5
Israel kuery pire omboia ague
1 Ha'e va'e yvy regua huvixa kuery oendupa ha'e nunga. Amorreu kuery Jordão yakã kyvõ katy ikuai va'e kuaray oikea katy, ha'e cananeu kuery ye'ẽ yvýry ikuai va'e ruvixa kuery ha'e javi oendu Israel kuery renonde Jordão yakã Senhor omombirupaague, ha'e kuery oaxapa peve. Ha'e va'e oendu vy ipy'a kangypa Israel kuery káuxa, noĩvei ma imbaraeterã.
2 Ha'e va'e jave py Senhor aipoe'i Josué pe:
— Pejapo kyxe ita gui, ha'e emboi uka Israel kuery pire — he'i.* Gênesis 17.10-14 ha'e Êxodo 12.43-48
3 Ha'e ramo Josué ojapo uka kyxe ita gui, ha'e vy omboi uka Israel kuery pire, Gibeate-Haralote py.
4 Pova'e nunga rupi ae Josué omboi uka ipire, mba'eta Egito yvy gui oẽ va'ekue tekoa e'ỹa re oguataa rupi omanomba ma rire, avakue xondaro ikuai va'ekue ha'e javi.
5 Mba'eta Egito yvy gui oẽ va'e kuery ma opire omboi uka va'ekue meme, ha'e rã oẽ va'ekue gui tekoa e'ỹa rupi oiko'i va'ekue ma nomboi ukai.
6 Quarenta ma'etỹ re Israel kuery ikuai tekoa e'ỹa rupi, avakue xondaro ikuai va'e Egito gui oẽ va'ekue omanomba peve, Senhor nonhe'ẽ rendui rire. Ha'e va'e kuery pe ma Senhor oura reve ijayvu yvy neĩ ndoexa ukai aguã re, tamoĩ kuery pe Senhor ome'ẽ aguã re oura reve ijayvuague, yvy kamby ha'e ei oata e'ỹa.
7 Ha'e rami vy ha'e kuery rekovia ma ta'y kuery ju omoingo. Ha'e va'e kuery pire ae Josué omboi uka, nomboi ukai teri va'ekue ikuai ramo, oguataa rupi nomboiai rire.
8 Ha'e kuery pire omboipa ma rire opyta ranhe ikuaia py ae, okuerapa peve.
9 Senhor aipoe'ive ju Josué pe:
— Kova'e ára peẽ kuery gui aipe'a Egito yvy re escravo pendekuai vy pexĩmba reiague — he'i.
Ha'e nunga rupi ha'e va'e tekoa Gilgal hery aỹ peve.* Tery Gilgal nhaendu rã “Oipe'a” 'ea rami.
Páscoa ára py ngaru ojapo okuapyague
10 Gilgal py Israel kuery ikuai jave ojapo okuapy ngaru Páscoa ára. Ha'e va'e jaxy catorze ára va'e ka'arukue py ojapo, Jericó yvýry nhuũndy reia oĩ va'e py.
11 Páscoa ára rire ko'ẽ jevy ho'u okuapy mba'emo aju ha'e va'e yvy re ojou va'ekue: mbojape imbovua e'ỹ va'e ha'e mba'emo ra'yĩ oaimbe va'ekue ho'u okuapy ha'e va'e ára.
12 Ha'e va'e yvy regua mba'emo aju ho'ua ára rire'ive ma opa maná.† Maná ma Israel kuery rembi'urã Nhanderuete yva gui ombou va'ekue (Êxodo 16). Ha'e rã Israel kuery ndojouvei. Ha'e rami 'rãgue py ha'e va'e ma'etỹ guive okaru okuapy Canaã yvy re mba'emo aju ikuai va'e re.
Josué pe Senhor pegua xondaro ruvixa ojekuaa ukaague
13 Jericó yvýry Josué oikoa py oma'ẽ vy guenonde oexa peteĩ ava opu'ã ho'amy va'e, opo py kyxe hyru gui oekyi va'ekue reve. Ha'e va'e re Josué onhemboja vy oporandu ixupe:
— Ndee pa orea katygua tyrã pa orerovaigua reiko?
14 Ha'e rã ombovai:
— Any. Xee ma Senhor pegua xondaro kuery ruvixa aỹ aju va'e — he'i.
Ha'e ramo Josué ojero'a vy ngova omovaẽ yvy re omboete vy. Ha'e vy oporanduve ju ixupe:
— Xeruvixa, mba'e 're 'rã tu xee nerembiguai pe?
15 Senhor pegua xondaro kuery ruvixa ombovai Josué pe:
— Emboi ndepy regua, mba'eta yvy reĩa ma iky'a e'ỹ va'e — he'i.
Ha'e ramo Josué ojapo ha'e rami.