17
Jó mba'eve noarõveia re ijayvuague
1 — Xenhe'ẽ opa ovy ma,
xe'ára voi opa avi ovy,
ha'e xerenonde oĩ va'e ma xenhono porãa aguã anho.
2 Anhetẽ porojojai rei va'e kuery xembojere rei okuapy,
xerexa py xemoangeko reia kuery anho rei aexa.
3 Ha'e gui eme'ẽ xevy mba'emo aikuaa aguã ndee xemboeko porã 'rãa.
Enhemoĩ ndee ae ha'e nunga kuaa ukaarã.
Mba'eta ndee e'ỹ vy mava'e 'rã tu ikuaa ukaarã oĩ?
4 Mba'e ha'e kuery kuraxõ remboty ma hi'arandua oĩ e'ỹ aguã.
Ha'e rami vy neremboyvatevei ma.
5 Amongue oirũ kuery imombaarã pe omboaxa ramo
ta'y kuery voi ndaexa pyxovei 'rã.
6 — Ha'e rã xee ma xemoĩa heta va'e kuery xejojai rei okuapy aguã.
Xemoingoa xerova re onyvõmbaa rei aguã.
7 Ha'e nunga rupi ae ndaxerexa pyxovei ma xeporiau rã,
ha'e xerete regua ha'e javi kuaray'ã rami ndojekuaa porãvei.
8 Heko porã va'e kuery xerexa vy onhemondyipa rei okuapy.
Ha'e rami vy ojejavy e'ỹ va'e kuery opu'ã 'rã heko vai va'e rovai.
9 Ha'e rami teĩ heko porã va'e kuery oo tema 'rã guape rupi ae,
ipo ky'a e'ỹ va'e kuery imbaraeteve 'rã oje'oivy.
10 Ha'e gui peẽ kuery ha'e javi pejevy, peju ju kyvõ katy.
Ha'e rami avi peẽ kuery regua peteĩve ma ndajoui 'rã hi'arandu va'e.
11 Xe'ára oaxa ma ovy,
anhembopy'aague voi oaxa rivepa ma,
xepy'a re aipotaa amoĩ va'ekue ha'e javi.
12 Xevy pe pytũ peikuaa uka ára oĩa rami rive.
Ha'e vy aipo peje: “Pytũ teri teĩ hendy va'e ovaẽ rai'i ma”, peje rive.
13 Ha'e rã xee ma xenhono porãa aguã py arõ xerorã,
pytũa py ae xeruparã itui.
14 Xenhono porãarã pe ajapukai vy “Ndee ma xeru”, ha'e.
Taxo ikuai va'e pe voi “Peẽ ma ha'i ha'e xereindy kuery”, ha'e.
15 Ha'e gui mba'e tu oĩ arõ aikovy aguã?
Tá, xee arõ va'e mava'e 'rã tu oikuaa?
16 Ha'e nunga oguejy 'rã manoa rokẽ peve
xereve yvy ku'i py apytu'u ma jave — he'i.