3
Jordão yakã oaxa oje'oivyague
1 Ko'ẽ ju ramove Israel kuery ha'e javi reve Josué nhomopu'ãmba vy Sitim gui oje'oi, Jordão yakã rembe peve ovaẽmba. Ha'e py ma oke ju ranhe okuapy oaxa e'ỹ mbove.
2 Ha'e gui mboapy araa py huvixa kuery oaxa ju oje'oivy heta va'e kuery mbyte rupi.
3 Ha'e vy heta va'e kuery pe omombe'u-mbe'u vy aipoe'i:
— Senhor Penderuete guexeve guarã ojapo va'ekue ryru ma levita regua sacerdote kuery oupi heravy rã pexa vy peẽ kuery voi peo 'rã ha'e kuery rakykue.* Êxodo 25.10-16, Hebreus 9.1-5
4 Ha'e rami avi hyru gui mombyry'i 'rã peiko, mil metros-a py. Ha'e va'e re penhemboja eme, marupi pa peo aguã peikuaa aguã, mba'eta ha'e va'e tape rupi peo va'e'ỹ teri — he'i.
5 Josué avi aipoe'i avi heta va'e kuery pe:
— Pejeky'a'o ke ko'ẽ rã guarã, mba'eta peẽ kuery mbyte Senhor ojapo 'rã iporã va'e — he'i.
6 Sacerdote kuery pe voi ijayvu vy aipoe'i:
— Peupi heravy Nhanderuete guexeve guarã ojapo va'ekue ryru, ha'e peroaxa heta va'e kuery renonde — he'i ramo hyru oupi vy heta va'e kuery renonde ogueroguata heravy.
7 Ha'e gui Senhor aipoe'i Josué pe:
— Kova'e ára amboypy 'rã romboyvate aguã Israel kuery pavẽ oexaa py, ha'e kuery oikuaa aguã Moisés reve aikoague rami ndereve ju aikoa.
8 Ha'e gui ndee ma sacerdote kuery hyru reraa va'e pe ndeayvu vy aipo're: “Jordão yakã py peguejy ma vy pepyta ranhe 'rã ha'e py”, 're.
9 Ha'e ramo Josué aipoe'i Israel kuery pe:
— Penhemboja ke kyvõ rami, Senhor Penderuete ayvu pendu aguã.
10 Ha'e va'e rire Josué aipoe'ive ju:
— Po rami 'rã peikuaa Nhanderuete oikove va'e penembyte oikoa, ha'e anhetẽ penerenonde gui oipe'apa 'rãa cananeu, heteu, heveu, ferezeu, girgaseu, amorreu ha'e jebuseu kuery ha'e javi.
11 Ma'ẽ, Senhor yvy jave re ipo'aka va'e guexeve guarã ojapo va'ekue ryru ma penerenonde ogueroaxa 'rã heravy Jordão yakã.
12 Ha'e gui aỹ ma peiporavo doze avakue Israel regua, peteĩ-teĩ regua gui peteĩ ava peiporavo,
13 mba'eta Jordão yakã py sacerdote kuery Senhor yvy jave re ipo'aka va'e ayvu ryru reraa kuery oguejy ramove yy ojeaya 'rã, yvate katy gui yy ou 'rã va'ekue ijaty ramo — he'i.
14 Ha'e gui ma ha'e kuery guekoa gui oguata oje'oivy Jordão yakã oaxa aguã. Ha'e kuery renonde sacerdote kuery ogueraa okuapy Senhor ayvu ryru.
15 Hyru reraa kuery Jordão yakã py oguejy ramo yy py ipy inhakỹ. (Mba'eta Jordão ma ára pyau nhavõ tyguaxu raxa va'e, hembe ikuai va'e áry rupi guive.)
16 Ha'e gui yy yvate katy gui ou va'e opyta. Adã tetã gui mombyry'i ono'õ, Zaretã rexei oĩ va'e katy. Ha'e rã yvy joja reia regua ye'ẽ ro katy oxyryague ma typa. Ha'e ramo ha'e kuery oaxa oje'oivy, Jericó tetã rexei'i ae.
17 Ha'e rã sacerdote kuery Senhor ayvu ryru reraa va'e ma Jordão yakã mbyte py opyta okuapy. Ha'e ramia ja Israel kuery ha'e javi ipiru reia rupi oaxa.