nehe,

Zuta izuapyapyr wanupe ihe wà nehe no.

Amuigo kar putar a'e teko heywy izar romo ihe wà nehe no.

Teko heremixamixak kwer wiko putar Ywy Heremimume'u kwer izar romo wà nehe.

Wiko putar hehe tuweharupi wà nehe.

10 Aze heremiaihu uzeagaw heremimutar iapo pà wà nehe,

ywy ywytyr heta 'ymaw Xarom her ma'e uzeapo putar waneimaw àràpuhàràn hawitu ma'e wamai'u haw romo nehe.

Waneimaw tapi'ak u'u putar ka'api'i ywyàpyznaw Iaiw Paw her ma'e rehe wà nehe no.

11 Amo peinuromo har utyryk ihewi wà.

Ywytyr herenaw ikatuahy ma'e na'ikatu kwaw peme.

Pemono temi'u win rehe we tupàn a'ua'u Kaz her ma'e pe wà, Meni her ma'e pe no.

— Zanereko àwàm ikatu ma'e imur àràm wà, peze a'e tupàn a'ua'u wanupe.

— Zanereko àwàm ikwaw par wà, peze a'e tupàn a'ua'u wanupe no.

12 Nezewe haw uzeapo putar peme nehe. Amo pezuka putar takihepuku pupe wà nehe.

Apumuapyk kar putar pepenàràg rehe pezuka kar pà wanupe nehe.

Ta'e ihe apuenoenoz ihe xe. Napewazar kwaw heze'eg ihewe.

Aze'eg peme. Napezekaiw kwaw herehe.

Pezapo ihewe iro ma'e.

Pexaexak ma'e hemuikwahy kar haw no,

13 A'e rupi Zanezar Tupàn Tuweharupi Wiko Ma'e uze'eg kury.

— Heta putar temi'u heremiruze'egete wanupe nehe, nezewe rehe we pe pema'uhez putar nehe.

Ui'u putar wà nehe no, nezewe rehe we peiwez putar nehe no.

Hurywete putar a'e wà nehe. Pemaranugar putar nehe.

14 Uzegar putar urywete romo wà nehe.

Pekuhem putar pezemumikahy pà nehe.

Pezai'o putar nehe. Pepy'a tynehem putar pezemumikahy haw pupe nehe.

15 Ihe pezar Tupàn Tuweharupi Wiko Ma'e ihe nehe, apuzuka putar ihe nehe.

Heremiruze'eg heremiaihu heremixamixak kwer a'e wà nehe,

umume'u putar pener uze'egaiw amo rehe imono mehe wà nehe.

Amono putar her ipyahu ma'e heremiruze'eg wanehe nehe.

16 Wyzài teko Ywy Imume'u Pyrer rehe har nehe, aze ze'egatu wenoz nehe,

Tupàn puruwi utyryk 'ym ma'e pe wenoz putar nehe.

Aze umume'u wemiapo ràm nehe,

Tupàn Puruwi utyryk 'ym ma'e her rehe umume'u putar nehe,

i'i Tupàn.

Tupàn Tuweharupi Wiko Ma'e uze'eg wemiaihu wanupe.

— Peneharaz putar iaiw pawer penemipuraraw kwer wi nehe.

Ihe ihe nehe no, nahema'enukwaw kwaw a'e ma'e rehe ihe nehe no,

17 ta'e azapo ywak ipyahu ma'e iteko ihe xe. Azapo ywy ipyahu ma'e iteko ihe no.

Teko paw heharaz putar uzeapo ma'e kwer wi wà nehe.

Ni amo na'ima'enukwaw kwaw hehe wà nehe.

18 Penurywete nehe. Peiko hurywete ma'e romo tuweharupi

heremiapo ràm hexak mehe nehe.

Ta'e amynehem putar Zeruzarez tawhu turywete haw pupe ihe nehe xe.

Amono putar turywete haw tetea'u ipupe har wanupe nehe no.

19 Zeruzarez ikatu putar ihewe nehe.

Heremiaihu hemynehem putar turywete haw pupe wà nehe.

Teko nuenu pixik kwaw teko wazai'o haw a'e pe wà nehe.

Ma'erahy ipuraraw paw rehe teko wanehapukaz haw nuzenu pixik kwaw a'e pe nehe.

20 Numàno pixik kwaw kwarer uzexak kar romo ma'e kwer a'e pe wà nehe.

Ni amo numàno kwaw utua'uhez 'ym mehe we uhya'uhez 'ym mehe we wà nehe.

Aze amo umàno 100 kwarahy hereko mehe nehe, — Kwàkwàmo mehe umàno a'e, i'i putar teko izupe wà nehe.

Aze amo umàno 100 kwarahy hereko 'ym mehe we nehe, — Kwa, amo omono ze'egaiw hehe aipo, i'i putar teko hehe wà nehe.

21 Pezapo putar penàpuz nehe, peiko putar ipupe nehe.

Pezutym putar uwà nehe, pe'u putar a'e win nehe.

22 Napezapo kwaw tàpuz amo waneko haw romo nehe.

Napezutym kwaw uwà win iapo pà amo wanupe nehe.

Heremiaihu umumaw putar kwarahy tetea'u wiko pà wà nehe. Nuzawy kwaw ywyra wà nehe.

Teko paw ukwaw putar wemiapo kwer ikatu haw wà nehe no.

23 Wanemiapo ikatu putar paw rupi nehe.

Wana'yr nuzemumaw kwaw iaiw paw rehe wà nehe,

ta'e heze'egatu upyta putar wanehe tuweharupi nehe xe.

Upyta putar wazuapyapyr wanehe tuweharupi nehe no.

24 Herenoz 'ym mehe we ainu putar waze'eg nehe.

Waze'eg imumaw 'ym mehe we awazar putar waze'eg wanupe nehe.

25 Awarahu hehaite ma'e umai'u putar àràpuhàràn hawitu ma'e wainuinuromo wà nehe.

Zàwàruhu iriàw her ma'e u'u putar ka'api'i tapi'ak wainuinuromo wà nehe no.

Mozaiw nuxi'u pixik kwaw teko wà nehe.

Heywytyr ikatuahy ma'e rehe

nuzeapo kwaw ikatu 'ym ma'e nehe. Nuzeapo kwaw purumuahy kar haw nehe, i'i.

Tupàn Tuweharupi Wiko Ma'e uze'eg kwez kury.