3
Ojexavaia re ijayvuague
1 Xee ma ava jexavai aendu va'ekue
Nhanderuete opoxya rupi yvyra po'i'i ombou rã.
2 Mba'eta xereraa vy ojapo karamboae pytũ rupi aiko aguã,
hexakãa rupi e'ỹ.
3 Mbovykue rei e'ỹ xerovai omoĩ opo,
ára pukukue re.
4 Omoxorĩmba xero'o, xepire voi.
Xekãgue omopẽmba guive.
5 Xerovai omopu'ã xejokoarã kuery.
Veneno ha'e haxy va'e py ae xejoko.
6 Ojapo pytũa py xerekoa aguã rami,
raka'e rã peve guarã omano va'ekue rami.
7 Kora py xejoko rã nda'evevei ma aẽ aguã.
Corrente overa va'e guigua py xejokua.
8 Ajerure ha'e ajapukai teĩ
noendui anhembo'ea.
9 Ita guaxu omoatyrõ mbyre py ojopia xerape,
omokarẽ rei guive.
10 Xerarõ oiny urso oma'ẽ mbegue va'e rami,
ha'e xivi onhemi oiny va'e rami avi.
11 Ha'e rami vy xerape gui xepe'a xapy'a vy xemboa'ypa.
Ombovaipa pyre rami xereja inony.
12 Guapa oipira vy
xemoĩ guembiarã.
13 Xekuraxõ re oipyxo
ngu'y hyru guigua py.
14 Xeapo xeretarã kuery ha'e javi xejojai aguã rami.
Ára pukukue re xembojaru rei okuapy.
15 Jexavaia re anho xemongaru,
xevy ho'u uka reta haxy va'e.
16 Xeapo ita ra'y re xeraĩ amopẽmba aguã rami.
Xeao'i tanhimbu py rive.
17 Xenhe'ẽ gui oipe'a aiko porã aguã va'ekue.
Ha'e ramo xerexarai iporã va'e aexaague re.
18 Ha'e rami vy “Opa ma xeporãague,
Senhor aarõague voi”, ha'e.
19 Nema'endu'a nho ajexavaia ha'e ajae'o aikovya re,
haxy va'e ha'e veneno ay'u va'e re guive.
20 Xee ma ha'e nunga re xema'endu'a riae aikovy xenhe'ẽ py.
Ha'e ramo xeryepy rupi xenhe'ẽ nda'evei ju.
21 Ha'e rami teĩ xema'endu'axe ju
pova'e nunga arõ aikovy va'e re.
Nhanderuete omboaxya rupi oipytyvõ aguã re ojerureague
22 Mba'eta Senhor nhanemboaxy ramo nanhanemombaai,
mba'eta nhanemboaxya ma opa va'erã e'ỹ.
23 Opa mba'e py ojeroviapy reiko vy
rexa uka pyau 'rã ko'ẽ nhavõ.
24 Xejeupe ae aipoa'e: “Xevy guarã oĩ va'e ma Senhor ae.
Ha'e nunga rupi arõ tema 'rã hexe”, ha'e.
25 Senhor opena porã 'rã harõa kuery re,
onhe'ẽ py oeka va'e kuery ae.
26 Ha'eve nharõ Senhor nhandereraa jepe aguã,
nhakyrirĩ reve.
27 Nhandevy pe ha'eve
nhanekunumi teri reve canga jexavaia regua jaropo'aka kuaa.
28 Ha'e rami vy tajaguapy nhande ae'ia py, tanhakyrirĩ nhainy,
mba'eta ha'e va'e canga ae nhandere Nhanderuete omoĩ va'e.
29 Tajajero'a nhanderova yvy ku'i re omovaẽ peve.
Xapy'a rei ma oiko nho 'rã nharõ jaikovy va'ekue.
30 Tanhaunga uka nhanderova nhaneungaxe va'e pe.
Tanhaendu rive opa marã nhandejojai reia teĩ.
31 Mba'eta Senhor ma
nanhandereja riaei 'rã.
32 Xapy'a rei nhanemomboriau ranhe teĩ
nhomboaxy ete va'e vy oexa uka nho 'rã nhanemboaxya.
