22
Jó ojejavy etea rami Elifaz ijayvuague
1 Ha'e ramo Temã pygua Elifaz ju ombovai:
2 — Ha'e gui avakue nda'u mba'emo ovare 'rã ri Nhanderuete pe?
Any, oikuaapa va'e teĩ ojeupe ae ovare va'e.
3 Tyrã pa ndereko porãa teve ombovy'a 'rã Ipo'akapa va'e?
Xapy'a rei ndee rejejavy e'ỹ re reiko rã ha'e ojou porã 'rã teve?
4 Nhanderuete renonde rejererokyjea re teve nembopaga,
nderovai oikuaa potaa py?
5 Ndereko vaia ndatuvixai teve?
Rejejavya ma opa va'erã e'ỹ teve?
6 Mba'eta mba'e re'ỹ reipe'a mba'emo nderyvy gui,
ha'e iporiaukue'i gui voi reipe'a ijao.
7 Ikane'õ va'e pe ma yy nereme'ẽi oy'u aguã,
okaruxe va'e pe voi nerakãte'ỹ tembi'u re.
8 Ipo'akakueve pe rive yvy itui,
avakue yvatekueve anho 'rã ikuai ha'e py.
9 Ha'e rã imeve'ỹ va'e kuery ma ipo rei reve rembojevy,
ha'e tyre'ỹ kuery mbaraetea remomba.
10 Ha'e nunga rupi ae nhuã ndejokopa,
ha'e rekyjea rendu xapy'a vy renhemondyipa rei,
11 pytũa guive, mba'eve rexa e'ỹ teĩ.
Ha'e ramo ae yy tyguaxu va'e ndeao'i 'rã.
12 — Yva re yvatevea py e'ỹ teve Nhanderuete oĩ?
Ema'ẽ ha'vy jaxy-tata yva re ikuai va'e re.
Ha'e va'e ma nda'yvate ma ra'agai!
13 Ha'e rami teĩ aipo're: “Mba'e tu Nhanderuete oikuaa?
Ha'e nda'u oikuaa pota 'rã mba'emo re,
oexa 'rã teve pytũ ana rupi?
14 Mba'eta yva apy rupi ha'e oguata oikovya rupi
arai ana ojao'i 'rã
mba'emo oexa aguã rami e'ỹ”, 're.
15 Ha'e gui ndee nda'u reikoxe teri tape ymague rupi,
heko vai va'e kuery ikuaiaty rupi?
16 Ha'e va'e kuery ma oipe'apaa vyvoi raka'e hi'ára ovaẽ e'ỹ mbove.
Ha'e kuery ytarã oĩ va'ekue ma yxyry atã va'e ogueraapa.
17 Mba'eta Nhanderuete pe aipoe'i: “Ejepe'a ke orea gui!
Mba'e tu Ipo'akapa va'e ojapo 'rã orere?” he'i rire.
18 Ha'e rami teĩ ha'e kuery ro ha'e omonyẽ mba'emo porã anho.
Ha'e rã xevy pe nda'evei ae heko vai va'e kuery onhemongetaa rami aiko aguã.
19 Ha'e kuery opa rã heko porã va'e kuery oexa vy ovy'a 'rã.
Ha'e kuery re ojejavy e'ỹ va'e opuka 'rã.
20 Ha'e vy aipoe'i 'rã: “Anhetẽ, nhanderovaigua kuery omombaa ra'e,
ha'e rã mba'emo oeja va'ekue ma tata ju omomba”, he'i 'rã okuapy.
21 — Ha'e nunga rupi peteĩ rami ju pota ke eiko Nhanderuete reve,
revy'a nho aguã.
Ha'e ramo ndere ou 'rã iporã va'e.
22 Ajerure ndevy, ejapyxaka porã pota ke nembo'e rã,
ha'e ndepy'a re emoĩ ijayvua.
23 Mba'eta Ipo'akapa va'e pe rejeko rerova uka ramo reiko porã ju 'rã.
Xapy'a rei ndero gui mba'emo vai reipe'a ramo,
24 ha'e ouro rereko va'e yvy ku'i py remombo ramo,
ouro Ofir guigua rereko teĩ yakã'i rupi ita ikuai va'e mbyte rupi remombo ri ramo,
25 ha'e ramo Ipo'akapa va'e ae 'rã ndevygua oiko
ouro ha'e prata oiporavo pyre rami.
26 Mba'eta rerovy'a 'rã Ipo'akapa va'e anho,
ha'e nderova rembovy 'rã Nhanderuete-a katy.
27 Ixupe rejapukai ramo oendu 'rã,
ha'e ixupe ju rejapo 'rã renhemboayvuague.
28 Mba'emo rejapo aguã re renhembopy'a ramo oiko porã 'rã,
ha'e tape reikoa rupi omoexakãmba 'rã.
29 Nhomo'yvyĩ'ia rã rexa vy “Emopu'ã ju ke” 're ramo
Nhanderuete ogueraa jepe 'rã onhemo'yvyĩ'i va'ekue,
30 oepy 'rã ojejavy va'ekue teĩ.
Ndepo iky'a e'ỹa re oma'ẽ vy 'rã ogueraa jepe — he'i.