39
1 — Ndee teve reikuaa kavara yvy'ãa rupigua ta'ya ára?
Repena kuaa teve guaxu ta'y'i ta jave?
2 Reipapa kuaa teve mbovy jaxy peve pa ha'e kuery ipuru'aa?
Reikuaa teve ha'e kuery ta'y'i aguã ára?
3 Ha'e kuery ma ta'y'i aguã ojero'a 'rã,
ha'e rami vy ojegui omoẽ 'rã haxy va'ekue.
4 Ta'y kuery ma imbaraetepa 'rã okuapy,
nhuũndy rupi ae 'rã tuvixapa.
Oopa vy ndojevyvei 'rã oxy kuerya py.
5 — Mava'e tu opoi 'rã mburika'i ka'aguy regua?
Ha'e mava'e tu ojora kuaa 'rã mburika onha ratã va'e?
6 Ha'e va'e rekoarã ma tekoa e'ỹa ame'ẽ,
yvy re'ẽroa rive ame'ẽ ikuai aguã.
7 Ha'e kuery ojojai 'rã tetã revovo,
noendui 'rã guive mymba reraa ojapuka-pukaia.
8 Yvy'ã ikuai va'e rupi ae okaruaty oĩ,
mba'eta hogue pyau va'e rekaa rupi ikuai.
9 — Toro ka'aguy rupigua teve omba'eapoxe 'rã ndevy?
Ha'e va'e teve pytũ oaxa 'rã nerymba okaruaty py?
10 Remoxã kuaa 'rã teve yvy karaĩa re?
Ha'e va'e nda'u nderakykue rupi oikaraĩ 'rã heravy yvy?
11 Hexe teve ndee rejerovia 'rã imbaraete vaipa va'e ramo?
Ixupe teve reja 'rã remba'eapoa rupi opena aguã?
12 Hexe rejerovia teve renhotỹ va'ekue nderopy ogueru aguã,
e'ỹ vy mba'emo remoa'yĩ aguã py?
13 — Guyra-nhandu ma opepo ombota-mbota 'rã ovy'a reve.
Ha'e rami teĩ guague ha'e opepo nda'u joayvu aguã ri oguereko?
14 Any, ngupi'a oeja 'rã ovy yvy py,
yvy ku'i py rive haku aguã py.
15 Mba'eta hexarai 'rã amongue opyrõ vy ombovopa va'erãa gui,
vixo nhuũndy rupi ikuai va'e opyrõmba va'erãa gui guive.
16 Nopena porãi 'rã gua'y kuery re, gua'y kuery e'ỹ re rami.
Ndoikuaa potai 'rã gua'y'i okanhymba teĩ,
17 hi'arandurã Tuuete nome'ẽi rire,
nome'ẽi mba'emo re oikuaa pota aguã.
18 Ha'e rami teĩ opo reve onha ovy aguã opu'ã ma vy
ojojai 'rã heravy kavaju ha'e hi'árygua.
19 — Ha'e gui ndee teve kavaju pe reme'ẽ 'rã imbaraeterã,
e'ỹ vy ijaju'y áry rupi remoĩ 'rã haguerã?
20 Rejapo kuaa teve tuku rami opo ovy aguã rami?
Nhomondyi 'rã oapyĩgua gui ipytuẽ raku rei reve onhendu vy.
21 Ojo'o 'rã heravy yvyugua ombaraetea ae oguerovy'aa rupi.
Ha'e vy ojepe'a 'rã ovy tembiporu revegua kuery reve joguero'a aguã.
22 Ojojai 'rã nhomongyjea kuery onhemondyi e'ỹ re.
Ha'e rami vy guakykue katy ndojevyi 'rã kyxe revegua gui voi.
23 O'áry hu'y ryru ogueraa va'e omoparã 'rã heravy,
hu'y guaxu ha'e hu'y'i hexakã va'e reve.
24 Ipoxy ha'e ivai reve omou'ũmba 'rã heravy tape,
mimby guaxu nhe'ẽ oendu ma vy ndojejokoi 'rã.
25 Mimby guaxu omonhe'ẽa ramo “Tenonde katy!” he'i 'rã.
Joe opu'ãa gui mombyry teri oo reve oetũ 'rã,
oendu 'rã huvixa kuery ojapukai atãa ha'e tembiporu revovo.
26 — Ndee ne'arandua rupi teve taguato oveve,
kuaray apu'a'ia katy opepo oipyo reve?
27 Ndeayvua rupi teve taguato guaxu oo 'rã yvate,
ha'e yvatea py guaityrã ojapo?
28 Ha'e va'e ma itaova yvate va'e re oĩ 'rã guaityrã ojapo aguã py,
itaova yvate va'e apyte áry, mba'eve rei nomoangekoia py.
29 Ha'e py oĩa gui oexa pota 'rã guembiarã.
Mombyry guive 'rã oexa.
30 Ha'e va'e rire ta'y kuery oipyte 'rã tuguy.
Mamo rã rei te'õgue ituia py ha'e voi ovaẽ 'rã — he'i.