1 Tru kwalømmerawan Roma maya misagwan ashib karub wabig César Augustobe treeg maramig kønrrai kan kilga treeg pøra weerig købig køn, chutøgucha misaamera maya nu køtashchab munchimeran tulisamig. 2 Iig køn, tru srøsrøwan munchimeran tulisingaruig, Cirenio Siria pirausrø kubenadur køb uras. 3 Inchen mayeeløba tru trendø nømuim pirau pueblomerasrø munchiwan pøra kørrømartrab ambamig nebubig køn.

4 Treekkurri Josébe Galilea pirau Nazaret puebloyugurri webya, Judea pirau Belén tru Davidweim pueblo tainuumay ibig køn, kaguende nøbe merrabsrø Davidwei misagugurri arrubig kua. 5 Incha Maríaba Belénsrø nømui munchiwan pøra kørrømartrab ibig køn. Maríabe Joséba kasharanrrab misraig kwanrriig købig køn. 6 Indiibe Belén waramnetø, Maríane unan tammisramig ura puben, 7 nui mayor nusrkawan tøgamisra, may pula, animal maig kan patiayu wayibig køn, kaguende nømuimbe ya pebøbelainuube chu kørrømisramig kaaben.

8 Inchen tru pirau Belén pulu møiløgøsrøn ubisha ashibelø ubisha ashib yem warøbene, 9 møimbe Señorwei ángel nømun kenamisren, Señorwei tørguegwalmabig nømuim pøtøgatan kebiløben, nømbe truba truba kørig kui inchibelø køn.

10 Inchen ángelbe trenchibig køn:

—Kørig kui inchimøtay cha. Kaguende ñimun wammørøsrkønrrab kan tabig srøig wam srua arrur cha, mayeelø kasraaramig kønrrai. 11 Møi Davidwei puebloyu ñimuyasig kan Kaigyugurri Wesrabig kal-lain køn cha, Cristo tru Señor. 12 Incha truig kuitamab asamibe, unane pula, animal maig kan patiayu wayig wetørranrrabguen— cha, trenchibig køn ángelbe.

13 Inchen møimbe tru urastø ángelweim pulube katøgan ángelesmera srømbalasreelø kenamisra, Tiuswan tabig waminchib trenchibelø køn:

15 Inchen ángelesmera katø srømbalasrømay amben, ubisha ashibeløbe kangurrin kangurri trenchibelø køn:

—Chi purayaitashchab, Señor namun chi taitashchab, møindøwei Belénsrø ashchab amun— cha.

16 Incha malla amba, Maríanba, Joséwanba wetørrabelø køn, unane animal main patiayu wayig. 17 Incha ashabe, ángel tru unaimburab chi taigwan tru ubisha ashibeløbe eshkaben, 18 mayeeløba chi eshkaigwan mørabe, truba kwaarøbelø køn.

19 Inchen Maríabe chi tailane treebe maig kermab isub, nuinetø esegabig køn. 20 Inchen ubisha ashibeløbe katøle ambuppe:

—Tiusbe maya nuguen tabig køn chib— truba tabig waminchib ambubelø køn, nøm chi mørigwan nøm chi asigwan, tru ángelesmera maig taig treeg purayaigwan asha.

21 Inchen trune kwalømyube unan circuncidamig puben, treeg mara, Jesús munchi pasrøbelø køn. María kwanrriig kømøwatø ángel chi munchi pasringaruig, treeg pasrig købig køn.

22 Inchen tru maig maramigwan martrai Moisés pørigu maig chibig køben, tru chilliguig kørrømisrigwan chish maram kwalømmera puben, unan Jerusalén ciudayu Señorwan ‘nuin kønrrai tranrrumøn’ chinrrab srua ambubelø køn. 23 Tru maig maramigwan martrai Señor pasrigu maig chibig køben treeg: “Mutøgucha srøsrø kal-lab nusrkawane Señorweindø tarømarig kønrrain” taigwan. 24 Tru maig maramigwan martrai Señor pasrigu maig chibig køben, pagatø nushin kui, kabe pagatø paloma-ureezheelø kui Tiusweyasig trannrrab ambubelø køn.

