26
Nhanderuete ipo'akapaa re Jó ijayvuague
1 Ha'e ramo Jó ombovai:
2 — Ikangy va'e pytyvõa merami rive reiko,
ijyva mbaraete e'ỹ va'e reipytyvõ merami rive!
3 Hi'arandu e'ỹ va'e remongeta kuaa merami rive,
ha'e anhetẽ va'e reikuaa uka porãmba merami rive!
4 Mava'e nembo'ea rupi tu ndeayvu ha'e rami ete?
Mava'e guigua nhe'ẽ tu ndere oĩ ndeayvu kuaa aguã?
5 — Ha'e gui omano va'ekue nhe'ẽ ma oryryipa 'rã okuapy
yy guy py ikuaia py.
6 Nhanderuete gui manoa pygua kuery nonhemi kuaai,
yvykua vaikue ao'iarã noĩ ramo.
7 Mba'eve oĩ e'ỹa áry ha'e oipyo kuaray apu'a'ia katygua,
mba'eve oĩ e'ỹa áry ae avi onhono yvy.
8 Arai ana ikuai va'e mbyte ojoko 'rã yy,
ha'e rami teĩ arai ndoxoi 'rã iguy py.
9 Ojao'i 'rã guenda opena oinyaty,
hi'áry arai pytũa py ojao'i vy.
10 Omoĩ raka'e yy apyrã,
hexakãa ha'e pytũa mbyte py.
11 Ijayvu atã ramo yva yta
oryryi 'rã onhemondyipa vy.
12 Ombaraetea rupi omboja'o raka'e ye'ẽ,
ha'e o'arandua rupi oity ngovaigua kuery.
13 Opejua py rive omoexakã 'rã yva,
ha'e opo py ojuka 'rã teju jagua inhakuã va'e.
14 Ma'ẽ, ha'e ramigua ma hembiapo ypy rive!
Mba'eta ixugui ma nhaendu mbeguei'i anho.
Ha'e gui mava'e tu oendu kuaa 'rã ipo'akaa ryapu atã va'e?