33 Mba'eta nhomoingo axyxe reia py e'ỹ
ombojexavai avakue ra'y kuery.
34 Xapy'a rei amongue opyrõ imoiny 'rã
nhuã py ikuai va'e re,
35 ha'e rami e'ỹ vy Yvate ete va'e renonde teĩ
ha'eve'ỹa rami oikuaa pota 'rã joe,
36 ha'e rami e'ỹ vy avakue ojerure rã oendu rive 'rã,
teĩ Senhor ndoexai 'rã teve ha'e rami oikoa?
37 Mava'e ayvu rupi rive tu mba'emo oiko 'rã,
Senhor omoingo e'ỹ rã?
38 Yvate ete va'e gui nda'u ndoikoi 'rã ri
mba'emo vai ha'e iporã va'e?
39 Mba'e re tu ha'vy avakue imarã va'e ndojou porãia rupi ijayvu,
ojejavyague re ombopaga rã?
40 Jaikuaa pota ke jaikoa re ae.
Ha'e gui jaikuaa porã ma vy jajevy ke Senhor pe.
41 Nhandepo jaupi reve ke nhanekuraxõ voi jaupi
Nhanderuete yva re oĩ va'e pe. Ha'e vy aipo ja'e:
42 “Rojejavy, noronhe'ẽ rendui guive ramo
ndee ma ndoreperdoai teri.
43 Ndee ma ndepoxya py oreao'i reve orerakykue monha.
Oremboaxy e'ỹ re oremokanhymba.
44 Arai py renhemi
ndea py peve ronhembo'ea onhendu e'ỹ aguã.
45 Yty omombo pyrã rami rive oremoingo
yvy regua kuery ikuaia rupi.
46 Orerovai orerovaigua kuery ha'e javi
oipe'a okuapy ojuru.
47 Ore'áry ou ndorerekorãvei aguã ha'e yvykua py orembo'aarã,
orereityarã ha'e oremokanhymbaarã.”
48 Xeretarã kuery omokanhymbaa rã
xerexay oxyry atã ete.
49 Xerexa ojae'o tema.
Ndopo'oi, ndopytu'ui 'rã guive
50 Senhor opena e'ỹa ja,
ha'e yva gui oexa pota peve.
51 Mba'emo aexa va'e gui xeporiau xenhe'ẽ py,
kunhague xeretã rupi ikuai va'e re mba'emo oiko va'ekue káuxa.
52 Mba'e re'ỹ xerovaigua kuery
xejukaxe okuapy guyra'i rami rive.
53 Xemombaxe vy xemombo yvykua py,
ha'e ita py xeapipa.
54 Xeakã áry rupi yy oxyry atã ouvy.
Ha'e ramo “Akanhy ta ma!” ha'e.
55 Ha'e gui ma Senhor, yvykua pukuvea py aĩa gui
ajapukai nderery rupi.
56 Ha'e ramo ndee rendu xeayvua.
Emboty eme ndeapyxa ajae'oa ha'e ajapukaia gui.
57 Ndevy pe ajapukaia ára ndee ae renhemboja xere.
Ha'e rami vy xevy pe “Ekyje eme” 're.
58 Senhor, xerekove re reikuaa pota vy
xereraa jepe va'ekue aikove aguã rami.
59 Senhor, rexa reiny ha'eve'ỹa rami xerereko okuapyague.
Eikuaa pota 'rãgue xere!
60 Rexapa xeapo vai okuapya
ha'e xerovai onhembopy'aa ha'e javi.
61 Senhor, rendu xere ijayvu rei okuapy rã,
xerovai onhembopy'aa nhavõ,
62 xerovaigua kuery xerekokue ramigua rive omombe'u rã,
ha'e ára pukukue re xere ijayvu mbegue rei okuapy rã.
63 Exa pota tema ha'e kuery re, oguapy ha'e opu'ã ju ramo.
Mba'eta xembojaru rei rive okuapy.
64 Senhor, ndee rembopaga 'rã
opo py mba'emo ojapoague re.
65 Remopytũmba 'rã ha'e kuery py'a,
ha'e kuery re rembou 'rã ayvu vai.
66 Ndepoxya py remonha 'rã heravy.
Ha'e rami vy remokanhymba 'rã ndevygua yva guy gui.