25 Inchen tru kwalømmerawan kan møg Jerusalén Simeón taig tsubig køn, sølgandø tabig, Tiuswan chu uragucha pesannamíig, Israel misaamera tab kømui melaigugurri webambamigwan muniirabig. Inchen Espíritu Santobe Simeónba pasrabig køn. 26 Incha nune Espíritu Santobe maig kønrrabigwan eshkain købig køn, Criston tru Señorwan ashmøwatøbe ñibe kwanrraamøn cha. 27 Inchen tru møøbe Espíritu Santo inrrai inchen Tiuswei yaumay ya, tru Jesús-unai møskalø tru maig maramigwan martrai Moisés pørigu maig chibig køben, nuimburab martrab Tiuswei yaumay srua amrrubene, 28 Simeónbe Jesús-unan nui kwalyu muta, Tiuswan tabig waminchib, trenchibig køn:

33 Inchen Joséba, Jesúswei usrimba unaimburab tru Simeón maig taigwan mørabe, kan øyeebe maig kermab isub kwaara ashen, 34 Simeónbe mayanguen tab kuilø kønrrain chabe, Jesúswei usri Maríane trenchibig køn:

—Au, i unøbe Israel misagwan truba nuwan møilane nørreelø kuigwan chigucha kømeelø kønrrai marøb, møilane nørreelø kønrrai marøb inchabig, treeg køn cha. Tiusweimburabigwan nø kenamaren, misaamera nun kashchab kui asamig, nøbe truig køn cha. 35 Truba nu møilaiwan køben, nømui manrrømerayu maig isubelø kuigwan kenamarig kønrrain cha. Inchen ñibe ñui manrrau isubigube kan espadatøga kelarrab kwani lataig isub pusrkwaig kørrømisramig kønrrun— chibig køn.

36 Inchen truyu kan ishug, Tius maig karuigwan eshkabig, Fenuelwei nimbasr, Aserwei misagugurri arrubig, Ana taikkucha wabig køn. Truibe yandø truba køllig købig køn. Truba unø kasharawa, siete años keeba tsua, 37 yandø keg kwaben nøtiig kørrømisra, yandø ochenta y cuatro años tøgaig købig køn. Tiuswei yaugurri managucha tarømisrmíig købig køn, Tiuswan køriibala tabig waminchib, ayunab, katø Tiusba waminchib yem, kwaløm Tiusweyasig treeg marøb. 38 Inchen Anabe tru urastøwei arrua, Tiuswan ‘mayanguen ungwa, ungwa’ chibig køn. Incha nøbe tru unaimburab waminchib mendabig køn tru mayeelø Jerusalén misag Tiusweilø kønrrai kaigyugurri wesrailø kømigwan isub muniirabelane.

39 Incha tru maig maramigwan martrai Señor pasrigu maig karuilan kerrigu chab marabe, Galilea pirau Nazaretsrømay ambubelø køn, tru nømuim puebloyumay. 40 Inchen unøbe nurab ippe, murig chishig, purø kusrebig misrøb iben, Tiuswei tru ka yandø tab indiibe nuim pala pasrabig køn.

41 Inchen nui møskaløbe Jerusalén pascua fiestayumay pilamørig ambubelø købig køn. 42 Incha Jesúsbe doce años tøgaig misren, fiestayumay ambubelø køn, trendø maig marøbelø køben, treeg martrab. 43 Inchen fiesta chab patsøben, nømbe yamay katø amrruben, Jesús-unøbe Jerusalén kørrømisrin køben, møskaløbe ashmuin købig køn. 44 Nømbe tru misag utu unøbe arritamab isua, mawa ambiisrø amba, nømui nømmisaamerai utuba, asiilai utuba lab menda, 45 kalawabe, Jerusalénmay katø llirabelø køn, trusrø lanrrab.

46 Incha pøn kwalømyube Tiuswei yau tru Moisés pørigwan kusrenanøbelai utu mørøb, nøgurri payib wabyu wetørrabelø køn. 47 Inchen mayeeløba mørøbeløbe truba truba kusrebig kui ashib, katø nø maig løtiilan mørøb inchabe, ke kwaara ashibelø køn. 48 Inchen møskalø ashabe, ke kwaara asha, Jesúswei usrimbe trenchibig køn:

—¿Nai nusrkai, namun chindimbarre øyeeg margu? cha. Ñui møskaimba, nababe truba truba isuilø lab ker— cha.

49 Inchene Jesúsbe trenchibig køn:

—¿Nane chinchabrre lague? cha. ¿Nabe nai Møskawei chi maramelan na marøb wamigwan ñimgan ashmeelø køtirru?— cha.

50 Inchen nømbe ni chi tainguen mørmeelø køn.

51 Inchabe nui møskaløba Nazaretsrømay katø mendig ya, maig karuben treeg mørøb megabig køn. Inchen nui usrimbe kutøgue iilan nui manrrautø isua esegabig køn. 52 Inchen Jesúsbe trurrigu kusrebig misrøb, nurab ibig køn, Tius lata, misaamera lata mayanguen tab indinab.