19
Nhanderuete rembiapo ha'e ijayvua oguerovy'aa ague
Jogueroporaei va'e pe Davi ombopara va'ekue.
1 Yva re mba'emo ikuai va'e oikuaa uka Nhanderuete hexakãmba va'ea,
yvate rupi ikuai va'e oikuaa uka 'rã opo py ojapoague.
2 Ára nhavõ oikuaa uka 'rã ara pygua pe,
ha'e pytũ nhavõ oikuaa uka 'rã pytũ rupigua pe.
3 Nda'ijayvui 'rã, neĩ nda'ijayvuai 'rã,
ha'e va'e gui mba'eve nonhendui 'rã.
4 Ha'e rami teĩ ha'e nunga 'arandu ma yvy jave rupi oikuaa,
yvy apy peve 'rã ha'e nunga re ayvua.* Romanos 1.18-25, 10.16-18
Ha'e vy yva apy re omoĩ kuaray oike aguã.
5 Ha'e va'e ma omenda ramo va'e rami 'rã oẽ ouvy ngoo gui,
ovy'a 'rã ovy imbaraetepa va'e onha ovya rami.
6 Yva apy gui oẽ vy
oaxa 'rã ovy ijapy rovai peve.
Jipoi 'rã haku-a oguerovy e'ỹa.
7 Ha'e gui Senhor guigua lei ma ha'eve vaipa ete vy
omombaraete ju 'rã nhanderekove.
Senhor omombe'u va'e ma ogueroviapy vy
omo'arandu 'rã hi'arandu e'ỹ'i va'e.
8 Senhor nhombo'ea ma ha'evea ramigua vy
ombovy'a 'rã nhanekuraxõ.
Senhor ojapo uka va'e ma iky'a e'ỹ va'e vy
omoexakã 'rã nhanderexa.
9 Senhor renonde jajererokyjea ma iky'a e'ỹ va'e,
raka'e rã peve guarã guive.
Senhor joe oikuaa potaa ma anhetẽ rupigua,
ha'evea rami meme.
10 Ha'e nunga ma ouro gui jaipotave va'erã,
ouro oiky'a'o pyre gui iporãve ramo.
He'ẽve 'rã ei
hetãgue gui onhami va'ekue gui.
11 Ha'e va'e rupi nerembiguai kuery remongeta 'rã guive.
Ha'e va'e jajapo vy jajou reta 'rã iporã va'e.
12 Mava'e nda'u oikuaapa 'rã ha'e ae ojejavyague?
Emboguepa ke aikuaa e'ỹ-e'ỹ va'e guive.
13 Xejoko xee nerembiguai anhemboyvate reia gui voi.
Ha'e nunga ta'ipo'aka eme xere.
Ha'e rami rã iky'a va'e'ỹ 'rã aiko,
ha'e aa jepe 'rã ajejavyve etea gui.
14 Senhor, xe'itaova ha'e xerepya,
tove ayvu xejuru gui oẽ va'e ha'e xepy'aa xepy'a re oĩ va'e
nerenonde toĩ nembovy'aarã.